齊齊休扑賀07?

有緣人

如果你睇到小弟呢一篇文章的話，我諗我同你都算係幾有緣啦。台灣震一震，全球網絡大癱瘓，CK想上黎呢度update下自己個扑，都要靠「撞手神」先至好彩俾我搏到一次入黎。咁我估如果你又咁好彩入到黎睇我個Blog，睇到我呢篇個「撞手神」先upload到既文，咁我地仲唔係有緣？

唔知大家覺唔覺，最近幾年每逢年尾都總係好似有次地震咁。呢幾次地震好似有一個共通點，就係地震本身既effect，反而比唔上佢引發既「拼發症」既影響咁得人驚。好似早兩年印尼果一次咁，冇錯地震本身都害死好多人，不過講得人驚又遠唔及之後佢所引發既海嘯。今次台灣地震呢，最大鑊既又居然係佢震爛晒d資訊基建設施，而家呢個世界每日發生緊既野，真係估佢唔到。

之前CK響度大大聲話休扑，哈，家陣個互聯網震到爛晒，我要成功登入呢個Blogspot既網頁，機會仲難過買馬，咁既形勢，睇黎又要被迫休多一陣囉。不過今次有d唔同，因為休既，一定唔止CK一個。不個今次呢件事，感覺呢，好似做野咁，你日做夜做冇停手，以為自己係鐵人，點知即使你唔想休都好，到咁上下就總係會有d小病，迫你抖番幾日。或者呢d係好事黎既，等大家明白到，響呢個世界之上，其實自己係幾咁渺小，有幾多野係自己冇能力去控制。

大鑊，好似話worst scenario條海底纜要修理成三個禮拜喎，停咁耐，d手癮點忍？

*****

多謝晒

又到年尾，細個果陣老師例牌叫各位同學仔自我反省一下，過去一年自己做成點。CK同Stephy講，今年，對CK黎講，實在「太過」刺激啦。真架，感覺好似坐過山車咁。生意上固之然有好多大起大落既時候，不過除此之外，今年又確實有太多新鮮既事發生響自己身上。好似今年年頭先開始寫Blog呢個習慣，發展到年尾既時候，居然已經成為CK人生一個不可或缺既部份咁。仲因為blog呢樣野，間接令我多左份「寫稿佬」既兼職，一切一切，感覺幾咁奇妙。

不過唔知係咪人年紀大左，越黎越覺得自己個人既能力有限，即使有幾多開心如意既事發生響自己身上，其實去造就呢d事情既發生，當中都有好多好多唔同既人，直接同間接咁參與其中。今年雖然稍為刺激左d，不過對自己黎講，我覺得係好豐盛同過癮既一年。令到CK今年過得開開心心既，除左身邊既Stephy同屋企人之外，仲有好多好好既老友，一班每日忍受住CK呢個騎呢老闆既好伙計，當然仲有各位每日會花時間黎賤Blog坐下既虛擬朋友。

2006年真好，咁多位，多謝晒。

*****

話時話今日行過報紙檔，見到雜誌封面話小弟既偶像鄧麗欣俾小方飛左，喊到死去活來咁款喎…CK未買本雜誌返黎睇，唔知係真係假，不過，小方如果咁靚女都唔要的話…

Just in case呢幾日條海底纜依然未fix好，仲係成日入唔到黎的話，CK響呢度預早祝各位有個快樂既新年。

嘩，咁就一年。

貧者越貧 (轉載)

轉載自12月27日 am730

最近CK跟舊同事Simon舊，席間談到以前大家一起當Sales的苦與樂。很多人都可能有些錯覺，認為Sales這一行是一行主要靠努力不懈才可成功的行業。然而事實是否如此？

「CK，你就好啦，走左出做老細，唔駛再做我呢壓惡性行業。難委我仲要每日響公司度浮浮沉沉。」Simon一臉無奈地說。論勤力，Simon在公司裡算是數一數二，Cold Call、見客永無休止。論口才，Simon也絕對算得上是個能言善辨之人，單看外在條件，他絕對是個Sales的好材料。

不過論業績，Simon在公司裡向來也只是中規中矩。在沒有特別彪炳戰績的支持下，雖然在公司服務多年，仍然原地踏步，從未獲得升職機會。至於公司裡的幾位Top Sales，全都來自富裕家庭。CK無意貶低這些有錢人子弟在工作上的努力，不過做Sales這一行，單靠努力根本沒有可能讓你成為天之驕子。作為一個Sales，最大的本錢是「關係」。出身富裕的銷售從業員，他們所承繼的「關係」自然較多，跟其他出身寒微的同業，他們的起點跟本已經不一樣，工作起來自然事半工倍，升遷機會自然也遠較其他對手高。當然，亦有一些出色的Sales是單憑自己的努力去建立他的關係網，不過建立過程需時，然而Sales又是一行「手停口停」的行業，不少人根本捱不到完成建立關係網，便已被逼離場了。

「冇機會架啦，你點同班有錢仔鬥？呢個世界，向來都係貧者越貧架啦。」Simon說話時帶點悔氣，不過CK聽罷，也暗地慶幸自己幾年前離開了這個殺戮戰場。

Bonus的迷思

近住年尾，CK都準備響下個月發放年終花紅俾同事。不過最近拍檔對發花紅既安排有d提議同意見，CK左諗右諗，總係有多少豫疑，各位網友，不妨俾些少意見CK。

CK一向認為自己既公司係公司仔，於是響好多制度上，都冇好Black and White咁去訂一d規矩。就好似發花紅呢一樣野咁，總之果年公司有錢賺，CK年尾就會著量發放Bonus俾伙計，比例係幾多，發放既condition係點，冇咩明文講明。不過呢幾年公司都托賴發展得唔錯，規模上亦有增長，於是乎拍檔就提議，應該係時候為花紅既安排，好好咁訂一d規距，例如發放既比例、同埋要achieve到幾多target先至有Bonus之類，希望同事們有多一d motivation去工作。

我對呢個提議有多少保留，第一，CK覺得明文規定發放Bonus既condition同比例，對財務安排上既flexibility打左好大折扣。年終時發唔發Bonus，同埋發幾多Bonus，除左取決於果年公司賺幾多錢之外，仲有好多ad-hoc既因素考慮：例如同業既花紅水平、同事們既士氣、未來公司既投資同發展等等。呢d咁既factor，都唔係可以響成年之前就決定得到。如果響成年之前，就同同事們議定左發Bonus既安掛，到下年真係發Bonus既時候，冇左呢個flexibility，某程度上削弱左公司響發展同埋留住員工既競爭力。

第二呢，對於motivate同事呢個功能，CK亦對呢樣野存有多少懷疑。負責Sales既同事我唔擔心，反正佢地每個月都習慣有quota，多一個quota佢地唔會覺得頂唔順。之不過，佢地以經有一個monthly quota響身度，多一個對佢地motivation有幾大呢？至於d非sales既同事，佢地既工作並唔係直接同公司賺幾多錢有關，雖然間接既關係倒係有既，不過佢地未必feel得到。響feel唔到既情況之下，加呢一d發bonus既condition俾佢地，係咪真係可以motivate到佢地？又抑或，呢班backend既同事，對咁既安排反而會覺得係老闆特登設d關卡俾佢地，等老闆有機會可以連Bonus都慳埋？

CK冇呢方面經驗，對拍檔既提議亦唔敢妄下判斷。咁你地又點睇？

冇寫幾日扑，原來感覺係咁…

唔知係咪年紀大左，冇夜蒲好一段時間，平安夜去Party，飲大幾杯兼玩到凌晨時份之後，聖誕節正日成個人好似行屍走肉咁。老土咁講返句，加陣，真係唔多捱得囉。

一連幾日既假期，除左將CK由日常既工作抽左出黎之外，抽左出黎既，原來仲包括寫Blog同睇Blog既習慣。諗返轉頭，過去呢幾個月，完來真係未試過連續幾日唔掂下部Laptop。今日開返著部機，去睇下網友留俾我既留言，睇下其他朋友既扑，感覺居然有d新鮮感。每日習慣寫Blog，有時好似例行工事咁，反而偶然停左幾日，果種從新pickup番既興奮同新鮮感，令到自己更有衝動去嘔番幾百字出黎。其實去旅行放假都係一樣，出外旅行，舟車勞動頻頻撲撲，體力上好多時都未必真係可以得到休息。不過人在異鄉，夾硬將你日常既工作節奏打斷，將你抽開三幾日，到你返番去工作崗位既時候，對放低左既工作又會從新感受到果種新鮮感。講真，體能上要應付十個八個鐘頭既工作，之前果晚訓足覺就足以卓卓有餘，但要響精神上要保持戰意，唔放下假旅下行都咪駛旨意。

*****

都係果句，年紀大左，冇以前咁鐘意出街蒲。要搵朋友吹水，我情願走上去朋友屋企開支酒靜靜地好過。雖然響朋友屋企唔似得落Pub咁多女仔望，某程度上少左d娛樂，不過響屋企勝在靜靜地，傾計既「質素」可能仲高d。咁去得人地屋企多，CK發覺好多同自己差唔多年紀既朋友，都好有心機咁去設計同decorate間屋，去到佢地屋企，即使唔係d咩豪宅都好，你總會感受到一d「品味」響入面。哈，CK自己個狗竇呢，非但冇咩心思可言，加上CK同Stephy日做夜做，基本上連Keep間屋整整齊齊都有d困難。有時放工返到屋企，望見屋企唔同角落堆積如山既雜物，心諗咁貴去供層樓，夠境係俾我地兩公婆住，抑或係俾d雜物去住。心裡面雖然有想即刻清理既衝動，不過經過一整日勞心勞力既工作，原則上只要張床上面唔係滿佈雜物，仲有些少位可以訓，清潔執屋呢d野，都係訓左先算。

朋友最近問CK同Stephy幾時會生返個CK仔CK女出黎，我諗，等我地兩公婆有時間執乾淨間屋先講啦，我唔想生左個仔出黎，要放佢響垃圾缸裡面喎…

聖誕禮物 (轉載)

轉載自12月22日 am730

臨近聖誕假期，各同事們的holiday mood都提升到接近頂點。加上近幾天的天氣突然變冷，令公司裡的節日氣氛更見濃厚。不知是否各女同事們的party schedule頻密，最近她們都打扮得花枝招展，有時也真的讓CK眼前一亮。望住刻意打扮的同事們，原來她們也可以如此漂亮。畢竟，她們青春無敵嘛。

聖誕節對CK這些小老闆來說，感覺其實並不特別高興。一來聖誕及新年一連幾天公眾假期，令整個工作進度都慢了下來。二來臨近年尾，又到要「撲水」準備出雙糧花紅的日子。兩件麻煩事同時困擾，心情其實也好不到那裡去。同事們當然感受不到老闆這個時候感受到的沉重壓力，相反，她們期待著的，正是那幾天假期和即將發放的年終花紅。

「點呀老細！皺晒眉頭咁？就快聖誕啦，咪成日好似世界末日咁啦！」Kelly門也不敲的走了入我房，隨即將一份包了keroro花紙的禮物放在我的書桌上：「聖誕快樂！」

我有點受寵若驚，Kelly笑了笑：「唔係我一個送架。噚日成班同事放工一齊去買，好貴架！」說罷便轉身離開了我的房間。

我望著這張由Keroro花紙包裹著的禮物，心裡不期然甜了一甜。做老闆的，雖然平時硬裝出一副「懶」嚴肅的樣子，其實很多時候也是蠻易的。伙計到大時大節，還願意花點時間買禮物給自己，雖然平時她們總有些時候把CK激得死去活來，不過這一刻都好像沒有所謂了。

「唉，你哋呢班囡囡真係…」我心諗。

總有一點遺憾

中國人有個講法，假如老人家有重病，大時大節之前，對佢地都係一d重要關口。一個不留神，佢地未必過得到。

或者因為咁，明天冬至，外婆就係咁樣捱唔過，今日靜靜咁就走左。

外婆年紀大，係笑喪，加埋已經病左好一段日子，各人都有心理準備。CK同外婆相處既時間並唔多，所以感情唔算太深，佢走左，對我黎講未算係好傷感，不過佢今次走，反而remind左我好多年前，我另一位婆婆走既時候既一d記憶。

CK自細同婆婆同住，婆婆自己無兒無女，於是乎CK媽就將CK過繼左俾佢做孫仔。CK同婆婆一向感情唔錯，不過年青既時候CK無心向學又爛玩，婆婆一日都鬧我唔生性，叫我大個要記住要生性做人。當然啦，年少無知，少不免嫌老人家長氣囉唆，teenager年代既CK總覺得婆婆既存在係理所當然。後來，CK去左外國讀書，除左耐不時放假返黎香港可以探下佢之外，都冇咩時間再同佢相處囉。到左讀大學最後一年，應付緊畢業試既時候，CK突然接到CK媽既長途電話，話婆婆病重危殆，當堂嚇左一跳。原來每日好似理所當然響度既人同事，all of a sudden係可以有機會消失既。到CK返到香港果陣，婆婆都已經走左囉。冇去見佢最後一面，even到而家對CK黎講，都總係覺得有d遺憾。遺憾既，除左冇陪佢行埋人生最後一段路之外，仲有CK響婆婆在生之時，一直冇帶過Stephy同佢老人家飲返餐茶。如果佢知道自己原來有個咁靚女既「孫身抱」，肯定開心到不得了。

婆婆走既時候仲有一段小插曲。話說當時婆婆病重，垂死邊緣遲遲未能斷氣，CK媽認為佢必定係心中有所牽掛，於是CK媽撥左個長途電話俾熟睡中既CK，叫CK響電話度，同婆婆講幾句。據CK媽所講，電話掛斷之後，不到三分鐘，婆婆就走左。

我記得我大概係咁同婆婆講：「婆婆，唔駛擔心CK呀，我應承你，我一定會生性做人，你放心走啦…」

要生性做人，但願我真係有遵守我呢一個諾言。

海外vs本地 (轉載)

轉載自12月21日 am730

「請邊個好呢，兩個都咁鬼靚女……」我望著手中的履歷表，正苦思著應該請誰。

「請個外國讀書返嚟㗎啦！」Kelly老沒好氣的回答說：「呢排好多外國客人呀，我唔係好夠人手應付。外國讀書返嚟個，英文都好啦。正好幫我解決燃眉之急。」

事實上，我們又真的需要一個語言能力強的同事，負責應付外國的客人。香港僱主普遍崇洋，相比之下，一般人都認為在外國讀書的畢業生，在能力上會比本地生強一點。語言能力當然是其中之一，國際視野方面，外國畢業生在僱主的眼裡也相對較強。CK對這個觀點不置可否，但無可否認，根據CK過去請人的經驗，外國畢業生普遍在見工時的表現，一般都比本地生稍為優勝。優勝的地方，主要在於其表現出來的自信心之上。本地生的表現傾向內斂，甚至是害羞。許多他們擁有的優點，在面試時都不敢盡情表現出來。相反，海外生的表現一般都較放，對於他們的強項，他們都會毫不害羞地展現出來。兩者相比之下，在interviewer眼裡形成強烈對比。即使兩者能力條件相若，本地生在自信心方面卻往往被比下去。

「其實，我個心都想請個本地女仔……話晒我都係本地畢業嘛。」Kelly嘆了口氣：「不過一比之下，差距，真的太大了。」

本地生不是輸在能力比海外生差，而是輸在presentation的技巧和自信心。香港的教育，一直以來，實在太缺乏這方面的training了。

求職困局 (轉載)

轉載自12月20日 am730

坦白講，CK請人一向對學歷要求不高。一來CK這類中小企，對海外名牌大學畢業生根本看不上眼，二來CK的公司，並不是有很多專業的工作必須有大學學歷才可勝任，所以無必要將職位的requirement縮窄至只大學畢業生才可應徵。

本地大學生在求職市場的競爭力，CK一向很懷疑。香港的老闆們一向崇洋，海外的畢業生一向會被看高一線。

求職市場內，那些最好的工作，通常都被那些海外畢業生搶去。餘下所謂較差的工作，很多就好像CK這類中小企，對學歷要求並不高。換句話說，這些本地大學生，求職時的競爭對手，避免不了那些學歷較自己低的中學生。

面對這些學歷較低的對手，其實優勢不但不明顯，大學生們較高的學歷，反而某程度上成為他們的負累。礙於學力較高，大學生的叫價一般亦比其對手高。單是這個較高的叫價，已在一眾中小企老闆們的眼中打了折扣。再者，員工的穩定性一向是老闆的重要concern。

一個大學生，去申請一份只要求中學學歷的工作，老闆必定會想：這個人來這裡工作，大概只是暫時性質，屬騎牛馬，必定做得不長。老闆對大學畢業生有了這個擔心，他們找工作的成功率，又要再打折扣。

畢業後的第一份工作，雖然不致於影響一生，但卻往往是一個打工仔向上爬的一塊重要踏腳石。

本地的畢業生，由離開校園一刻開始，就要遇上這個高不成低不就的問題，CK望著來見工的大學畢業生們，看見他們連CK這間小公司的職位也願意紆尊降貴來應徵，也真的替他們要面對如此困局擔心。

面試衰神 (轉載)

轉載自12月19日 am730

聽過很多朋友的經驗，說去見工面試時，遇著一些乞人憎的interviewer。這些interviewer態度囂張，問的問題又好像是要有心奚落那些求職者，令到他們整個面試的表現，打了很大的折扣，嚴重影響他們獲聘的機會云云。

常常當interviewer的CK，大概也屬於這些朋友口中，其中一個乞人憎的interviewer。在面試過程之中，作為interviewer的CK，都會盡量避免給來見工的人感到一個太輕鬆的氣氛。相反，CK還會刻意製造一點壓逼感出來。這樣做的目的當然不是去show一下自己的權力有幾高，又或者刻意令求職者難堪從而令自己得到快感。這種壓逼感，主要是要測試一下，求職者面對壓力時的表現。除此之外，許多求職者都會為了個別面試，會度身訂造許多「故事」出來 ，務求去取悅那些interviewer。這些刻意製造出來的壓逼感，就是要用來試探一下這些「故事」的虛實，嘗試令求職者在「老作」的過程之中露出馬腳，自打咀巴。

interviewer每日面對求職者眾，要從芸芸來見工的朋友之中找到合適人選招聘，其實殊不容易。每天由早到晚，interviewer都要不停營造一個壓逼的氣氛，其實也很不輕鬆。下次當你見工，遇上那些你以為是衰神的interviewer時，先別主觀地認為那個interviewer的本人有問題。測試你如何面對一個衰神，很多時候正正是整個interviewer的精髓所在，所以切忌意氣用事。那個你以為的衰神，當完成你那個interview的時候，其實，可能也是一個大好人。

休扑之前

剛剛先睇到渣老闆話要抖抖(有冇搞錯！鋪鋪都唔夠渣老闆快…)，查實CK呢邊，到左年尾，一樣好多野要搞。自從大半年前CK開始左寫Blog之後，隨即開始荒廢現實世界裡面自己既老闆工作，話咁快到左年尾，都係時候放低個扑一陣，返番去現實世界，搞番掂d手尾先。

所以同阿渣老闆一樣，呢幾日，抖抖先。放埋聖誕紅假之後先再返黎講野啦。

係呀，係諗住聖誕之後架。呢個聖誕，希望多d時間陪下Stephy、家人同朋友，個Blog，唯有放完假先算啦。

又講時講，各位朋友今日有冇睇報紙？我地大家都係今年既風雲人物喎…恭喜恭喜。不過恭喜之餘，建議大家都去睇下阿東寶哥既呢一篇，大家一齊威威做風雲人物既同時，佢講既野都幾係發人深省。

Before小休之前，想解答埋早前一個朋友問我既問題。個朋友問我個description，係咪打錯左字，應該係「一隻披著羊皮既狼」，唔係「一隻披著狼皮既羊」喎…

朋友，我冇打錯字。今時今日，唔披返塊狼皮響身度，好難生存架。

尤其是我呢d綿羊仔呀。

By the way，聖誕佳節，願各位風雲朋友們，都可以同你地既好伴侶好家人好朋友，過一個甜蜜溫暖既聖誕。

Merry X'mas，下星期見。

我想睇下出面既世界

星期六早上，電話筒傳黎久違了Nicole既聲音。

「CK！最近幾好嘛？聽講你又開分店喎…」

「係呀。」我答：「你咁都收到風，即係你搵過d舊同事啦！做乜咁好死搵下我呀？」

「唉，老細…」Nicole好似有d有口難言咁：「我又轉工啦，新果份工要reference check，我俾左你既contact佢地…」

「嘩，咁快又轉工？對上果份你都好似未做夠三個月喎。」

Nicole中七畢業，畢業後做過幾份contract臨時工，跟住輾轉黎到CK公司。一做，就差唔多三年，算係響佢短短既工作生涯裡面，做得最長既一份工。Nicole響CK度返工既時候，工作表現都算唔差，態度亦好，從冇遲到早退，病假亦少之又少。Nicole係個好鐘意講野既開心果，所以響同事之間好受歡迎。不過大約半年前，佢有一日突然之間同CK講：「CK，我打算唔做啦。我響度雖然開心，但係，我想睇下出面既世界。呢幾年，多謝晒。」

我最記得佢果句「我想睇下出面既世界」，如雷貫耳，雖然事隔半年，依然記憶尤新。

「唉，無法啦，做緊呢一份真係太悶啦，日日都淨係坐響寫字樓度發呆，d同事又唔係好似以前咁好玩，個老細又一日響度扮晒野，難頂到死，仲成日逼人坐響公司度陪佢開OT…」Nicole一輪咀咁係咁講呀講。

「小姐呀，出面打工係咁架啦！」我忍唔住打斷佢既說話：「你走果陣我提醒過你架啦…」

係，當日我係真係提醒過佢。CK呢道，對好多人黎講可能係一個溫室，無風無浪，冇辦公室政治，一大班後生仔女日日響公司度圍威喂，連老闆都係後生既傻仔一個，對好多人黎講，或者係一個好奇怪既工作環境。出面既環境，當然同CK呢度好唔同，可能係formal好多，不過formal既環境又未必唔好，總之唔同既人就會對唔同既環境有唔同既反應。

「今次呢份新工係咩position呀？」我好奇問：「阿女，話時話你想我點同你既新employer講呀？」

「其實，新呢份工既position同響你果度差唔多，唉，果時響你度走，就係覺得想做d唔同種類既野，點之兜左咁大個圈，都係做返幾乎一模一樣既野。哈哈，不如你再請我丫！反正做生不如做熟，你俾返以前我份人工我就ok架啦！」

我突然間醒起，剛剛先有同事補水俾我辭職，公司等人駛，Nicole又有經驗唔駛浪費時間再train過，既然佢afterall都係做返一樣既野，咁不如叫佢返黎啦…

不過咁，當日佢要「睇下出面個世界」既辭工理由，全公司上上下下都知，咁出去出面睇過啦，就返番黎。假如我真係叫佢返黎，會俾左個咩既message其他同事呢？好果邊諗，同事們可能睇見Nicole既經驗，覺得出面世界難撈，兜咁大個圈都係還是覺得呢度好，與其係咁不如疊埋心水響度長做啦。不過如果諗得悲觀d，大家覺得完來出去撈完唔掂，返轉頭CK都仲肯請返的話，咁又會唔會令同事們，更有膽量離巢出去闖？大不了，先返黎囉…

又萬一，佢返黎做一陣，然之後又話要再出去睇多d外面既世界，咁我點同其他同事交待？

「喂Nicole，咪玩我啦。你叫你新既老闆call我啦。到時我吹到你天上有地下無，佢如果唔請你就一定會後悔咁啦，滿意未？」

放低電話，CK坐左響自己房裡面張大班椅度，腦裡面不停重複果句「我想睇下出面既世界」既說話。我透過房間既玻璃窗，望住坐響我房間出面好專心做緊野果班伙計，心諗：「睇下出面既世界，後生仔女，邊個唔想？」

唔知幾時，又會再有同事同CK講，要睇下出面既世界啦。後生仔女，出面既世界，點都要睇過先至會心息既。呢樣野，雖然唔鍾意，不過我卻絕對明白。

終於捱到週末

喂洛克，咪咁生外啦大佬，唔駛下下「恕我直言」前「恕我直言」後啦！小弟寫得呢d問題出黎，梗係想聽d真既意見同advise啦。你肯講真說話我要多謝你就真。如果你收收埋埋唔同我直言的話咁我就真係唔肯過你啦。

員工離職既故事，CK響自己個blog度都連續寫左幾日。你話我係咪好介意呢件事呢？就個別事件黎睇，講真又唔係。不過呢單野暴露左CK公司裡面既一d長久以來都未解決到既問題，呢一樣，先至係CK最介意，亦令到CK呢幾日不受控地不停思考有關問題。不過黎到weekend，唔諗咁多住啦，休息左先算。

自從響原始森林放假返黎，呢個禮拜在公在私都有好多事發生，體力同心力都實在用得好盡。早兩日仲忙到連730份稿都幾乎唔記得交，搞到老編要OT等我份稿，一萬個唔好意思。做生意之後，硬係耐不時就會有d咁既難捱星期。家陣終於捱到weekend，都係果句，又要叉電啦。

*****

前兩日，電台播左一首好多年前張學友既歌。Stephy聽完，突然之間有d感動，喊左出黎。

結婚之前，反而冇細心留意呢首歌既歌詞既內容，又或者人生未去到某d階段，所以根本感受唔到當中既情懷。一直以黎，聽過好多人覺得婚姻唔可靠，唔相信婚姻制度。CK同Stephy都係天真既人，總覺得有問題既，並唔係婚姻制度本身，而係大家對呢段婚姻有幾願意付出。

CK覺得自己婚後比婚前更幸福，因為呢段婚姻，令我覺得每一日既努力，都變得更有意義，更加值得。

尤其係好似呢幾日呢d難捱既日子，更加發覺，有老婆響身邊，係一個幾咁大既恩賜。

夜闌人靜，我響iPod度重複播住呢首歌聽，完來感動想喊，有時都唔係Stephy專利。

今晚破例響個Blog度，轉載一次歌詞，希望你地都分享到CK同Stephy所感受到既感動。


有 個 人 --- 張 學 友
曲: Eric Kwok 詞: 陳 少 琪

上 個 世 紀 像 已 籌 備
然 後 這 生 分 享 趣 味
換 了 角 色 換 了 場 地
都 等 待 你
若 要 說 出 甚 麼 是 你
談 話 思 想 都 可 細 味
明 瞭 內 心 如 同 自 己
寫 我 人 生 精 彩 傳 記

同 行 共 創 造 時 勢 運 氣 相 識 一 天 算 起
我 敢 擔 起 各 樣 危 機 有 背 後 人 是 你
同 行 共 領 會 人 世 道 理 假 使 一 天 不 再 飛
到 公 園 中 散 步 年 紀 有 結 伴 人 是 你

若 到 某 天 尚 可 合 照
頭 上 多 稀 疏 都 美 妙
肥 胖 或 者 眉 毛 漸 少
一 切 外 表 都 不 重 要

同 行 共 創 造 時 勢 運 氣 相 識 一 天 算 起
我 即 使 生 氣 及 無 理 有 慰 問 人 是 你
同 行 共 領 會 人 世 道 理 假 使 一 天 不 再 飛
有 新 相 識 我 便 提 起 有 個 內 人 是 你

同 行 共 創 造 時 勢 運 氣 相 識 一 天 算 起
我 敢 擔 起 各 樣 危 機 有 背 後 人 是 你
同 行 共 領 會 人 世 道 理 假 使 一 天 不 再 飛
到 公 園 中 散 步 年 紀 有 老 伴 仍 是 你

祝大家同你身邊既伴侶有個甜蜜既週末。

員工走的死因

員工流失，人手唔穩定，一向都係CK其中一個最頭疼既問題。同行家相比，From what I heard呢，行家既員工流失率比CK公司仲厲害 (可能係我一廂情願)，當中牽涉行業問題。不過CK成日諗，即使流失量比行家少又如何？反正而家既流失量對我黎講都以經夠晒麻煩，即使覺得自己好似比行家優勝都好，問題，一樣響度。

員工流失，我覺得有幾個大原因。

1) 薪酬待遇唔滿意，呢個我諗最常見。咁論工資呢，CK俾既人工，自問應該唔算差，所以我一向認為我既問題唔響呢度。

2) 與同事、上司既關係唔理想：咁呢樣我都唔相信係我公司既case。CK一向緊張團隊關係同士氣，so far大家既相處都幾融洽，我又睇唔到有咩問題喎。有時我只會怕佢地太friend多過唔融洽囉。

3) 公司俾唔到足夠prospect佢地：呢樣我覺得係CK公司一個死穴黎既。中小企對好多人黎講都係踏腳石，如果選擇一間公司去做過世的話，多數人都會選擇大公司，起碼覺得穩陣同有一條比較清析既career ladder去climb。中小企既難題係去比同事們覺得，隨住佢地做得越耐，經驗同能力都有增加時，佢地所得到既power同待遇係咪真係可以案比例咁增加。CK一直強調，大家既前景，同公司既growth係直接掛鉤既，而過去幾年公司既增長亦幾明顯，不過由一間蚊型公司，要發展成為一間大家覺得可以「付託終身」既公司，時間之長，相信大部份打工仔都唔會有咁既耐性，所以我一直懷疑我呢個approach係唔work，甚至係一個大敗筆。

4) 選人出問題：可能由根本既請人requirement就出左問題。呢樣，我覺得某程度上都係既。每一種人都有佢既好處同唔好處，CK傾向請年青、廿歲出頭既女孩子，呢個年紀世既同事，一般對商業社會充滿好奇，亦較唔定性，流失既機會又必定較高。係唔係一定要請呢個age group既同事呢？—部份啦。某d前線既工作，年青貌美係有一定優勢既，至於後勤果批，當年CK希望成間公司既氣氛同隔漠都少d，所以希望同事都係差唔多年紀，溝通較為容易，團隊感覺亦較強。是否因為咁種下禍根，CK到而家都唔敢肯定。

5) 對工作性質生厭：曾經有離職同事向CK表示，工作性質對佢地黎講太悶，希望可以試一d新既工作。處理呢個問題，CK一向覺得自己做得唔好，亦諗唔到可以點做。公司細，業務亦focus，工作既種類有限，如果同事們對工作既性質感到厭倦時，CK手上其實冇咩野可以比佢轉變。至於工作性質本身，有d工種無疑係比較悶既，但果d工種又真係不可或缺喎，呢個時候，最令CK頭痕。唔能夠將一d沉悶既工作變成唔沉悶，或者呢個都係CK應該反省下既issue。

話時話，員工走左啦，請人程序亦展開左，不過年尾時份，請人，原來一樣勁難。收既Resume比之前幾個月少好多倍。各位做HR既朋友，有冇好提議俾CK，點樣可以令多d合適既candidates有興趣apply你份工呢？

見工的手袋 (轉載)

轉載自12月15日 am730

CK公司最近請Sales。坦白講，年尾時分，收到的求職信並不多。可能因為選擇少，所以前來見工的朋友，質素都未如理想。Kelly和我做了大半天interviewer，好不容易才遇到一個樣貌娟好談吐得體話頭醒尾的candidate。

「剛才個女仔，似乎條件唔錯，可以考慮考慮喎。」CK跟身邊的Kelly說：「難得仲幾靚女添…」

「老細，呢個唔得。」Kelly眉頭一皺：「你有冇留意佢個手袋？LV新款呀，即使去米蘭站買second hand都要成八千銀呀。」

被Kelly這樣提一提，CK立即明白了。仔細看清楚她的履歷表，果然，地址是半山某豪宅。

CK以前都曾經試過請有錢女做伙計。這個有錢女留學外國，語言能力又強，學識好而且話頭醒尾，當年CK都曾期望過她會成為我的得力助手。不過CK這間小公司，好明顯與這位有錢同事是一個錯配。據說很多美資投資銀行喜歡聘請一些有錢人的子弟工作，貪其connection夠多，幸運的話甚至可以透過他們這些connection為公司爭取到生意。

CK這些小公司則剛剛相反，有錢子弟一來對我這些中小企少多數看不上眼，二來他們一向不愁生計，賺錢買花戴。沒有生活壓力之下，當一對工作生厭時，隨時可以拍拍屁股辭職去也。人事的穩定性對中小企尤其重要，即使條件再好，一眾中小企的老闆也不願冒這風險去請這些天之驕子。

當年CK公司的那位有錢女，有天早上跟我說：「CK，多謝你過去幾個月對我的教導，我在這裡很開心，同事也待我很好，不過我想清楚了。我覺得這裡還是不適合我。我明天開始不幹了。放心，我會賠足錢給公司的。」我還記得，她走時，都是同樣背著一個LV手袋的……

Life goes on

過左一晚，尋晚既情緒病，唔見左lu。伙計辭職，係生意一部份，afterall工作依然要繼續，Life goes on。

多謝各位既message，特別係c.m.既advise。最後CK都係選擇左如實向同事們講有關事件，或者咁講，與同事們相處，可能既情況之下，我都希望可以坦白一d。總之呢段時間，少左一個同事幫手，辛苦晒各位同事啦。

CK尋晚響度諗，自己既management方法同理念，係咪真係出左問題呢？CK以前打工，見過好多我好唔鍾意既老細，到自己都出黎做左老細既時候，就誓神劈願咁同自己講，唔可以重複犯以前我識果班老細所犯過既錯。你話CK天真又好，on居都好啦，我對自己點樣對班伙計，有一定要求響度。有d太harsh同太唔公度既野，我過唔到自己果關。講得白一d，我—向傾向相信，平時我公度咁對你，咁響好多事上面，我亦相信你會公度咁對返我。好似今次同事即時離職呢單野，咁講，法例上，用錢去補俾我，當然算係公度，但係如果講到personal ethics上呢，坦白講我就有些少保留。留低一堆爛攤子，完全唔交待即走，唔公度既，不單止係對我，仲有平時同你每日並肩作戰既同事。佢地唔知頭唔知路要去執你既手尾，我覺得佢地比我仲慘。

不過咁，呢樣野牽涉到「良心」問題。良心呢一樣，我覺得係冇得管理。發生左呢件事，CK尋晚傻到走去摷返MBA時讀過既書，睇下會唔會有一兩個Chapter係教人點管理下屬既良心。咁唔到，都唔駛我講啦。公平咁諗，換轉係我，當面前有一份人工高前途好既工作，我諗我都可能一樣會咁做。或者佢響接受呢一份新工作既時候，都曾經有過掙紮，因為我相信佢即刻辭工呢個action，係會另CK同其他同事有幾多麻煩，只不過，機會在自己眼前不可失，要把握到呢個機會，有時係要犧牲一d人。

今日CK平靜左落黎，你問CK怪唔怪呢個同事呢…第一，怪都無謂，反正已成事實。生意佬最現實，冇商業利益既，唔會鬥呢d咁既氣。第二呢，唉，人望高處，天公地道。CK既短期情緒可能受影響，不過，諗深一層，afterall如果換轉我係佢，如果個機會真係咁好，我都難保我唔會咁做。即使我覺得對唔住d同事同老細都好啦。我一個人走左，佢地最多煩幾個月，唔死得既。但係如果我miss左呢個chance，可能影響一生既際遇，咁樣我輸唔起。

諗到呢度，唉，算啦。咁耐賓主關係，唔多唔少有d好似friend咁，冇理由要你一世屈響我呢間公司仔度架。你有好路數，去啦。

早排曾經睇過有網友講，有d老細太天真，覺得自己對伙計公平，咁就以為伙計都會對返自己公平。我可能都係呢種人，只係活響自己幻想既世界裡面，現實可能並唔係咁。不過，當每個人都認為，即使自己對人公平，人地都唔會用同樣既尺度對返你時，於是個個都要對人衰d去「保障」自己既時候，呢個會係咩世界先？我情願活返響自己既幻想世界度算囉。

我，聽日走。

「聽日走？唔係掛」CK心諗，家下真係咩世界。

「我會補足錢俾你既。」挑！呢句仲hurt，加下有錢大L晒咩。

「多謝你過去一年既教導。我響呢度其實做得好開心，不過今次，真係逼於無奈。Sorry呀CK。祝你生意興隆。後會有期。」唉，作為老細，仲可以點？

同事屋企出左急事，要即刻辭工去處理。於是朝早同CK遞信，補埋水俾我(冇睇錯，係伙計補水俾我)，然之後返去個位度執野走。呢個世界，有時真係…頂。

According to 果張so called 既僱員合約，同事炒CK魷魚，要俾起碼30日通知。理論上，除非相方協商好，例如可以扣假早走或其他方法提早離職，otherwise，炒我魷果位同事，係有責任返埋果一個月工既。即使佢肯補錢，都要個僱主肯接受，你先真係可以早走。當然，合約既野，用黎嚇人既多，真係行駛既少。各位打工仔，當佢要走既時候，多數都唔多會理究竟張合約寫左d咩上去。我都唔撈啦，你都唔再係我老細，你吹得我脹咩？好多野，你理得我丫。唔鍾意既，告我丫笨！

同事先斬後奏，去意以決一定要聽日離職，呢個係冇得改變既事實，除非，你響呢個時間用張contract黎留難呢位個心都經已唔響度既伙計啦，或者可以逼佢留多一陣間。浪費時間去同一個去意已決既staff鬥氣，唔合乎經濟原則，所以CK絕對冇打算咁做。不過CK既難題係，之後究竟點同其他同事交待。我唔想比一個假像大家，等大家以為，辭工既時候，CK係會輕易隨便批准大家話走就走，唔需要30日通知都冇問題。要deliver呢個message俾大家聽，可以考慮既係將成件事送交法庭仲裁，即係告呢個同事。咁告佢，值唔值得先？如果咁樣去deliver呢個message比其他同事，最大既side effect係，同事們會覺得CK係個冇咩血性既老闆，人地屋企有大鑊，你仲要踩多人一腳，你仲係咪人黎架？二來，同事既屋企真係有事嘛，你要CK為左殺一儆百，走去告呢個以經夠唔好彩既同事，問心，我都做唔出。

你係咪諗緊：「CK，你太天真遮。呢情況，分明就係你個同事到份新工，人工高待遇好，新工果邊要佢即時返工，所以咪作個大話耍你囉！咁你都信，正死蠢！」

係呀，我信架。我係天真同死蠢喎，同事話晒響度做果陣表現紀律都唔錯，我唔到證據去證明佢講大話喎。according to 我地既legal system，舉證既責任響控方果邊，即係我呢邊啦，咁我冇證冇據，我prefer唔用陰謀論去估佢呢個move啦。不過，afterall佢真實既理由係咪如佢所講咁都好，佢，聽日走已係鐵一般既事實。一個唔再需要你出糧既伙計，去意已決，作為老細唔會有可能留得住。

CK餘下落黎既工作，就係點同大家交待。聽朝一早，大家就會發覺唔見左個同事，老細冇得避，點都要俾個交待大家。

呢事，真影響心情。

*****

多謝晒各位響對上一篇既留言、讚賞同鼓勵。CK萬分感激，多謝晒！

我係一個Cheap Blogger

睇完歌德兄講Blogging呢篇覺得好睇過癮，搞到我又想講下。

講Blogging呢，呢度有好多人資歷深過我，咁我唔響度班門弄斧啦，我淨係講下自己啦。歌德話我都有小小限制自己既topic，呢樣野，我認架。原因有幾個既，第一，CK由朝到晚都對住自己盤生意，平時連電影都唔睇多套，係一個大悶棍，唔寫做生意同辦公室野，哈哈，我真係冇咩其他Topic。第二呢，你話係咪刻意想幫自己個Blog定位呢？又唔可以話完全唔係。咁講真，寫左一排，自己寫d咩Topic大家會比較有興趣，CK其實多多少少都心裡有數。咁如果你問我係唔係「市場主導」左呢？係架，呢樣我都認，我最唔鍾意扮清高。

寫Blog冇錢收，因應市場去limit自己既題材，有時自己都覺得有d無聊。當然，寫Blog所得返黎既滿足感，又唔係下下都可以用錢黎衡量。瀏覽人數對我緊唔緊要呢？都係果句，CK係一個滿身銅臭既生意佬，唔想扮清高。話俾你聽我寫野完全唔care有冇人睇你信唔信？我自己都唔信啦，完全唔care既，我連個counter都唔裝落去啦。有幾多人每日肯抽空睇下CK呢條茂李講既廢話，同我從Blog裡面得到幾多滿足感，幾乎有直接關係。不過容許小弟串些少講句，而家賤Blog都叫做有一班幾stable既讀者朋友，數字上黎講，講真，我覺得超額完成左囉。讀者人數如果再增加的話，CK當然開心，不過而家呢，反而Blog裡面既quality得到大家認同，讀者們睇完CK寫既野，覺得過癮滿足的話，果個滿足感反而比瀏覽人次既數字itself黎得滿足得多。我地呢d出黎賣藝既，最鍾意將自己既自大狂同滿足感，建築響讀者朋友既快樂之上。你地越過癮，咁我又越俾心機寫好d，用黎滿足自己既「表演慾」，我覺得呢個，都算係個良性既循環丫。

但係我呢個寫Blog既態度，哈哈，某程度上可能算係Cheap架啦。不過Cheap又如何呢？最緊要你過癮時我又happy，如果Cheap得黎仲要大家唔happy，個Blog，你寫埋我份啦。講時講，我又聽過有人話，好多人寫Blog想出名，搏出位。我寫Blog想唔想出名呢？拿，講真，假如真係有機會，我又唔介意俾"CK"出名喎。你希望多人睇同認同你講既野，然之後你又話自己唔想出名，自打咀巴左d掛…不過咁，我希望"CK"出名，但我又絕絕絕絕對唔想CK既真身出名喎。CK就係CK，真身就係真身，佢地兩個生存響兩個唔同既空間，冇咩必要，我都唔想佢地兩個有咩機會碰頭喎。呢個諗法，我由始至終都從冇改變過。

係咪好Cheap呢？再cheap d都仲得。大家有時間，留個言俾我啦。我呢款銅臭型既Blogger，滿足感除左來自每日有幾多人肯睇我個Blog之外，仲會來自有幾多人肯留message俾我。

當日，我升左Kelly

唔知點解，去原始森林放假既時候，CK好似條死屍咁攤響椰樹之下時，腦裡面突然之間閃過一段flashback。flashback既內容係，係幾年前原本係我manager既果位伙計，all of a sudden同我辭職。於是乎，我要響餘下既幾位同事裡面，選一個做呢個位。當日，我選擇左升Kelly。

講真，呢個位並唔好做。人工，well，係比其他同事多些少既。不過，工作量比一般同事多出一大截，而且要負責幫我管住班伙計，佢地做錯野，即使唔關個manager事，CK都一樣會入佢數。最唔alrite既factor係，呢個position同響工作上CK既關係比較close，當同事之中有其中一個同個老細特別close既時候，其他同事自自然然會同你變得越黎越疏離。工作之上，做一個天煞孤星畢竟唔係個個鍾意，做老闆既或者都可以話自己黎，但係打份工既呢？呢類人二分四既middle management，有時佢地既孤獨，都唔係個個打工仔會體諒。

大公司既middle management，佢地要面對向上頭交數交表現既壓力，仲有其他同grade既manager同你compete，你既management performance，可能直接影響自己既飯碗。基於呢d形形色色既壓力同指標，middle management有時即使個人本質其實都唔係太差，但飯碗尤關既時候，佢地都會無可奈何咁壓逼下佢地既下屬。人呢，尤其是響職場之上，唔多唔少都係自私既。你要你個manager，冒住自己飯碗不保既風險而對伙計「人道」一d，飯碗尤關，試問邊個肯制？

CK寫左呢個Blog一段日子，多謝大家抬舉小弟係一個有些少「人性」既老闆。CK同middle management唔同，上面冇任何交數既壓力。有時CK覺得，向上頭交數同交表現呢類咁既數字遊戲，必定有好多side effect。一切都以數字為本，長遠黎講，對公司既整體發展一定唔係最好，事關響數字以外既好多大小問題，都可能被數字本身所蒙敝。最簡單直接既，伙計既士氣，對management既怨恨就係一個好例子。作為老細，CK之所以可以「似番個人」，就係因為CK公司細，CK上面亦冇人俾壓力我。公司裡面大部份既野都仲可以掌握響自己手中，有d長遠既issue，我覺得even即使犧牲部份短線既收入，都要打好個根基。但係如果我只係一個middle management呢？長遠既，就等佢繼續長遠啦。上頭大大舊壓力壓落黎，總之今個月我條team包尾的話，下個月我分分鐘要執包袱。此時此刻，我都唔敢講，我係咪一定可以好似而家一樣咁「人道」啦。我唔食，老婆仔女都要食掛。

講到尾，係因為CK公司仲細。假如公司有幸發大，老闆唔係公司每一個環節都能睇得咁真既時候，就只可以靠一d制度同指標去管伙計。制度同指標，某程度上係死既，唔識自動customize同體諒人，但係當你真係再冇能力睇晒成盤生意既full picture時，你根本冇得選擇。

我都好希望公司會不段長大，而又不失人情味。今日既Kelly，唔需要向CK交數交表現，佢扮演既角色，係一個輔助CK管理下屬同作為CK與同事們之間既橋樑。所以佢唔需要太過逼伙計提升佢地既表現。可能因為咁，佢同其他同事仍能保持相當唔錯既關係。講真，我認識既Kelly，其實心地同人品都唔差，之不過，假如有一日CK公司真係發大左，佢都被逼要成為公司制度之下既一隻棋子時，即使有好既心地同好既人品，佢係咪一樣會變成打工仔口中既乞人憎上司？又或者係唔知穿d咩既惡魔？

四舊水(一) (轉載)

轉載自12月11日 am730

「做咩Carol同Sharon今日好似面左左咁嘅？平時佢哋好好姊妹㗎喎…」我靜雞雞拉了Kelly入pantry問。「唉，唔知做乜，今朝大家無聊講起人工問題，Sharon發現Carol雖然同佢同grade，而且入職比自己遲，但係佢份糧反而多佢四嚿水，咪唔高興囉。」Kelly刻意放輕聲線，害怕被當事人聽到。

Carol比Sharon遲約半年入職，其實她們兩人的條件相若，只是她們入職相隔的半年，香港經濟好轉，半年前用來請Sharon的人工，半年之後已經請不到條件相若的人。面對香港求職市場轉變之快，有時做老闆的，也感到很無奈。

各人的薪酬，對老闆來說是一個不可向外公布的「商業秘密」。薪酬之所以是秘密，就是因為各員工的薪金，因為不同原因而會有所不同。而這些原因，往往又不是員工所想般簡單。講到尾，做老闆的要盡力守住這些所謂「秘密」，就是怕有好像是Carol和Sharon今天所發生的事情，胡亂去猜度，為甚麼老細會特別厚待那些人工較高的同事。不過坦白講，不論老細千叮囑萬叮囑同事要將各自薪酬保密又如何？當同事們一熟絡了，甚麼秘密也守不住啦。「老細，順便提你一句。」Kelly鬼鬼祟祟的對我說：「Carol人工高過Sharon，出面班同事個個都話因為你鹹濕，偏心佢靚女呀，你自己好自為之啦。」

等雞啼

CK同Stephy既原始森林旅程呢，唉，話咁快就完啦。聽朝晨咁早就要搭早機返香港。起身之早，仲早個返工多多聲。為左唔好令自己遲到miss左班機，特登叫酒店工作人員擺左隻公雞響我酒店房間既門口，等聽朝一日出既時候，CK同Stephy就可以聽到雞啼而彈起身。講明係原始森林嘛，係咁落後架啦。

講真，CK不嬲係悶人一個，以前從來都唔係好熱衷去旅行。呢樣野呢，係同阿Stephy拍左拖之後先有改變。老婆就同CK剛剛相反，鍾意跳跳紮咁周圍explore下呢個世界。不過自從Stephy十幾年前開始「帶住」CK周圍去之後，CK對旅行既睇法又開始有改變。你問我去旅行為左咩呢？去Sight seeing去Shopping抑或去休息？對我黎講通通唔係。Sight Seeing我每晚都睇Discovery Travel and Living Channel，我呢d咁悶既人，一個景我響LCD電視度睇我覺得分分鍾比我去睇現場實景仲開心。Shopping呢？傻啦，男人老狗有咩好Shop呀。極其量你可以話我可以乘機休息下，不過以CK呢個永遠放唔低盤生意既性格，出差三寶(Laptop、電話、Blackberry)永遠帶住響身，個肉身都或者真係休息到既，個腦呢，只可以盡力而為囉。

去旅行對我黎講，最珍貴既地方，我覺得反而係同至親既人相處既時間。響香港，每日有規律既工作，生活既節奏某程度上係不斷受到干擾，同身邊人好好相處既時間，好多時係相當「分心」。好多身邊人同自己講既說話，自己都唔可以百份百集中精神去聽同去感受，反而當你人在旅途呢，你對身邊至親既人既注意力，會比一般時間大好多。或者呢樣只係CK自己既問題，不過旅行呢樣野，呢幾年反而對我意義越黎越大。總之呢，去旅行去邊都冇咩所謂，反而同行既同伴，先至係精結所在。

所以呢，如果叫我一條友自己去旅行，真係咪搞。

By the way，渣老闆，如果你覺得你連旅行都唔想去既時候，我諗你真係時候要返個寢邊人啦。
****************************************************************************

P.S. Stephy交帶我要響度講兩句有關本《迷失中環》喎。Stephy話呢，呢本野原來真係好薄，d字又雞lar咁大隻，以佢平時睇本壹仔都要大半個星期既速度，佢都居然響短短三日既旅程裡面睇完本書…所以呢本書係最適合佢呢類睇書睇得咁慢既人睇。

本書雖然真係幾過癮，不過唔知點解，我突然之間諗起果d衛生巾既廣告slogan：真係好似紙咁薄…

講多句：post多張相俾大家feel下呢度每日都響度「等運到」既氣氛啦…等……………運…………到。

feel到冇？

週末齋UP

呢個世界既科技發展真係實在太厲害啦。大家見到CK呢段文字既時候，CK已經同Stephy去左一個渺無人煙，風景如畫，人傑地靈既一個世外桃源度放緊假。響呢個四面都好似係原始森林既地方裡面，居然仲收到好強勁既Wi-Fi無線上網既訊號，你話科技真係幾咁偉大呢。

講時講，真係好耐冇好好咁放下假啦。好多人以為做老闆，返工時間好flexible，想訓耐d咩？咪遲d起身返工囉。做到悶悶地咩？咪自己放自己假囉。嘿！諗下好啦。一日裡面想放早少少遲返少少，呢個flexible或者都係有既，但係想離開香港幾日走去放下假呢？做老闆其實真係唔容易到呢d機會架。尤其係中小企，公司有太多野可能要直接個老細做決定，總之，即使坐響度咩都唔做都好，老闆既No. 1責任，就係要無時無刻俾人到你。(你睇CK今日去呢個世外桃源都帶埋個Laptop黎就知…)到你都未必夠喎有時，必要時仲要你即刻現身添。咁既condition，老闆點樣可以隨便放心走去放假？CK都仲算好彩，有個信得過既好拍檔，大家Take Turn放下假都仲有對方可以頂住，如果冇partner的話，真係唔知幾時先有得抖下。

不過咁，家陣每次放假呢，感覺上都有多少內疚。唉，拍檔，呢幾日，辛苦晒啦。

又講時講，我黎到呢個世外桃源，發覺居然上到網之後，第一件事唔係去ckeck公司既email喎，而係走去睇下阿渣兄今日有咩講。哈，一睇即刻嚇親，寫Blog寫到俾人調戲，渣老闆你都算係第一個啦。話時話，渣大哥你同網友呢一次交流，都算係Web 2.0既最佳演譯。

寫到肚餓添，係時候出去海邊打番條魚返黎食下啦。

放假，真係太太太太太太太太太太太太太太太太太太太太太太太過癮啦。

*************************************************************

圖：呢度就係CK同Stephy而家身處既地方啦…

飯局 (轉載)

轉載自12月8日 am730

朋友都說「志雲飯局」好看，看著人食飯的觀眾固然開心，未知被人望著吃飯人感覺如何。中國人很喜歡在飯桌上解決問題。CK既是生意佬，又是中國人，那麼要應付的飯局當然比較多。不過CK對飯局這回事，卻又是怕得要死。
曾幾何時，一般人對生意佬的印象都是油腔滑調，雖不至學貫中西但總
是任何題目都可以「大吹大擂」一番。交際手腕了得加上的氣勢逼人。這些Qualities，一個有經驗的生意佬，最懂得在飯局當中展現出來，氣勢之盛直教人透不過氣。CK雖然也是生意佬，但CK口才既不了得，而且才疏學淺，加上自己那副長極不大的中學生尊容，飯局之中，甚麼氣勢也輸清光。\n\n千萬不要小看這些飯局，飯局裡面那些看似不著邊際的話題，一個有級數的生意佬，往往有能力一個U-Turn將那些原以為無關痛癢的話題串連到重要的談判事項當中。你假如之前稍為精神恍惚，不慎說錯了話，這一句當你含著鮑魚在口中時所說的錯話，往往就會成為人家和你往後談判的重要籌碼。飯局跟在會議室內開會不同。飯局的表面似是輕鬆，其實內裡大家還是不斷較勁，嘗試揣摩對手底線和有多少斤両。CK是個番書仔，在一台滿桌都是鮑參翅肚的飯局當中，幾乎每一次都是輸家。不要忘記，飯局令你戰意鬆懈的地方，除了那些珍羞百味外，還有你對手不斷敬你的那壺孖蒸。談判，還是在會議室裡比較好。

員工派對(下) (轉載)

轉載自12月7日 am730

CK自問是個和同事們相處得不錯的老細，坦白講，同事們也樂意讓CK參與她們的活動。為了讓大家玩得開心，CK絕不會在那些場合談丁點兒公事。加上公司聯誼活動，有老細在場，到散場埋單時，大家必定旨意老細包底。有得食有得玩再加母須付帳，CK當然人見人愛。做得老細，這些錢早知是不可慳的。反正出些少錢讓各同事感情好一些，CK覺得這樣對公司運作也有利。這些錢CK絕不介意付。不過近來，CK越來越對這些員工派對避之則吉。

也許是after office hour，大家都放鬆心情。一些平時在辦公室，同事們都會避而不談的敏感話題，在這些員工派對之上，她們都不避嫌的高談闊論。尤其是兩杯啤酒到肚，情況更是嚴重。最常見她們會問CK：「老細，我人工那麼低，下個月會否加人工呀？」又或者：「Sharon和我，你準備升誰做manager呀？」現在正值年尾，我敢打賭，她們兩杯到肚之後，肯定會追問我年終花紅會出多少。以前CK經驗淺，參與她們的派對時，也會跟她們喝一兩杯酒。酒精影響意志，最怕自己受酒精影響，胡亂答應了她們的升職加薪要求。

現在CK學精了，出席這些場合時例必滴酒不沾，並且全程高度戒備，慎防答了不應答的問題。但如此戒備狀態，出來玩，又何樂趣之有？

墨攻

最近聽到一個咁既故仔。

朋友本來讀飽書，有自己既生意，都run得唔差既。有一日，佢屋企檔家族生意唔多掂，千蒼百孔，再係咁落去，隨時關門大吉。朋友既幾位兄弟，見盤生意似乎冇咩希望，所以對佢既運作同管理都了無興趣，無心戀戰，反正唔係等佢開飯，索性等佢自然死亡算數啦。於是，家族裡面既人，見咁樣唔係辦法，與其等死不如搏一搏啦，就提議朋友返去主持大局，希望保得住日漸衰落既生意。

呢檔家族生意，話晒係養活左朋友多年，對朋友黎講多少有情意結。朋友於是放低左自己既生意，全職返去幫手救亡。朋友既幾位兄弟，因為對生意冇咩興趣，難得屋企有人肯返去做自己唔鐘意做既野，當然開心。於是答應佢公司裡面所有既決策，全權交俾朋友負責。朋友響公司，由於相對黎講只係後生仔一名，話就話讀飽書，不過行業經驗欠奉，所以起初管理同埋執行改革既時候，都俾好多公司裡面既叔父輩Challenge，遇到唔少阻力，不過日子耐左，大家開始見到朋友既改革，真係有料到，為危在旦夕既家族生意帶黎一線生機，大家先肯聽佢支笛。

故仔講到呢度，大家都或者估到之後既發展啦，係咪？

公司開始有起息，本來對呢盤生意一興趣都冇既兄弟，開始重拾佢地對家族生意既參與。佢地突然既參與，亦為朋友本來正在推行既改革帶黎好多不便。公司裡面既人雖然普遍企響朋友果面，但係忽然面對多幾個「太子爺」，大家都有不知所惜。幾位兄弟們對朋友既決定，亦開始百般阻撓。all of a sudden，大家都好似視呢檔本來經以被放棄既生意為一盤千秋霸業，要響呢盤生意之上，幹一番事業。此情此刻，朋友唯有每天死撐，同幾位兄弟開晒片，希望改革可以繼續…至少繼續到盤生意脫離危險期，上返正軌先算。

CK一邊飲住啤酒，一邊聽朋友講佢既故事。唔知點解，突然諗起《墨攻》呢套戲。革離幫梁王守城之後，梁王不甘革離民望高企，於是對革離恩將愁報。當日早已無心戀戰，準備投降的梁王，當成攻守城之後，突然又對政事事事關心。呢情節，現實生活裡面，原來響你我身邊，周不時都會發生。畢竟人性有太多醜惡面，幾千年黎，人可能某程度上係學精左，當展現醜惡既時候，懂得多加修飾。不過人性醜惡既根呢，其實始終冇變。古時抑或現在，如出一徹。

CK同朋友講既，都係引返戲裡面劉華講過既野，做人，豈可盡如人意？

既然決定左返去處理家族生意，盡力做啦朋友。好多時候，洗濕個頭之後，做人其實冇咩退路。好運。

********************************************************************

今個weekend CK同Stephy去旅行呀(終於可以去玩下…)，會小休幾天，下禮拜先返。公司有大project如箭在弦，一定要叉足電先可以返黎搏命。預祝大家有個愉快既週末，下禮拜見。

P.S. 燦兄，好耐冇見！幾時再update你個筆記呀？

最弱的10%

搞邊科and渣老闆，你地所講既公司強行換血制度，CK都略有所聞。你如果問我會唔會跟呢，即使CK間公司發展成為大機構，我諗我都唔會follow。

唔係CK扮好人，不過用懲罰性既手段去谷表現，第一，我覺得有太多副作用。第二，對整體既業績黎講，冇咩大幫助。

你地講果種，不論好醜，總之最差果10%既Sales就冇得留低既管理方式，副作用太大啦。CK既愚見呢，一條sales team裡面，係一定要有競爭，但係競爭既方向呢，係應該提高自己既營業額。一般Sales因為live on quota，可以做到的話，佢地都願意加油既。不過當管理層apply左果個「冇得留低」既condition落去policy度既時候，Sales Team裡面既人即時多左一個玩法：我即使唔係至醒果個，我都唔可以做至唔掂果班。不過，要自己成為唔係最唔掂果10%，除左正路既自己努力，多數返黎之外，仲有唔正路既方法，例如搞喎同事傾緊既deal咁。果唔正路既方法，可以係好破壞性，而且經常會分散同事對生意既集中力。總之，要唔死，隨左自己多之外，令到有人做唔到數，一樣OK。Sales做到數，好多時都需要大家有一合作。舉個例，呢個客你熟，但係我有technical knowedge又唔夠你熟喎，咁不如大家一齊跟呢個客，commission兩份分啦諸如此類。如果apply左呢個硬性換班條款之後，我即使知道埋你幫手可能有大chance去搞掂單deal，為左唔好益你，等你有更大機會代替我成為最差果10%，即使chance低，我都自己頂硬上算數啦。最後單deal衰左，損失最大既反而係公司。

Sales雖然長期響一個互相競爭既狀態，不過以前CK做Sales既經驗呢，大家為左生存，好多市場資訊呀、消息呀咁，Sales同Sales之間好多時都要互相交流下。我希望你死喎，我收到咩風都咪駛旨意我話你聽啦。其實呢情況，響一自私既Sales身上以經成日發生，假如真係有硬性換班既制度，呢類情況，可能會更嚴重。到時各位Sales同事收到既資訊少左，乜都係只可靠自己既時候，成條team既競爭力，齊齊被削弱，最開心既，可能係行家。

第二呢，假設大家真係好正路咁，為左唔想做最差果10%既Sales，都俾心機好努力咁…我其實有咁樣既睇法。一條Sales Team，最掂同最唔掂既Sales，成績其實一般都差幾遠。呢條硬性換班既policy，affect到既，一定係最低果批。佢地即使努力唔想做最差果個，真係俾佢多左生意返黎力保唔駛炒，由於佢地係屬於下游份子，即使多左，成間公司黎計，都唔係賺多好多。能力所限，佢地為左唔俾人炒，咩單都照簽既時候，果單分分鐘係豬頭骨，賺埋唔夠蝕。而且呢，呢覺得有危機被炒既Sales，到咁上下時候，因為壓力太大，同覺得時不與我，好多時積埋好多怨氣。怨氣既野呢，會傳染既，搞下搞下，連公司裡面唔係Sales既同事既士氣都分分鐘被打擊埋。afterall，公司既potential得益咁少，但係有咁多possible既副作用，CK就覺得唔多值得囉。

Overall黎講，Sales Team裡面既Sales，雖然互相響度競爭，不過，Sales Team之所以叫做Team，即是話，大家其實都仲係有好多明顯同唔明顯既機會，需要一齊合作既。感覺上，好似一齊打仗咁，雖然到最後，各將士會論功行賞，不過，冇理由大家響同—隊軍隊裡面，你會想你既戰友快陣亡掛。小弟覺得呢，呢硬性換班既方法，表面睇，好似好work，好逼到人做野咁，其實，佢地以經不知不覺咁將自己既staff既眼光縮窄。大家見到既敵人，只係見到同自己坐埋同一個Office果班友，唔記得左，真正既敵人，唔係坐響自己附近架。果對你間公司既market share虎視眈眈既行家同competitors，先至真正係你要打敗既對手。

員工派對(上) (轉載)

轉載自12月6日 am730

「今個禮拜五，九點半，皇室堡加州紅等OK?」Kelly提醒我要準時出席員工派對。「真係要我去？」我其實萬般不願意參與其中。「係呀，Carol失戀嘛，當出來陪一下同事啦！大家都想聽你唱番隻側田呀。」Kelly陰陰咀笑，似乎同事們都在等待看我唱歌出醜的樣子。CK本來並不介意參與同事們搞的活動，反正CK認為，都after office hour了。我的老闆身份也應暫時放低一下，當是大家朋友出來玩玩，聯絡一下感情其實也不壞。不過以前CK還是打工仔時，同事們都很怕老闆參加大家的活動。CK以前其實很難明白，Office Hour都已過了，大家一起出來玩，為何那些老闆還是放不下身段，硬要擺出老細款。派對途中，一些無關痛癢的談話內容，那些老闆總可以將它們relate到工作之上，一個不留神讓老闆捉住那個可以借題發揮的話題，整晚的活動就泡湯了。一個本來輕輕鬆鬆的員工歡樂派對，變成了一個沉悶不堪的公事會議。最令人氣結的是，這個after office hour的會議，大家是沒有OT錢收的。

正因這些痛苦經驗，當CK也做了老闆時，誓神劈願的跟自己說：假如有天同事們真的叫我參加他們的派對，我打死也不會像那些擺款的老闆般，將一個本來是歡樂的派對摧毀。不過這個世界發生的事，又豈可盡如人意？明天再講

由少男變做中男

CK今日響公司悶悶地，於是上網走去search下我既favourite明星鄧麗欣既wallpaper。Search下Search下，番佢初出道，仲係九餅年代既相。女大，原來真係十八變。幾年遮，一個小妹妹就可以銳變成今日亭亭玉立既萬人迷，都咪話唔厲害。

CK又睇下自己，由少男進化成為「中男」，個樣不單只冇十八變，簡直係原全冇老過，同15歲果陳一模一樣。再係咁落去，我諗當我大吉利事瓜柴既時候，大概要俾人捉去解剖，睇下我既DNA係咪有咩唔妥。

樣冇變，心境反而變得厲害。由少男變成中男，變得最多既，CK覺得係自己對自己既要求，相比少男年代，由待人接物到工作態度，變左做中男既CK，要求都全面提升。好多野，做少男果陣可能會得過且過既，因為自己年紀細唔懂事而可以原諒自己既，而家都唔可以接受。始終，覺得自己有番咁上下工作同做人經驗，水平，冇道理再停留響少男階段。年紀大左最應該學識既係「承擔」，好多責任，做男人冇得逃避。

CK識得個朋友，同CK差唔多年紀，硬係就係唔知點解，好似唔願長大咁，對自己既要求非常寬鬆。工作做得好唔好，都仲可以賴際遇唔理想，但係如果自身既都做得唔好，應該負既責任都唔去負，咁我又覺得真係唔係好掂喎。人到中年，有好Q多責任等住你，老婆對你既依靠，年紀大左既父母需要你既照顧，仲有你既仔女等等等等。去到呢個年紀，一事無成之餘還要每日將個頭放入沙堆裡面，唔敢面對對自己應該負既責任，遇到有問題既時侯就只會日怨夜怨賴地硬，害苦晒身邊既家人、朋友。講到尾唔係你當自己係少男，甚至細路，自己想唔長大就真係唔駛長大。大佬，三十歲人啦，你仲想避到幾時？生性啦好嗎…

*********************************************************************

想講下《迷失中環》好幾日啦。

CK以前一向有睇方卓如既專欄，有多少情意結。見到佢出書，梗係貴一貴都買啦。不過，同好多網友既感覺一樣，真係覺得幾呃錢。佢本書薄成咁，CK用左三次大便既時間就將佢睇完啦。CK之前買阿Stephy本《不要忘記》，雖然一樣覺得呃錢，不過起碼有大量我鍾意既靚相，俾人呃條氣都順。

CK睇《迷失中環》呢，其實唔多唔少有親切感。自己每日都響呢個地方度行黎行去，多少都感受到阿方生筆下所講呢個地方既高貴同活力。係呀，我係用「高貴」同「活力」黎形容中環。講真，一個有吸引力既中環畫面，並唔係單靠有幾棟好似IFC咁既靚仔甲級商廈就可以構成既。呢個畫面最吸引既地方，在於佢有無數香港精英，聚集響呢一區裡面。感覺，就好似一個精英既俱樂部咁。細細個既時候，CK對中環呢區既仰慕，除左覺得響呢度返工好型之外，仲有一個感覺，就係響得呢度返工，你，都應該係一個精英份子。

呢幾年CK同人講，自己既寫字樓搬左去中環，朋友個個都報以羨慕既眼光(當然係講果唔響中環返工既朋友)。我亦聽過唔少剛畢業既朋友講，話希望自己到份響中環返工既工作。我有時響度諗，點解大家咁鍾意中環呢個地方呢？屬粹係因為呢個地方夠High夠型，食飯夠貴鬼佬夠多？抑或仲有其他原因？之前CK響730寫過一篇文，講有個朋友既寫字樓由中環搬左去觀塘，感覺幾咁唔願意。但係我問佢究竟中環有咩咁好時，佢又居然答唔出喎。我有時響度諗，假如，你喜歡中環只係因為佢地方高級同有型，咁我又覺得，因為咁鍾意呢個地方，好似冇咩意義喎。但係，如果你對呢個地方既鍾愛，係希望自己都成為呢個「精英俱樂部」既一份子，反而呢個動機，可能會變成一個令你努力工作既動力都未定。

不過現實之中，中環雖然真係有好多精英響度，查實，都一樣有好多平凡人。你睇連CK都響中環返工就知。

方生筆下既中環人，個個著靚衫有型有格咁穿梭於各大名店甲級商廈，食飯日日都係響高級餐廳裡面。我只想講句，雖然CK都算係個中環人，我每日下午餐飯，都係響翠華搞掂，真係好鬼冇型冇款。《迷失中環》裡面果高級情節，我諗，我真係高攀唔到。

伙計拍拖了(下) (轉載)

轉載自12月5日 am730

伙計因拍拖太甜蜜而影響工作，CK尚且可以接受。有些同事，拍拖蜜月期過後，情海翻波。情場失意心情欠佳，這個CK理解，不過，請緊記那個負心男人不是CK呀！你的脾氣，請發在那個負心人身上！公司是工作的地方，CK雖明白你受了莫大委屈，不過你在辦公室裡一天有三幾次以淚洗面，既影響你的工作效率，就連其他同事的情緒也受影響。CK見你情緒不穩，工作都不敢交託給你。在這失意的日子裡，你的工作效率接近「零」，CK唯有扮好人，讓你早兩小時下班，免得其他同事還要分神照顧一個情緒失控的拍檔。不過令CK心有不甘的，除了無謂地讓你早退之外，你這個「零效率」的工作天，CK還是要出足糧給你。

CK試過最經典一次，一個樣子甜美的伙計，周旋於兩個男孩子之間。伙計為這段三角關係，經常情緒低落，病假頻頻。有天CK行出公司Reception，看見兩個素未謀面的青年口角。原來這兩個人，正是這段三角關係的主人翁。他們到CK公司，當然就是要找我那位伙計了斷。不過CK的辦公室，又豈容他們賴死不走？不過他們上得來，已有非將事情解決不可的決心，又豈是CK三言兩語可以勸開？

故事的結局，終於要勞煩差人幫忙擺平。那位夾在中間的伙計，可能覺得事情讓她蒙羞，不久後也請辭。本來一個得力的好伙計，居然因為這些事而離CK而去，CK也唯有嘆一句：問世間，情為何物……

仲有冇理想

我最近耐不時都問下自己呢個問題。幾年前，我既答案好肯定係有。而家，我都唔知。我諗，仲有掛。

咁你地呢？

CK記得自己讀中學果陣，有一晚同一個老友，走左上山頂睇夜景。望住山下面繁華既香港全景，好似大地在我腳下咁，於是CK好鬼豪情壯語咁講：「到我大個果陣，我一定會響度創一番事業，出人頭地！」

只可惜當年既雄心壯志，冇幾耐就唔多記得左囉。到最後唔係因為打工打到一敗塗地，逼住出黎做生意，可能自己都唔記得左，原來細細個果時曾經都有過呢個創業既志願。幾年前創業果陣，我既理想係：我要有一個成功既事業。至於成功既definition係d咩，我又真係冇認真諗過喎。好啦，幾年過左，CK睇返自己過去幾年既成績，問心講，算係超額完成左啦。不過，一d成功既感覺都冇喎。咁距離自己既理想仲有幾遠？我真係唔知。

中環呢，係一個紙醉金迷既地方。你響呢度返工，每日見到呢度既年青才俊達官貴人響度爭名逐利，你又同用我比一比，我又同你鬥一鬥。咩先叫做成功，咩先叫做理想達到，對CK黎講已經不知幾咁模糊。成功點衡量？用你每個月賺幾錢？用你間公司有幾多資產？還是你手下有幾多個staff？CK每逢面對一d生意上既重大而又有風險決定，呢類咁既問題總會響自己個腦裡面纏繞不休。或者呢個係生意佬既「自我保護係統」，響你處於生意上既十字路口時，好多同人生價值觀扯上關係既問題，就會響呢個時候重現於你既腦袋裡面，提醒你要三思，先好做決定。

咁究竟，理想，我仲有冇呢？

我覺得我係有既，不過出黎工作越耐，每日營營役役，理想既真面目係點，變得開始有d模糊。到而家呢個階段，有時只會覺得，自己seems to be向住理想果個方向衝呀衝，至於我既理想exactly locate響邊，我已經講唔出。

又或者咁講，人之所以覺得理想既位置同真貌變得越黎越模糊既原因，可能係因為隨住年紀同閱歷既不斷增長，理想既面貌亦都不斷改變。只不過，社會對人既所謂「理想」，點先叫做長進，點先叫做有志氣等等，都有一套俗世既標準。年紀大左，鬥志弱左，你既理想可能已經「退化」到一個唔再俾人認為「有志氣」既面貌，只不過自己依然未能夠察覺得到。理智同內心所認識既「理想」，響面貌同位置上有所出入，於是令到感覺變得好模糊。

真係越黎越攪唔清。

或者，作為—個已婚既老襯，「理想」既正確位置，應該由事業之上shift過去家庭方面了。

伙計拍拖了(上) (轉載)

轉載自12月4日 am730

「Carol成朝黑口黑面咁，搞咩呀？」我問剛剛在Pantry沖咖啡的Kelly。「噚晚佢同男朋友鬧交嘛…」 Kelly沒好氣的回答說。

「乜連Carol都拍拖咩？？ Oh No…」我心裡暗叫。CK公司幾乎是清一色女職員。同事們初到 CK公司上班時，見到那清一色全女班的陣容，幾乎個個都向CK complain，說公司陰盛陽衰，長此下去影響她們終身幸福云云。未知是否CK這個中環寫字樓旺桃花，同事們來到CK公司上班後，單身的都陸陸續續遇上蜜運。看著這班蜜運中的同事，CK 心諗，未來幾年的結婚人情的開支，應該也不會少得到那裡去。作為老細，當然無權管束下屬的私生活。但問心講，我看見她們一個一個拍拖，其實CK的心卻挺不安的。你說CK偏見也好，刻薄也好，我總覺得單身的同事是比較集中精神工作。拍拖對工作沒有影響，CK打死也不會認同。舉個曾在 CK公司發生的例子：某同事本來是單身的，工作認真，紀律又好。不久前她開始拍拖，起初還沒有甚麼，可是日子久了，同事的病假變得愈來愈頻密。拍拖不是令人身心愉快嗎？心情好，身體也應該好吧！偏偏情況剛剛相反。根據這位同事親自的口述，剛拍拖的男女，如膠似漆，每天有講不完的話題。於是乎，每晚夜深，例必挑燈夜煲電話粥至凌晨時分。日子久了，睡眠時間嚴重不足，身子自然變得體弱多病。

拍拖真的不會影響工作？不要講笑啦。

你老細教識你乜野？

大家覺得你地可唔可以響老細身上學到野呢？抑或覺得你老細冇乜料到，教唔到你野，令你白白浪費左你既光陰？

當年CK剛剛出黎做野既時候，都曾經有過呢個frustration，覺得個老細唔係好掂，跟住佢，冇野學到，浪費青春。要跟到一個有料到既老細，可遇不可求。一個唔好彩，你跟著個好似CK咁既冇料老細，都咪話唔濕滯。不過跟住一個冇料既老細，係咪就一定學唔到野呢？睇你點睇啦。

每個人對學習既敏感度都唔同。有d人學野，要用好直接既方法，例如走去上堂，要有個導師講到明話教緊你野，你先覺得可以接收得到。有d人唔需要咁直接，佢地有模彷同思考既能力，只要佢地附近有一個有能力既mentor，佢地一樣可以學到野。不過，要有一個有能力既mentor響自己附近，要講運氣，下下都要靠一個強人響身邊先可以提升自己，似乎被動左些少啦喎。

有關「學野」呢，CK有咁樣既睇法：一個對學習敏感度高既人呢，其實對任何響身邊發生既事，都可以轉化成學野既材料。要俾自己學到野呢，其實要經過好多思考既過程。你之所以覺得有一個有料到既老細響你身邊會容易學到野，係因為佢已經prove左係一個有料之人，佢既言行舉子做人處事方法，你都可以直接模仿。響呢個老細身上返黎既野，你覺得唔需要糾正太多就可以將佢既經驗納為己用。不過咁，面對叻既老細，將佢果套搬字過紙俾自己，係咪真係叫做學到野呢？CK其實好懷疑。

面對一d冇料到既老細，係咪就等於冇野學呢？佢之所以令你覺得佢冇料到，佢一定係做左一d唔妥既野，先至令你有咁既感覺。有因先有果，呢個過程，其實一樣係一個好好既反面教材。當然你既然覺得佢唔掂，佢既經驗當然唔可以搬字過紙咁俾自己用。但係經過思考呢，呢類反面教材可能令你學到更多野，因為要將呢類睇落好似唔多好既材料，轉化成為一d對自己有用既經驗，建立自己獨特既做事方法，係需要好多思考同customization。得罪講句，香港既教育習慣左填鴨式，所有教材都要用好直接既方法貫輸俾學生先可以吸收到。一個有料既老細，可以令自己容易學到野既原因，好大程度上係因為從佢身上學野，係一種比較直接既吸收方法，唔需要經過太多既思考同customization，腦袋亦唔需要做太多功夫去糾正從呢個mentor所吸收返黎既料。表面上似乎真係比較容易學到野咁，但好多時，學野既人會不自覺地依賴左呢個有料老細既判斷同價值觀，搬字過紙咁當成自己既values。反而缺少左對事情有足夠既思考。缺少左足夠思考過程既學習，真正學到既，反而可能仲少。

學野呢，CK覺得其實最緊要靠自己。學野最寶貴，最精彩既過程，其實發生響自己既腦袋入面。當一些其他人看似微不足既事，你見到之後都將佢放入自己既腦袋裡面分析一下前因後果，你會發覺你原來可以學到咁多野。呢個感覺，CK自己做生意之後既感受就更加深刻。你自己做老細，你上面都冇更高級既人俾你去模彷同學習既時候，唔通你既學野過程就要就此結束？將自己學野既敏感度調高一d，唔好俾個腦袋習慣懶惰，凡事都諗多兩步，學到既野，分分鐘比有個好勁既老細響你身邊更多。

公司裡的羊 (轉載)

轉載自12月1日 am730

故事發生在星期二的下午。「一個二個唔使做？做乜個個都停晒手？」CK看見伙計們都好像無心戀戰兼神情呆滯，於是將Kelly叫了入房，準備責難一番。

「大家炒股票都輸了錢嘛…今天跌了五百點呀老細。」Kelly老沒好氣的回答我。

「炒股票？大家幾時學識玩股票！」我當堂打了個突。CK這班伙計，平時連財經新聞也懶得望一眼，每朝那份《am730》也只會翻到後面看娛樂版和利時神婆的專欄，怎麼突然之間學人炒起股票來？」

「Sharon男朋友做股票行，上星期同事們一齊食晚飯，Sharon帶了男朋友來，他給了大家幾個號碼話必升的…」Kelly嘆氣道：「我已勸了同事們要量力而為，不要隨便相信那些所謂貼士啦。不過老細，你知你給我們份糧得雞碎咁多，有機會時，大家當然都想增加一些收入嘛…」

我透過房間的玻璃窗望出去，看見同事們都苦口苦面。似乎今次跌市對他們的打擊可真不小。常常聽人說，買股票不要用耳朵去買。大升市的時候個個人都自命股神，賺錢好像話咁易，不過單靠這些「股神」給你的所謂「貼士」去投資，不血本無歸才怪。

忽然間CK有個想法：雖然這樣想有點黑心，不過，下次當CK再聽見伙計們談及有關股票買賣時，大概都應視為出貨訊號了。