拾年

三色台夜晚做「拾年」，我唔係集集有睇。不過講前農場餐廳老闆果集，我覺得感受特別深。只不過係十年，生意既起落，可以將你既人生捧上天，亦一樣可以將你打落谷底。

睇完，查實都有些少心寒。人地可以跌到咁低，自己又一樣係一介爛鬼生意佬，你一樣有機會跌返落黎，甚至，比佢跌得仲傷。

講時講，你地過去果十年，你地滿唔滿意呀？

諗返轉頭，對上果十年，我自己都覺得幾好丫。呢十年，我娶左個好老婆，創左業，碰過好多釘，又經歷過甜頭。好多野都試過，雖然好多目標都仲未達到，不過呢十年既人生，我覺得，都幾精彩丫。

Stephy成日同我講，當你行左入三字頭，你既黃金二十年(係，你冇睇錯，我係寫二十年，唔係十年。Stephy話黃金十年咁少，唔夠玩，要整夠佢廿年先過癮喎。)就開始啦。呢個年紀開始，係響一生人裡面，有能力做到最多既野，活得最精彩豐盛既時候，要好好把握。三字頭之後，好多人話煩惱多左好多，人又被迫要現實，逼住放棄好多理想。不過唔知點解，我總覺得，當你願意做個樂觀既人，三字頭之後，應該可以係好正既。

雖然我知以我老婆既性格，到我五十歲果陣，又會話五字頭之後係甚麼鑽石三十年呀，白金四十年呀，諸如此類，哈。

公事纏身，唔寫咁長啦。