夢遊爆粗

「老公，你最近公司係咪好大壓力呀…」今朝CK同Stephy一齊返工果陣佢問我。

「都係咁上下啦…」我有d好奇：「做咩咁問？」

「你知唔知你尋晚成晚發開口夢響度講粗口呀…」Stephy嘆左一口氣說。

「哦？唔係掛…」我聽完都嚇左一嚇：「咁大鑊？」

見Stephy今朝好似冇咩精神咁，肯定我尋晚夢遊爆粗果陣爆得太大聲，嘈到佢冇覺好訓。

有時有d野，真係冇得呃。心情唔好，壓力大，儘管你有本事平時裝到幾咁平靜都好，到你訓著覺果陣，原來都會現形。老婆就更加唔駛旨意可以呃得過。我突然之間諗，我好彩平時冇滾冇包二拉遮，如果唔係，我呢個發開口夢既習慣，肯定會將d衰野，爆晒俾Stephy聽。

「我睇左你尋晚訓覺前寫果篇blog…」Stephy邊行邊講：「做人何必咁激咁勞氣呢？」

唉，又係，做咩咁勞氣呢？

唔少人話細個響你身上發生過既事，好多時會影響個人一生。CK睇返自己，都發覺好多細個時候既經歷，反映左響而家大個仔既CK身上。好多習慣呀、喜好呀、價值觀呀，當我認真去睇既時候，發覺原來好多時都有跡可尋。細個既experience，原來可以influence咁耐。好似講返我七歲打交果一單野咁，一直潛伏響我既意識度，不知不覺咁影響左CK二十幾年，諗落都咪話唔厲害。我諗，假如Stephy同我真係要生返個小朋友的話，到時CK真係要花多d時間俾佢，make sure佢細個既時候唔好有d太差、太唔健康既experience發生響佢身上，呢d小時候既經驗，原來真係可以影響一生。

「Sorry呀老婆…」我因為尋晚成晚嘈住佢有d內疚：「不過唔駛擔心呀老婆…我諗我發開口夢爆粗，應該唔係因為壓力大…」

查實尋晚，我寫完我篇blog文之後，周圍咁睇下各位網友既大作，臨訓前我最後睇左呢一篇…

我尋晚發左個夢。夢既內容大概係咁既：我響一間Gym既Change Room度換緊衫，我見到一個講唔咸唔淡廣東話既中年男人，著住件浴袍響我前面行過，幾好身材架佢。佢行到去塊大鏡前面，左照右照，睇得出佢對自己一身既肌肉線條，應該相當自豪。突然之間，佢單手響佢件浴袍裡面，抽出一個成枝機關槍咁大枝既風筒，跟住用佢結實到有d跨張既肌肉爆開左件浴袍，赤裸裸咁用個風筒起勢吹住佢自己既重要部位…

正當我心裡暗話：「搞乜d人咁鬼肉酸呀…」之際，點知佢突然拎轉頭對住我笑，用極度磁性既中年男人聲線，加半咸淡既廣東話同我講：「要唔要借個風筒俾你吹下？」

呢個舉動嚇都我即刻彈開幾尺，我望住佢果副混雜左吳彥袓同八兩金既尊容，加埋佢剛才果d不雅舉動，口裡面就不由自主咁向住呢個拎住枝大風筒既大舊佬，不停咁講粗口，不停咁講，不停咁講…

by the way，吳彥袓同八兩金，原來mix埋有d似曹查理。


「老婆，唔駛擔心，我尋晚發惡夢遮…」


*****

渣老闆：唔好介意，新年流流，講下笑jac。