年青人的履歷表

收到幾封「炒老細魷魚通知書」後，請人程序隨即展開。

CK想快，選擇左將廣告擲上Jobsdb，Resume email過黎就收貨，唔洗兩日，成堆Resume塞滿電子郵箱。

收得多就唔代表一定好。數量就夠，質量就欠奉。CK左好多個鐘頭去pick可以約interview既Resume，不過，pick得落手既，少之又少。

你一定諗，CK要求太高，搞到個人黎見工到唔到？問心講，真係唔係。CK既要求其實好簡單，只要你expected salary唔係開得太過份，年青既，講廣東話，識英文，基本上我已經可以考慮約你interview。唯一既additional request係，你份Resume上面唔好俾我捉到我頂唔順既野。我頂唔順咩，舉幾個常見例子：

例子一：
唔該，請認清楚你apply緊既係邊間公司。我知道好多job seeker會一份Resume send俾N咁多間公司，不過工，做戲都要show多少誠意俾人睇。你send俾我既Resume連抬頭都係另一間公司，大佬，點敢叫你黎interview?

例子二：
CK本身就對求職者既學業成績唔係睇得太重，尤其係已經離開學校一段日子既candidates，學業成績就更加唔重要。CK登既recruitment ad亦從來唔要求candidates將佢既學業成績寫Resume上面，不過唔知點解，好多求職者硬係要加埋上去。假如你成績好，academic results係你賣點之一，加上去唔係問題，不過CK發覺大部份寫埋成績Resume既朋友，成績都係唔多見得人。呢Round我就睇過一份Resume，佢會考7科F，都照寫落去「show quali」。我請marketing assistant，你連你自己邊野可以出黎sell，邊野應該收埋都唔用心去諗下，你apply Marketing工？咪玩啦。

例子三：
我明明係請個secretary，點解你份Resume上面，花咁大篇幅講你考左MCSE同精通networking protocol?我就算肯請你，我估你都唔方做得長…唔好以為cert多就一定勁先得架…

例子四：
出左黎社會工作成六、七年，拜託，唔好將你中三果陣做過風紀同入過學校歌詠團既「威水史」擺落Resume度好嗎？CK睇完閣下既Resume，非常了解你中三果陳確實係個好學生，不過同時我亦會懷疑你既能力同智商自從中三開始就冇再增長過。

例子五：
一年前你既人工係港幣八千，經濟好轉多少你同我開價萬六？再睇多幾眼你份履歷，三年內轉左六次工。收到，假如有幸敝公司請到你，五個月後你又可以炒我魷魚，再過份新工。到時人工有機升到三萬二。

例子太多，不能盡錄。
每次睇完一大堆求職信，CK都一定不其然講句：「唉，家陣後生仔女…」