法律意見Please…

查實，有冇好心既法律專家，可以話俾我知，自從《人在中環》開扑之後，CK有冇犯過法呢？

拿，我話晒係屋企經濟支柱呀，萬一我無啦啦俾人拉左，屋企會好唔掂架。所以，如果我原來真係唔覺意犯左法既話，唔該快d提一提我。我今晚拿拿臨摺左呢個blog算數，毀屍滅跡，從此退出江湖唔再寫野算數喇。

我有兩個疑問。今次呢條友被人入罪，係因為佢響個討論區度post左條Link，Link左去d鹹相度丫嘛。咁我隔離條Sidebar，有一條Link係Link左去阿思哲兄既案內人隨筆果度。最近阿思哲兄成日話自己可能會案內人除褲，咁萬一今晚阿思哲兄真係飲大兩杯，post左一將案內人除褲既相片響佢個Blog度，咁，係咪即係話，法庭可以以《發佈淫褻物品》呢條罪入CK罪呢？拿拿拿，阿思哲兄，你講下話除褲好啦，唔好黎真呀，如果唔係，好多人會俾人拉呀。

互聯網上面既Link呢，據我既愚見同理解呢，係一個「引路」既作用，帶領網民由一個URL去另一個URL。情形套左落現實生活呢，就好似有人問路，我指條路去佢想去既目的地咁。(雖然好多時都係老點…)如果係咁，一條帶領你由newsgroup跳入鹹site既Link會觸犯法例，話佢《發佈》鹹野既話，咁我有第二個疑問喇。假設有一日CK同渣老闆行旺角，路過砵蘭街，CK口痕同渣老闆講：「喂，老渣，前面轉左上二樓有檔一樓一鳳幾好喎…」，跟住隔左兩日渣老闆就跟住CK既「指引」，自己一條友好奇上左去睇下(我要講明呀下，渣老闆只係去睇下咋喎，唔係幫襯呀下！我好肯定渣老闆唔係咁既人！)，咁同互聯網一樣，呢單仲係發生響現實世界添。咁，CK呢個「引領」渣老闆既做法，其實又係咪響法律上，已經犯左《經營黃色事業》既罪呢？

我呢，唔係想講呢條48歲既阿叔，post鹹相係岩既事，不過，我見識少，又唔多曉法律，所以有冇人可以解答到我既疑問？又或者話俾我聽，呢一次既檢控，佢既法律依據同基礎又係d乜野？

拜託。

*****

網上有個「保障網民權利」既簽名運動 。有冇興趣入去望下？

拿，唔好拉我呀，呢條Link，冇鹹野架。

又話時話，不如大家有時間都send個email去影視及娛樂事務管理處投訴下Google, Yahoo同Youtube丫？8條Link罰$5000，呢堆大機構，有咁多鹹Link，唔知會罰幾多呢？

你估係咪一視同仁丫拿？