愛得太遲

(短文版刊於3月5日 am730)

我記得，響番鬼佬地方讀書既時候，認識一d主要靠體力勞動搵食既朋友。裝修師父、汽車維修技師、搬運工人…

雖然每日做到身水身汗，但係佢地對自己做既工作怨言都唔大。CK亦敬重佢地，做到好多我唔識做既野，亦響生活既層面上，幫我解決到好多問題。響我既記憶裡面，呢d人響當地既社會，係得到尊重既。或者佢地收入，同好多白領、專業人仕係有一定差距，不過大家都接受社會係要有唔同階層既人組成，即使佢地搵錢少，但係，依然值得尊重。

響呢個香港地，我地將呢班人，統稱做低下階層。

搵得錢少，響中國人既眼中，係一宗罪。搵得錢少，未來外父外母會覺得自己個女唔應該嫁俾你呢個人，話之你對個女幾好，有幾咁愛佢啦。搵得錢少，你既家人會俾人睇唔起，有錢朋友見到你地去探佢，會以為你有心想搵佢著數，沾佢金糠。你搵得錢少，你老婆會俾人話佢一朵鮮花插響牛糞上，比人奚落。

香港呢個社會，太現實啦。一個人有幾多價值，已經完全同你有能力搵幾多錢畫上等號。其他個人自身既價值，一切都唔再重要。你有能力搵錢，即使你心地幾壞，人格幾差，你都係一個值得尊重既人。你搵唔到錢，話之你幾博學，人品幾好啦，你都係唔會受到尊重。

CK未做生意之前，仲係一個搵個銀刮沙都冇既爛鬼Sale屎仔果陣，好多唔同既地方，唔同既人都唔會對我有d咩尊重，直到而家做左老闆，生意算做過得去既時候，同樣既地方，同樣既人先會俾我感受到佢地會尊重下我CK呢一個人。當然，被尊重既感覺總比以前不被尊重時既感覺好，不過，你既尊重，我睇唔起。

我好想同佢地講，做Sales時既CK，同而家做老細果個CK，係同一個人。你今日尊重我，thank you啦，不過你尊重既，唔係我個人，而係我咭片上個title。

呢個就係香港，尊重兩個字，對呢度既人黎講，可能係太高深既一件事啦。

正如今日響報紙度寫，要賺錢，要餓自己唔死，要維持基本生活，其實好多人都有能力。只不過，當你有能力維持左基本生活之後，大家依然要為左賺取呢個社會對你同你家人既合理尊重，而不斷咁去搏命，日做夜做，犧牲私人時間，犧牲健康，犧牲跟家人朋友相處既時間。於是乎，做就左一個又一個愛得太遲既遺撼。

社會風氣使然，響呢一個香港，要愛得及時，某程度上其實係相當奢侈。