我們這一代生意人

CK身邊差唔多年紀既生意佬朋友，承繼父業既彼彼皆是，創業既則寥寥可數。今時今日創業，大概比從前更難。

好多年前既一個暑假，CK做暑期工時認識左當時既老細Uncle Sam。Uncle Sam宜家六十幾歲，係一間玩具廠既老闆。七十年代香港經濟起飛，佢同佢細佬，兩兄弟搞左間廠出黎。大概佢地並唔係最出色既生意人，不過憑住努力，雖然做唔成超級富豪，但生活水準都算得上幾富裕。畢竟佢地由二十幾時歲住板間房開始不斷往上爬，到而家六十歲人，有能力坐擁何文田兩千幾呎大屋，供得起兩個仔女留學美國，呢幾十年既努力，都咪話唔野少。

CK偶然都會同Uncle Sam飲下茶。不過幾年前CK同佢講話諗住做生意既時侯，Uncle Sam係其中一個向CK大潑冷水既人。佢潑冷水既原因，係覺得我地呢一代後生仔，唔捱得苦，又容易放棄。童年時物質生活富足，養到我地個個生骨大頭菜咁。創業做生意需要無比毅力同會遇到好多挫折，好似CK呢死仔唔方捱得住云云。

CK當然唔認同Uncle Sam對我地呢一代人既偏見，至少，CK都自以為自己唔係佢口中講果種生骨大頭菜。不過話晒係長輩，無謂同老人家鬥氣啦。呢幾年CK都有keep住問Uncle Sam一做生意既心得同貼士，不過識左Uncle Same大大話話成十年有多，佢所講既生意心得來來去去都係離不開要「肯捱」同「死做爛做」諸如此類，然之後例必撘句：「你地後生仔唔明架啦！」啊！收到。

CK從來冇抹殺過上一代生意人所付出既努力。不過，時代唔同左，成功既途徑都改變左。聽Uncle Sam講，30年前佢地最初創業既時侯，兩兄弟都係求其個爛鬼豆腐潤既工廠單位，買兩部爛鬼機器仔，再請兩個工廠妹就開工。Uncle Sam同佢細佬，既係老細，又係工人，每日由朝做到晚。咁既山寨廠模式，又可以比佢地接到外國大廠既訂單。做下做下，就越做越大，賺錢就越黎越多。你而家聽Uncle Sam既故事，好似天芳夜譚，咁既規模咁既門面可以接到來佬大廠既單？就係唔到你唔信。30年前既香港，成個經濟都未成型，咩都有可能發生。你間廠個門面樣衰咩？冇規模咩？你對手一樣係咁。大家一齊起步，要賺錢，根本唔需要打贏行家。大家都係中小企，胃口有限，個餅大家根本食唔晒。唔似而家，大財團霸佔左大部份市場，佢地既胃口特大，佢咬左個餅一啖，淨番餅碎俾千千萬萬既中小企分黎食，而家先入行創業，梗係難啦。幾十年前，阿李超人都唔係好似而家咁惡啦，下話？

我地呢一代創業人既難處，除左市場被大財團佔去大部份之外，大公司經過多年既進步同資金既投入，由門面到服務質素既水平都經比以前大幅提高。消費者見慣大公司產品、服務同形象既standard，對全行既expectation都不其然提高左。中小企經營既困難，正係要用比大財團少N倍既資金，做出令消費者感覺上同大企業差唔多既質素。難度之高，絕唔係好似Uncle Sam所講，一招「死做爛做」可以解決。

呢一代創業人，一樣有靠創意發大達既例子，Google、Youtube既故事，大家耳熟能詳。不過，呢個年代同30年前既分別係，宜家一百萬個創業人裡面，大概先會出產到一、兩個天才，佢地有本事極速賺到幾百億，成為超級富豪，其餘九十九萬九千呢，大部份都係浮浮沉沉，吊住鹽水咁啦。30年前呢？或者佢地絕大部份都冇天份成為億萬富豪，但係憑住一招「死做爛做」，只要肯捱肯努力，一百個創業人裡面，總有二、三十個可以脫貧，能夠成為「比中產更好」既富裕階層。

今日做生意要贏並唔係容易。由板間房到何文田豪宅既港式奮鬥故事，究竟仲可以我地呢一代生意人既身上發生幾多次？又或者可唔可以CK身上發生？

難度雖然高，又唔代表一定做唔到。畢竟呢個世界，有太多太多可能啦，Life, is still good。