按摩集團

新書上架，我心情緊張到不得了。於是響上架既第二日，我急不及待咁走訪左各大書局，暗地裡去視察一下本書既銷情。

行完一日之後，我雙腳感到極度酸痛。晚上十時許，我走左入去我每個禮拜都去果間腳底按摩，希望辛勞一日之後，我既一對腳板可以得到一點慰籍。

「18號響唔響度？」我問。

「響度響度…」坐響Reception果位姐姐連忙答道：「先生你入黎坐一坐先，我叫18號出黎。」

自從做生意之後，按摩已經成為我其中一樣最喜歡既消閒活動。不過我對揀腳底按摩院既要求好高，除左師傅手勢要好之外，環境同服務一樣咁重要。有d場，裝修同服務都是是但但，客人同客人之間既空間又唔夠。於是成班客人一齊坐響一個逼到爆既按摩大廳，加埋按摩師傅不停響客人所坐既梳化之間穿黎插去，兼且場內人聲鼎沸，感覺活像一個難民營。

我黎慣既呢一間就唔同啦，佢地好注重場內每一個細節，睇得出呢度既老闆，係落過好多心思去製造出一個令客人舒適既環境。佢地響場內既裝修，燈光既控製，音樂既類型，都讓客人有如置身六星級大酒店之中。而且每一張按摩梳化上，都有一部Personal TV。大概因為呢個場係走行政人員既路線，所以呢個場既老細，特登安裝左有線既財經頻道俾客人按腳既同時，可以收到最新既財經資訊。

場裡面既師傅，除左響按摩技術上受過嚴格既訓練之外，仲必須精通兩文三語，好讓佢地能夠同唔同國籍既客人溝通。我唔清楚呢班能操流利國、粵、英語既技師到底每個月收幾錢人工，不過從呢度員工所提供既服務水準，我敢肯定，呢度既管理層，絕對係一班有料之人。除左有觸覺可以捉得到客人既喜好，然後從一個又一個既細節著手之外，佢地對員工既培訓，服務質素既管理，實在強得令我佩服得五體投地。有咁高既管理質素，難怪短短六年間，有本事由只係得一間小舖響佐敦，迅速擴展到全國二十八個城市，超過六百間分店既規模。

我懶洋洋咁坐響梳化上面，雙腳浸響用名貴中藥泡製既溫水之中，聽住場內所播放既chill out純音樂，腦電波慢慢咁轉換到alpha波，身心不自覺地進入一個極度鬆馳既狀態。

「又見到你啦。」18號將我既一雙腳從溫水中拎起，細心咁抹乾，然之後塗上BB油，準備開始按摩工程：「嘩，你今日好似行左好多喎，小腿起晒根呀。」

「係呀，今日行完書局，隻腳好酸呀。哈哈，對腳一痛，就諗起黎搵你囉。」

聽罷，我同18號大家都笑左一笑，頓時覺得，世界都好似和諧左。

每次按摩我都揀18號既原因，除左佢手勢唔錯之外，多少因為佢其實幾靚。望真d，其實佢有些少似早排生左個仔既陳慧姍。

「咁你今日行書局…」18號一邊為我捽腳一邊說：「有冇買AM730新出版果本《人在中環》呀？」

「冇呀…」聽到18號咁問，我多少有d飄飄然，估唔到黎到做按摩，都會遇上我既讀者：「點解咁問？」

「冇，我尋晚有個做身既客，原來就係果本書既作者。」18號笑了笑：「哈，估唔到CK真人原來幾靚仔架，個屁股仲有幾分似吳彥祖添。佢好好人呀，仲幫我響本書度簽左個名。」

我心裡一沉，心諗，究竟邊條友仔咁大膽，走去扮我響骨場度招搖撞騙？

正當我心裡面仲諗緊到抵邊個響度冒認我既時候，裝響我梳化邊既personal TV忽然傳黎青姐胡孟青既聲音。

原來不知不覺，已經係晚上11點。財經台又重播Money Cafe。

「今日我地既節目好榮幸，請到一個一向都好低調既年輕創業家上黎…」青姐率先開腔：「短短六年間就打造出一個全國性既揼骨王國，下星期正式公開招股，揸腳仔(4466)集團既主席，Mr. Tony Jaa上黎講下佢既創業故事俾大家聽。渣生你好…」

18號忽然停左手，成個人呆左咁望住我身邊果部personal TV。

「做乜呀？」我說。

「CK上電視呀…」18號口震震咁話：「但係，點解佢又會係我地大老闆既…」

我望住電視機裡面，個樣直頭好似吳彥祖咁款既呢位受訪者，再望一望眼前既18號。

我心裡暗笑：「原來你老細尋晚黎突擊巡舖。」

希望18號尋晚冇做錯野，得罪自己老闆啦。

*****

渣老闆，多謝。

特別鳴謝

特別鳴謝…

寫呢一篇之前呢，我先想多謝各位為小弟既新書出過力既朋友:負責整個出書project既Joe，同埋所有AM730既同事。多謝你地幫我將一篇又一篇，白字連連既爛文，逐隻字幫我執返靚佢。每日出版報紙既工作經已夠忙，仲要大家為我呢個可能最後連一毫子都冇得賺既project做額外既工作，CK覺得除左唔好意思之外，更加感激各位同事對小弟既幫忙。Thanks so much…

要多謝既當然仲有為我寫序既渣老闆，同埋從茫茫扑海中搵我出黎既禤中怡，為我書本封底留字既馬沙兄，同埋AM730既社長盧覺麟先生。各位既幫忙，小弟感激不盡。

仲有唔少得既，係我果位好鍾意笑既老婆。交稿去出版之前，所有既編排整理既工作，都係由Stephy親自幫我處理。咁多年黎，我既身邊，幸好有你。

*****

我，好幸運。

同AM730商討出書既事情，其實係好幾個月之前既事啦。我本來以為，到本書真係出版上架賣既時候，心情其實應該會好平靜，不過今朝早，當新書既「實物」真係送到我手上既時候，感覺原來比想象中，震撼得多。

我同Stephy講，由年幾前開始寫扑，到後來有報紙搵我爬格仔，再到衣家書局既書架上面，有自己寫既書賣，成個過程，我只可以用「神奇」黎形容。坦白講，我覺得響成件事情上面，我係得到一股簡直令我意想不到既運氣。自從開始左寫扑之後，我其實每日都養成左睇其他朋友既扑既習慣。我好清楚響芸芸既博客當中，寫得比我好，文筆比我秀麗既朋友，其實彼彼皆是。今日我所擁有既機會，係好大好大既運氣。

我時不時都有收到讀者朋友既電郵，當中好多都係講及佢地自身既一d際遇問題。因為寫專欄既關係，呢一年我聽多左好多好多朋友響際遇上既故事。部份來信既朋友，佢地既運氣，有時係差得令我震驚。作為聽故事既人，我當然為佢地感到唔抵。運氣唔好既時候有幾洩氣同無奈，我明既。幾年前我都覺得自己既運氣同際遇好差，前景好暗淡，心情壞到無可再壞。不過我自己既經驗，運氣，真係會改變既。

呢兩年，我係直頭有些少唔相信自己既運氣，會同以前有咁大既差距。

所以呢一刻失意冇心機既朋友，唔好洩氣。暴風雨之後始終會見到太陽既…最緊要你肯相信。

*****

好想同各位一直有睇小弟賤blog同專欄既網友、讀者講一聲「多謝」。多謝你地一直容忍小弟所寫，囉囉唆唆又白字連篇既文字。更加多謝你地帶左一d我以前從未諗過既人生經驗俾我。

我除左覺得好幸運之外…我仲覺得，人生，好過癮。

希望，我呢個「仔仔」，會有幸成為各位如廁時既良伴。

祝大家有個愉快既週末。

終於返到屋企

「喂，走先啦！」我帶住幾分醉意，腳步浮浮咁離開派對既會場：「Merry Christmas everyone! 你地繼續玩得開心d啦！」

「CK你又黎玩早走？」朋友大嗌：「乜你次次都走先架？」

「老啦嘛…」我苦笑：「衣家唔捱得夜啦。」

Stephy響我身邊參扶住步履不穩既我，從派對走到依然熱鬧既中環街上，拿拿臨截左一部的士返屋企。

今次已經係我最近唔知第幾次提早離場既聚會。

近幾年我份人變得戀家，係無可否認既事實。同好朋友聚守一堂，吹水廢up，一向係其中一樣我最喜歡既活動。唔知幾時開始，我發覺靜靜地留響屋企，好似比同一大班人一齊出黎圍威喂黎得更加吸引。老實講，我對我自己呢個轉變，其實有些少不安。因為我身邊同年紀既朋友，唔係咁。

「我明既…」響的士上，Stephy拖住半醉既我：「向好果一邊諗啦。人生唔同既時候，同朋友會有唔同既緣份既。」

我響度諗，如果唔係有酒精既幫助，我可能走得更早。

「變左既，應該係我地掛」我嘆左口氣。

「唔係丫，應該係我地變得太少，冇與時並進遮。」

只係有d細微既野，一旦變左質，我覺得個意義就再唔響度。驟眼睇，呢d咁細微既改變，即使真係出現左，表面上都係一貫天下太平，跟往日無分別。

但係我知道事實其實唔係囉。

「斑馬線前落丫唔該。」Stephy同的士司機講。

呢位的士司機手車麻麻地，頻頻落重brake既壞習慣，令已經飲到wing wing地既我，有d想嘔。我從的士爬落車，Stephy扶住我一步一步咁行返屋企。

我望住聖誕夜裡寧靜既咸蝦灣畔。

我嘆左口大氣：「終於返到屋企啦。」

聖誕交叉扑之《不代表本台立場…》

今晚要去蒲呀，咁，早些少post定出黎先。

個題目呢，我作既。本來呢個post果位靚女作者同CK講，拿，post響你個場道，需要既話可以隨意刪改。咁我話，梗係唔好啦，玩得呢個互扑遊戲，改乜鬼丫，梗係原汁原味先開心嘛。

咁點知，我睇完之後呢，都係覺得要加番句，靚女blogger既呢篇文章，不代表本人既立場先掂。


交叉扑原文：

今年係我寫blog的第二個聖誕。舊年呢個時候，我去咗朋友的party玩到深宵，發覺自己真係唔多捱得。

今年我同stephy決定搞搞新意思，在家大宴親朋，並由我親自下廚。有睇開我個blog的朋友，都知道我地嗰家族有幾大，閒閒地一百幾十人。所以我都係講下笑。我地其實約咗d朋友來屋企食番餐吹下水，過一個平安又愉快的晚上。

*****

今日我叫咗kelly同我派bonus。一來可以讓同事多d尊重同比面佢，二來我又可以慢慢退下火線，部署下一浪的發展大計。呢一年來公司大賺兼且成功改組，我同拍擋決定派一個月bonus再加前嗰排改組的表現發放額外的bonus。我唔係一個小器的老闆，不過既然決定咗學沽老人話齌，ck唔駛做一個好老闆，咁同事們的反應，我一於少理。

祝大家有一個愉快的聖誕日！好似ck一樣，訓到日上三竿。

*****

仲有一個令人興奮的消息，就係我同stephy決定來年生番個。

拿，講多次，真係不代表本人立場喎…特別係，最後果句。

仲有，好多謝賜稿俾小弟既果位靚靚Blogger。(雖然你好似有心想整蠱我喎，嘿！)

祝大家有個愉快甜蜜既聖誕節！



…打鼓果個o靚仔，真係好鬼得意過癮。

廿四號晚

我不嬲覺得，聖誕節既「正日」，其實係廿四號晚。所有放縱既情緒，瘋狂既節目，越軌既行為，九成九都係發生響呢一晚。咁廿五號正日呢，emmm，咁多年黎，我主要都係用黎訓覺既。

你地今晚去邊度蒲呀？睇下撞唔撞得見？

大假前夕，寫幾句算啦今日。

祝大家有個甜蜜安全既聖誕節。

*****

又，佢出左碟啦，你會唔會同我一樣都買左？



隻CD，有2008年坐檯月曆送。

我覺得幾岩用丫。於是我就將個月歷放左響我寫字樓將檯上面啦。

嘿，又俾伙計串我。

你班友仔，搏炒定啦梗係。

你今日俾人昆左未？

唔知大家有冇試過響條街道行行下，有人失驚無神拍你膊頭。你拎轉身一望，見到一個個樣好似楚楚可憐咁款既OL。跟住呢個OL就同你講：「先生，唔好意思呀。我岩岩俾人打左荷包，身上面一蚊都冇，可唔可以借廿蚊俾我搭車返屋企？」

咁既情況，我撞過唔止一次啦。咁呢d故仔聽得多，正常人第一時間都會咁諗：「嘩，又黎呢招？係真唔係呀？你係咪想昆我呀…」

不過諗多兩諗，唉，廿皮遮，是但啦。係，眼前呢個OL可能查實真係騙子一名，不過如果佢冇講大話，佢原來真係俾人打左荷包冇錢返屋企呢？廿蚊都唔俾，好似好衰喎。

廿蚊遮，算啦。即使明知可能俾人當傻仔昆都好，俾佢啦。

*****

記唔記得早兩日我講果個電視機送貨員既故事？有朋友提醒CK，我可能俾人昆左。舊既電器回收係有錢既，果個送貨員，大概可能係睇中呢個回收價值，於是作個動聽既故仔同我講，昆走我部舊電視去賣。

先多謝朋友提醒。其實換部新電視之前，我都同d收買佬打聽過，如果我將部電視送俾佢地回收，佢地都肯俾返五十蚊我既。送貨果位哥哥問我，可唔可以送部電視機俾佢既時候，我響度諗，佢堂堂大男人，要開口求人送部舊電視俾佢，其實要過到尊嚴果一關，都唔係容易。

佢如果講俾我聽既說話係真的話，佢個幾歲既女因為搞壞左部電視而搞到冇電視睇，咁我送左部舊既俾佢地，等佢同佢個女都有返電視睇，咁我當然開心啦。咁即使佢正如網友所講，佢係睇中我部舊電視既回收價值，而作過故仔去昆我呢？唉，堂堂大男人，如果要為左幾十蚊，出賣尊嚴，又或者要去呃呃騙騙既話，我大膽咁講，佢既環境，大抵都唔會好得去邊。我諗假如真係要計既話，我諗回收電視可以賺到既幾十蚊，對呢位送貨員既重要性，應該遠比對CK黎講大。既然係咁，就算佢作故仔呃我都好啦，我覺得部舊機佢拎去，點樣都係件好事。

冇人鍾意做傻仔俾人昆既。不過呢個世界每日發生咁多事，單憑人地幾句，查實你又有咩辦法去判斷究竟人地係講真說話丫，抑或作故仔呃你？

我做左咁多年人，我諗我應該俾人昆過好多次。被人昆之前，其實大部份時間，你心裡面其實都知，面前呢一個，有可能係一個騙局黎既。不過我咁諗丫，當你知道你就算真係俾人昆，即使有所損失，對你既生活其實都冇咩大影響既時候呢…

因為你有條件俾人昆得起，淨係「昆得起」呢樣野，都足夠你去燒豬還神，感謝上天賜你幸福啦。

祝大家有個愉快既週末。

*****

有關交叉扑呢…

Carole:唔係我揀擇喎，實情係真係冇人扑過我喎。

男人的成長

細細個覺得大個仔係=食煙飲酒講粗口同夜蒲。所以青春期既時候，呢d野，做得幾多得幾多，希望證明自己原來都大個仔啦。

咁到真係大個仔既時候，梗係知道唔係求其做d表面野就叫做長大啦。之前寫過啦，長大既男人同未長大最大既分別，係承擔。不過有時我覺得，好多人對自己承擔左幾多，好計較，而且好多應該去承擔既野，唔知點解佢地會覺得唔關佢地事，唔應該由佢地去理。

咁，好多野如果唔由佢地去承擔既話，咁邊個去承擔呢？

賺錢生活當然係承擔既一部份，不過，真係只係一部份囉。

*****

細個拍拖果陣，只會覺得拍拖係兩個人既事。年紀大左，先至體會到拍拖結婚一齊生活，好多事情都involve左唔止兩個人。handle大家既屋企人，我覺得其實對大家生活得開唔開心，都幾重要。我其實幾好彩，Stephy屋企人同我自己既父母，都係容易相處果隻。相比好多人，條路已經比較容易行。

我見過好多朋友，兩公婆同老爺奶奶外父外母既關係，搞得好彊好彊。咁當然未必係大家想既，不過我有時諗，老婆同自己屋企人相處得好唔好，好大程度上都好睇你呢個仔，點樣去處理大家既關係。做人個仔，有冇出夠力去幫自己既老婆/女友去融入自己既屋企，當唔好彩發生矛盾既時候，你有冇主動去幫佢地化解，抑或你夾響婆媳既關係中間，選擇做一隻縮頭烏龜，任由情況越搞越壞？

又，有冇諗過，你假如同老婆既屋企人相處得好差好差，咁夾響中間既老婆/女友，日子會好難過？我有d朋友，老婆想返外家見下屋企人，但係個男既就永遠耍手拎頭，去同外父外母飲餐茶好似捉佢去打靶咁。關係，要慢慢建立架，尤其是，一般女仔都唔希望自己個老公同自己既屋企人，關係太差啦，我估。

咁大個人，仲響度講「拍拖結婚只係我地兩個人既事」，然之後大條道理等自己同人地屋企人劃清界線？

咪玩啦，大個仔啦。

*****

控制自己情緒既能力，我諗又係另一個男人成長既指標。尤其係，面對自己既老婆同女朋友，先至係一個男人EQ既最大考驗。唉，好多人返工對住老細，可以死忍爛忍，但係對住自己屋企人同女朋友，兩句唔夠就爆大鑊。

尋日個post出街之後，有朋友email我話如果佢係個男仔，實鬧爆自己個老豆同佢脫離關係咁滯。咁果個老豆既行為，我都好唔鍾意，不過，處理上一代同自己另一半既事，下下硬撼去做，做果下可能好型，不過做完所得出黎既結果，往往係最差既。而且火爆過後，受苦既，好多時反而唔係自己，而係自己心愛既另一半。你同個老豆始終有個血源關係響度，但係女朋友呢？對果個老豆黎講，佢係一個搶走自己個仔既外人。做老豆既，多少會錫住個仔，但係個外人呢，多數都你咁好彩呀。

即使有心想保護自己既另一半，都要搵個好方法先掂。發老脾，好容易既遮，要收埋d脾氣，忍住度火去解決問題，先至係難度。

所以我話要有手腕囉。

如果下下都控制唔住把火既話，咁證明，你未長大得夠囉。

*****

唉，講左成篇廢話，講返d正經野。

鐵鎚哥個聖誕交叉扑遊戲呢，我仲響度招緊稿呀。

詳情，睇呢度啦。

當我個仔同你談戀愛

女性朋友細我幾年，有份正當職業。佢幾靚女既，最近，識左個男仔。

咁男未婚女又未嫁，好快就撻著左，拍拖啦。

個男仔，同我朋友差唔多大啦，家庭環境我諗都唔差掛，富豪級數我諗又有排都未到，不過佢老豆做過下生意，年青既時候都應該搵過下錢，所以，睇落都應該算係富裕啦。

朋友話俾我聽佢識左個男仔拍拖，咁我都戥佢高興既。我見佢地剛剛拍拖冇耐，咁梗係糖黏豆咁架啦。不過佢地開始拍拖唔到一個月，就遇到一件我覺得，都幾離譜既事啦。

個男仔個老豆無啦啦介入。有一日，繞過左自己個仔，走左去刮我個朋友出黎，好似講數咁。

「講數」既內容大概係話，拿，佢地屋企so call有頭有面架，你同我個仔拍拖，你係乜料先。我衣家就要先起清你個底。仲有，多少有d警告既成份啦我覺得，就係話俾我朋友聽，佢會睇住佢地拍拖既狀況架，你唔使旨意諗住呃到佢個仔，又或者響佢個仔身上面拎到d咩著數咁上下啦。

最頂癮係，佢又九唔搭八響度同我個朋友講自己以前做生意幾咁堅咁，點樣閱人無數，係人係鬼咪駛旨意可以走得出佢對眼喎。

雖然人地個老豆冇話唔俾我個friend同佢個仔拍拖，不過呢個「懶係勁」既下馬威，俾著你係我個friend，你都唔慌覺得開心啦。

*****

我未有仔女，唔知道當我個仔同其他人拍拖既時候，會有幾緊張。

我同Stephy開始拍拖果陣，我地得十六歲，加埋Stephy係女仔，咁當時如果佢阿爸阿媽捉我去問話既話，我諗我都覺得合情合理，唔會有咩怨言。畢竟做父母，點都會怕自己個女蝕抵俾人啦，而且果陣仲咁細個，我覺得，擔心都合理既。

不過我呢個朋友既case呢，我覺得有d離譜啦老實講。第一，你果仔係男仔，要驚蝕抵，我諗輪到我個friend驚都未輪到佢個仔驚啦下話。

第二呢，大佬，你個仔，差唔多成三十歲人架啦，兼且受個高等教育，係咪應該相信你個仔響揀女朋友方面既眼光呢？

咁仲有第三，查實我覺得，繞過個仔走去同佢既女朋友，講d咁唔客氣既說話，我覺得，多少唔係幾尊重個仔啦下話。一家人還一家人，對住家人，都要keep返多少respect丫我覺得。

我係局外人，睇呢件事既時候難免有d偏頗。不過呢個男仔既老豆，俾我既感覺，就只有「自大」兩個字。佢自大到唔相信已經成年既兒子既判斷能力，覺得自己個仔響閱人方面唔會叻得過自己，又自大到以為，自己既背景同以前既成就，足以令到天下女性都要為得到佢地既財富而去欺騙感情。

自大成咁既人，唔會有快樂既。

我聽左朋友講既呢個故事，唔知應該俾咩反應佢好。熱戀中既朋友，當然傾向要努力排除萬難，繼續同呢個男仔行埋落去。我唔想潑冷水，不過假使有一日，佢地真係行入教堂，將來朋友所面對既呢個「老爺」，我諗，都會幾難頂。

我冇問呢件事發生之後，佢男朋友點樣面對佢老豆同點樣去跟進處理呢件事。不過假如佢地最後真係結得成婚，朋友以後既日子好唔好過，我諗，就好睇呢個男仔應付呢d事情既手腕，同埋佢份人有幾堅強同獨立啦。

男人要有能力保護自己既另一半，唔係一味話鍾意人就夠既。

簡單生活

屋企大裝修之後，有d擺放傢俬既位置改動左。以前我用緊部顯像管形既電視機，因為re-arrange過d地方，放電視既櫃已經再放唔落佢啦。於是，終於換左部LCD電視，舊果部，服務左我八年之後，宣告退役。

送新電視黎果位送貨員問我，可唔可以將部舊電視送俾佢。佢話佢屋企果部，俾自己個幾歲既女搞壞左一直都整唔返好，sort下sort下咁。其實舊果部電視，一切運作正常，我丟左佢，我都覺得有d浪費。咁有好心人將佢接收，我其實求之不得。我諗都唔諗，就應承左佢啦。

唔知點解，有時遇到呢d事情，我總係覺得有些少奇怪既感覺。我屬於香港社會比較幸福既一群，有能力有機會去不斷改善自己同屋企人既生活。送貨既呢位哥哥，我相信佢當然唔算係生活最艱苦果一批，不過當佢問我果件我唔要既電器可唔可以送俾佢既時候，我只係真心咁覺得，自己，其實真係幾咁幸運。對物質上更多既追求同埋投訴，唔應該出自CK把口。

Thank God。

*****

呢幾年做生意，無可否認係令我多左錢駛既。

或者去到衣家呢個年紀，有部份同年紀既舊朋友，事業都已有小成，多左錢駛啦。

手頭鬆動左之後既CK，其實或多或少，生活都奢侈同揮霍左。所買同用既野，或多或少亦比以前初初出黎做野果陣，quality係會好左既。

識得有d朋友，搵多左錢之後，對所消費既野既質素，要求大幅提升左。當偶然撞著d質素唔係幾好既消費呢，果把火，大到嚇死我。

「唉，有乜所謂呀，好又一餐唔好又一餐啦，以前未搵到錢果陣，咪又係咁食…」我同佢地講。

通常我講呢d野呢，朋友都唔慌聽得入耳架啦。佢地總會有一千幾百個理由，去prove佢地點解要對所消費既野既質素，有咁嚴格既要求。

咁講真，我覺得佢地有d多舊魚啦其實。

銅臭，我認既。

只不過要生活得過癮，afterall又其實好簡單既。好多luxury，係Bonus。買到d有質素當然係開心，冇既，都係果句丫，未搵到錢之前，d野咪又係咁用同咁食？點解all of a sudden要變得咁picky？

你嫌棄既野，其實，仲有大把人會視如珍寶呀。

希望果位小妹妹，唔好再多手搞壞架電視機啦。

聖誕無情派對

公司又開聖誕Party啦。

今年我book左間二線酒店既function room，希望同事們會玩得盡興啦。不過其實每次出席公司既function，我感覺都總係有d尷尬。每次都係一個麻甩佬，帶住廿幾三十個後生女仔出去玩呀，食飯呀。我總係營住，果d酒樓餐廳酒店既服務員，serve我地既時候，唔知會唔會以為，CK間公司係做d唔知咩不道德既行業。

每年既聖誕Party，我係希望用黎聯繫下同事間既感情，希望佢地輕輕鬆鬆開開心心咁玩返晚。

好耐之前，我初初踏足社會冇耐，我打工既公司又如常咁開聖誕Party。我第一次參加商業機構之內既X'mas Party，感覺都幾新鮮丫。我見同事們玩得又開心，老細雖然平時鍾意板起塊面擺晒款咁，不過聖誕派對之中，我見佢都好似放低左平時既拘緊，同其他同事有講有笑，言談甚歡咁。

果次既聖誕Party響一片嘻嘻哈哈既歡樂聲中完結。我果時真係覺得，我老闆，都唔係我不嬲諗得咁乞人憎丫其實。

Party之後既工作天，一早返工，有兩個同事就收到老細派發既大信封，即時要執野走人。

呢個畫面呢，對初出社會做野既CK，其實都幾震撼。早兩日既Party，老細同佢地仲有講有笑嘻嘻哈哈，好似鬼咁老友咁。估唔到兩日之後，就要人頭落地。

眼見既未為真，商業社會既殘酷之處，正正係當你以為身邊人同你好friend既時候，人地既心裡面可能已盤算緊點樣將你置諸死地。

衣家每年公司搞聖誕Party既時候，我都總係不其然會諗起呢件初初出黎做野遇過既小插曲。

大時大節為伙計送上無情雞，我總係覺得唔多忍心。

男子組靠你

新同事早兩日忽然問我：「老細，乜原來你都鍾意鄧麗欣？」

「係呀係呀…」我點左點頭：「呢樣野，全公司都知架。」

「哈哈，估唔到喎…」同事露出一個蠱惑既笑容：「你三十幾歲人架啦喎，乜仲岩呢d…」

「我有童心遮…」我話。

*****

兩年前我結婚之前果一晚，幾個感情好既兄弟響我屋企過夜，方便第二朝晨早去接新娘。

我屋企有一個CD架，上面放住一大堆舊既CD。呢堆CD，某程度上係屬於我年青既年代，陪住我長大既一批旋律。第二朝一早就要結婚，本來我同埋我幾個兄弟打算早d訓，養足精神第二朝一早去俾班姊妹玩既。不過我地幾個麻甩佬見到呢堆舊唱片，唔知做乜神推鬼擁咁拎左出黎播，播下一隻播下又一隻，大家攤響我屋企既客廳度，聽住呢堆舊歌聽到幾乎天光。於是CK呢生人最後一個單身既夜晚，就係同埋呢幾個由細玩到大既老友，響一堆陪住我地長大既旋律裡面渡過。

我諗，三字頭既我地，對以前年青既日子，都總係有些少懷緬掛。

*****

我以前細細個果陣，覺得三十歲人係「好大個」架啦。咁貶下眼自己就三字頭啦，依家你問我覺得三字頭係點，我發覺，原來一d都「唔大個」。

大部份我鍾意既野，同細個果陣，其實都冇乜分別。我依然鍾意追捧d當紮既女明星，分別只係我laptop張wallpaper由N年前既周慧敏變成陳慧琳再變成今日既鄧麗欣，我依然係極鍾意打機，分別只係由我細細個求阿媽俾錢我買任天堂紅白機到衣家自己搵到錢買部PS3同Wii俾自己，我又依然係咁鍾意睇波同踢波，不過睇波我由以前第一次睇舒米高守龍門既技驚四座，到今年我居然係睇緊「舒米高個仔」響度守龍門，睇到肉緊既時候，同以前一樣係咁粗口橫飛。

我有時諗，其實，三字頭既我地，到底有冇長大過？我以前以為，興趣可能會隨住年紀改變，不過當我發現我讀中學果陣又係打緊Winning Eleven，三字頭成家立室之後我都係打緊Winning果陣，我諗，年紀係大左，身體亦都多少開始冇以前咁fit既今日，好多細個既「根」，其實仲響度。

唔同既，係多左責任同承擔。

以前打機溝女踢波扮型既心，仲響度架，只不過今日三字頭既我地，要先供車供樓養全家。搞掂呢d野之後，先可以諗果d埋藏響心底深處既「幼稚」興趣。我越黎越覺得，人唔係因為年紀大，而改變左自己既興趣同喜歡既野，只不過當年紀大左，責任同要承擔既野都越黎越多，有太多野放響個膊頭上面，而你又必須先去處理好呢一堆責任。人既精力同時間有限，當處理好呢d責任之後，你剩返俾自己既時間，其實已經唔多啦。

有個朋友二十出頭果陣，好靚仔架，個個女仔見到佢都眼甘甘。三十之後，變成大肚腩+M字額，總之走晒樣果隻啦。

朋友話，佢其實依然好貪靚，好想好型咁行出街。不過，靚仔要時間去「營造」架！要keep得住，唔駛時不時去做下gym，去做下facial，又去買下新衫？

呢d時間，花唔起啦，佢話。仔細老婆嫩，有時間，搵多兩個錢供樓快d甩身好過啦。個樣跌左watt，冇法啦。

我摸下自己個額頭，頭髮都仲算係幾濃密，心諗，我查實都算幾好彩啦。

我諗，心底既深處呢，我地呢班三字頭，其實都仲係一個大細路。

只不過，我地係一班有承擔既大細路。

我地唔係十八廿二

我當然唔認老，不過，又唔可以唔承認，我地，唔再係十八廿二。

其中一樣最呃唔到人既，就係病既復原能力。初初出黎做野果陣，病咪病囉。工照樣返，冇問題丫，頂兩日，d感冒發燒就自動會好返。去到衣家，唔休息同訓返夠，都唔駛旨意有得好。好似老婆呢一次，病又返工死頂，於是病極都唔好。

我同老婆講，唉，我地唔係十八廿二啦，唔得好似以前咁搏法架啦。身體，負荷唔到啦。

隨住年紀漸漸大，工作既模式其實都響度慢慢咁改變。以前初出道既時候，做野係靠舖勁同埋熱誠，加埋用極唔完既體力，去應付繁重既工作。咁到年紀大左，積累左足夠既經驗之後，加上身體狀況已經開始下滑，做事，就由一股作氣咁死衝轉變為依靠智慧經驗同計劃主導，以前果舖牛勁呢，儲儲埋埋「必要時」先拎出黎搏一舖囉。年紀大左，連d「勁」都要慳住駛呀。

我諗呢個係必然不過既成長過程，響做事風格上呢個transformation，因為你身體既狀況，而局住要慢慢轉變。

不過我認識有d朋友，最敝傢伙果隻，就係響佢仲可以靠舖牛勁搵食既年輕日子，冇好好咁利用，懶懶散散咁胡混過左初出道果幾年。到年紀開始大，當體能下降既時候，先發覺自己冇積累足夠既經驗同學識，於是去到而立之年，依然發覺自己冇咩專長，想生性啦，從頭開始但體能又未必容許，於是跌左入去一個搵唔到出口既困局之中。

係，因為當你唔係十八廿二既時候，好多十八廿二做到既野，真係冇能力做。年紀一大左，你唔sell經驗頭腦同智慧，齋用舖勁同班後生既撼，真係可以輸死你。

所以，如果睇緊我呢個post既你，正係十八廿二呢d年紀，記住記住，唔好浪費呢個年紀既光陰。事關過多十年八載，睇返轉頭，真係可能發覺今日你食緊粥定食緊飯，原來都同你十八廿二果陣做過乜係有關係既。

唉，幾時先病完？

祝大家有個愉快既週末。

*****

死仔，玩點歌？唔好大我喎。



唉，都話唔係十八廿二啦。

硬係覺得，聽返d舊歌好似有feel d。

怕且勾返起d「年輕」既回憶掛。

輪住黎病

我既病況今日稍為有d好轉之際，今日輪到Stephy唔舒服。

好似燒得仲勁過我喎。

細個病既時候，通常覺得自己係大晒既。病喎，咁辛苦，全世界都要就我丫唔該。細個有d時候甚至會覺得，其實有時病都幾好丫，起碼大家都會對你特別好d。

長大之後當然冇左呢d咁幼稚既諗法。衣家不論大病小病，都只會覺得煩厭。因為知道自己有太多責任，而病，只會阻礙自己去履行呢一大堆responsibilities。

咁，責任當然包括，照顧病緊既老婆。

*****

病緊既，唔只我地兩公婆，仲有我公司既拍檔。

咁公司拍檔唔返得工，最直接既影響，就係你要頂埋佢果份囉。

踏入左十二月之後，我總覺得運氣麻麻。除左身體唔好之外，做野總係唔多順利，滯住滯住咁。我以前唔覺得人響唔同時間會有唔同既運勢，不過到自己做生意既時候，運勢既起落我又真係感受得越黎越深。或者我口中既呢d運勢，未必會令你發大財又或者破產咁extreme，不過我有時卻好似感受到有一種無形既力量，響度主宰緊我工作既節奏。好似踏入十二月之後，總係有一種出多多力但卻向前行得極小，有時仲會有無啦啦倒後退返兩步既感覺。

或者，年尾流流，應該停一停，留到明年先再搏過？

*****

發呆咁對住部電腦，屈住一大陣悶氣。今晚，咩都唔想寫。

咪諗錯隔離

網友問Kelly係咪暗戀我？拿拿拿，咪諗錯隔離喎。Kelly既男朋友，我都識，高大有型靚仔過CK一百倍，我敢肯定呢個假設一定唔成立。又加上呢，我已經有一個好好既老婆Stephy，唔好搵d咁既野搞啦，下話。

咁講，我係一個已婚既男人，公司裡面囡囡眾多，即使部份查實幾靚女既都好啦，我都唔會，亦唔敢去動丁點兒歪念。你可能會覺得，呢個係因為婚姻既約束。不過我咁諗，除左婚姻既約束本身，即使假如我係一個單身既人都好啦，我都唔係好接受到，同下屬拍拖呢一個condition。我份人最怕d野公私不分，假如同個伙計拍拖，我諗盤生意實搞到一鑊粥咁都似。

我又識d生意佬朋友，真係同自己既伙計拍拖。戀愛呢，就往往令人衝昏頭腦既。我呢班朋友，開始拍拖果陣，永遠係誓神劈願咁話自己一定會公私分明，女朋友響office hour之內依然係自己既下屬，佢做錯野都一定照丙可也。唉，一個二個講就天下無敵啦，到最後咪變晒鵪春咁。

好啦，搞下搞下，其他伙計見到你係唔係都要幫住個女友，咁死啦，成班伙計條氣邊會順？一個唔好彩個女友原來係鍾意拎住雞毛當令箭果種人既話，咁你間公司，真係家無寧日，你檔生意，真係凍過水啦。

有時都幾唔明，點解咁多人鍾意做d野去搵自己笨。要搵女朋友，世界咁大，都唔駛一定響自己做野果度丫。

*****

寬頻窄頻

我有些少問題想問。

拿，我屋企上網係用緊8號仔既網上爬服務既。咁，自從今季英超轉鬼左去Now之後呢，我呢d球迷就局住裝個Now電視睇囉。咁Now同埋我上網查實係一條線丫嘛，我老婆又鍾意上網去youtube睇片，咁唔知係我敏感丫抑或心理作用啦，逢親星期六晚我開著個Now睇波果陣，碰岩我老婆又響果個時段睇緊youtube的話，佢段youtube片，五分鐘片仔窒下窒下唔在講，一段片仲分分鐘停成十幾廿次。

咁其實我想問，家陣網上爬果條線，係咪唔夠bandwith support晒兩邊一齊睇片？

唉，抑或，我應該轉去用光纖寬頻呀？五舊幾一個月，有d Lar利喎好似。

俾d意見丫，唔該。

自白

唔知最近行咩衰運。我d燒都仲未退之際，拍檔忽然又遇到d小意外，需要留響醫院休養。如是者，CK就病住都要返工頂住先。

每逢呢d日子，都總覺得擔子沉重。一間公司仔，要響大機構當道既今日生存，避過俾人淘汰，仲要面對來勢洶洶既新競爭者，每年要make sure自己有能力出到唔會令同事太失望既花紅，其實，已經讓人夠疲倦啦。

遇岩公司最近既人事問題，我望住部份同事總係響度搞搞震，小動作多多咁，我心裡面只係諗：「唉，生性啦你地。大個女啦，仲玩埋d咁既野？」

渣老闆講得岩丫，創業多年之後，其實真係已經放棄左去做伙計心目中既好老闆。我以前覺得只要做老闆既肯拎個心出黎去對待伙計，伙計始終係會感受得到。咁做左咁耐老細，到底得唔得？

hmmm，我其實已經唔係好知。不過我越黎越發覺，有時如果我響同事既心目中，係一個衰人，又或者係一個不懂分別是非黑白既昏君，管理有時會反而會變得容易d。去做同事心目中既好老闆，代價太大，做到係Bonus，做唔到，有時反而係道理。

其實我認識唔少中小企既老闆，管理既原則都同我一樣，要求自己對伙計最低限度要做到「己所不欲，勿施於人」。伙計都係人，一樣有屋企，有自己既生活，做老細既無謂對伙計太過苛求。做人老細，但求過得自己過得人，夜欄人靜果陣唔駛受良心既責備就算。伙計點睇你，老實講，是但啦。

辦公室既權術，坦白講，唔係我杯茶。不過當做老細既日子越耐，響不知不覺間，權術既運用又不其然變得越黎越多。響同事既面前，為左大局，我講過無數個大話，亦做過一場又一場既戲。當我將呢d事情當係日記咁寫返出黎既時候，可能會係一個個幾得意幾有趣既故事，不過置身其中，心果句丫，唔係真係咁過癮架咋。

好多網友曾經留言，話打我工應該幾開心。多謝各位讀者既抬舉。當然我或多或少可能用文字將CK老闆呢個人美化左，不過當大家作為旁觀者，去睇發生響我身邊既事之時，你可能會覺得做我伙計應該唔太差。不過假如你置身我公司每件事既當中，成為一個當局者既時候，眼前呢個CK老闆，可能就會成為你一生之中最討厭既人都唔定。旁觀，總比置身局內黎得輕鬆既。

*****

講開辦公室權術，不其然諗起公司裡面既Kelly。

如果你係我(三)

「嘩，你呢d野同我講好啦，你知啦，上一次Mani單野之後，CK對呢類辦公室既是是非非真係好反感呀。你覺得Doris做得唔好，同我講好啦。我幫你同Doris講下，睇下可唔可以幫佢改善下，等大家都可以做野既時候smooth d啦。你呢d投訴，萬一真係唔覺意傳左去CK對耳度，佢嬲起上黎連投訴果個都郁埋添呀。你知佢呢排心情都唔多好，小心d呀你地…」

上面呢段說話，係我要求Kelly響遇到同事再投訴Doris既時候，講俾同事聽既。

同事們當然心有不甘，覺得我呢個老細幾時變到不分青紅皂白，是非不分。只用一竹篙打晒成船人，一切辦公室內既是非都會觸怒我呢個太上皇，令佢地做「佢地覺得『對』既投訴」時，要面對不必要既「風險」。而呢個風險，佢地認為係由老闆既「昏庸」所致。

做個同事眼中既昏君，我查實唔係好介意。我反而覺得，以往當我處理同類事情既時候，所犯最大既錯誤，唔係我處理成點，而係我「會」去處理。大家知道老闆會去處理呢d事情既時候，而我呢d公司仔，老闆又理論上有對伙計生殺大權…於是，只要同事們能get me involved，呢類辦公室既小動作，就有市場。而我亦響不知不覺之中，被有心既同事當成利用既對像。

現在既CK，寧願做一個心腸硬一點既老闆，都唔想做一個會輕易get me involved in呢類同事間既politics既人。已經受到煽動既同事，或者會覺得我蠢同是非不分，佢地覺得點，冇所謂，最緊要，我對響同事間所發生既事，依然有所掌握。同埋大家會相信呢d小動作，不單止唔會得到佢地想要既效果，而且會觸怒我。

我選擇由Kelly幫我將訊息軟性地發放出去，係想避免一次同同事們正面既衝突。辦公室內好多事情，我傾向覺得有一個制衡既力量存在響度，就足夠啦。三口六面咁講得太清楚，有時反而有更多意想不到既反效果。只要大家都忌諱呢個制衡既力量，而不敢過份越軌，就係咁，就已經足夠啦。

訊息早陣子由Kelly幫我傳左出去，換黎左近幾星期黎既安寧。

至於同事們真正點諗，會唔會不滿情緒在不知不覺澎漲起黎，去到危險既水平，呢d資訊，我就只好靠Kelly為我收集啦。

以前，當有呢類事情出現既時候，我曾經幼稚地希望將佢徹抵解決。經驗累積多左，我越黎越傾向，製造多一點無形既制衡力量，將麻煩控制響可接受範圍之內。

或者，係變得現實同消極左掛。

*****

後記

同事們都喜歡get me involved in 佢地既issue裡面，除左另有目的，希望我既處理會有利佢地之外，多少仲希望我以老細既身份，還佢地一個「公道」，去為佢地既事情做「審判」。

我對呢樣野，好反感。

對同事們之間既issue/conflict，我冇親眼見過發生咩事，誰是誰非，由我單憑雙方一人幾句去判斷，判左你都唔好信啦。之但係同事們總係喜歡睇下我撐邊面。我唔想響我冇能力同資訊不足既情況之下take side，所以我會盡量避免為佢地「判」，不過，同事們就硬係喜歡千方百計咁逼我表態。

老實講，我對誰對誰錯，一d興趣都冇。我run既係一間商業機構，唔係學校。我只係有興趣知道，你地之後會唔會繼續好好地咁工作落去。唔好期望老細會好似學校既老師咁，當同學間有爭拗既時候，會為同學們既大小事情做判官，懲罰老師認為唔乖果位，然之後嘉許較為乖果個。

呢一樣，唔係老闆既工作。作為老細既，亦冇咁既能力去做道德判官。

當同事們走入我房，尋求一個「審判結果」既時候呢…

「Get out and get back to work!」

有d野，我真係好唔鍾意。 (完)

如果你係我(二)

先多謝各位朋友既意見。

咁我又講下我自己點睇丫。

如果一直有睇開CK個blog既朋友，當見到呢個case既時候，唔知會唔會同我一樣，第一時間諗起幾個月前發生既「四小強逼走Mani事件」？

我自己就有啦。我亦都好同意好多網友所講，人某程度上係有一種「排外」既本性，亦正因為係本性之一，所以歷史係會不斷重演。

不過，Doris既事件，同Mani既事，又唔可以相提並論。Mani出事既時候，佢係一個負責管理既同事，佢既一舉一動，會直接影響公司運作。Doris同Mani既級數有別，或者講得現實同難聽一d，Doris並唔係我心目中公司核心既員工，佢響度做，或者唔響度做而我搵個新人去接替佢手上面既工作，其實，對我，對公司運作黎講，基本上係冇大影響既。

咁炒同唔炒，對公司既運作同賺錢能力影響不大既情況之下，剩返落黎既問題，就係我既決定，俾到同事們一個點樣既訊息。我炒，即使短期之內或者會皆大歡喜，不過炒亦同時代表左我向同事們既群眾壓力屈服，我覺得呢個訊息係最差，因為咁做，等於話俾同事聽，下次有邊個同事大家唔鍾意，大家只要稍稍團結一d，就可以將唔鍾意既同事逼走。咁做亦鼓勵左同事去重複做類似既事。

唔炒，同事們其實已經開始，將矛頭指向我，「唔知點解」有心包庇同縱容Doris。坦白講，我唔介意呢類無聊既rumours，亦都唔介意比同事誤會。不過當rumours傳得越黎越過份，而謠言既內容某程度上會影響同事間既工作情緒同鬥志的話，咁就會比較麻煩。可能我悲觀，不過我相信，假如我出黎撐Doris的話，同事們會更加覺得老細偏心同包庇，而當伙計認定左老闆係會慣性地以「不公平」既原則去處理問題既時候，以後做野就唔會再落力，甚至傾向悔氣。

你或者會話，你可以好好解釋清楚，平心靜氣同下屬講丫嘛。不過我咁睇，辦公室政治同真實既政治環境好相似：人既情緒，先係主導成個氣氛既元兇。是非黑白，響情緒不穩同埋群眾壓力抵下，已經好難去清醒地辨別。你肯解釋，都要班受眾in th mood去接受至得，如果唔係，分分鐘會越解釋反而越混亂。Mani事件當時我之所以覺得必須處理既原因，係因為佢係一個manager，佢出左問題，所有under佢既人都唔會好過。Doris既情況剛剛相反，佢只係一個ground level既staff。我就當佢真係有問題，亦時不時有錯都好，佢既問題都冇道理會好似當日Mani對其他同事既影響咁大。同事們將兩件事有意無意咁連繫一齊，用接近既方法去push我，目的係想提醒我，上一次處理既準則，應該同今次係一樣。然而佢地冇留意到既係，今次同上次既情況，響本質上面，係有好大既分別。對於已經晉升做管理既同事，我既要求亦會格外嚴格。

一如好幾位留言既朋友所講，Doris如果自己頂唔順走，係另一回事。我作為老細，我睇唔到炒左佢對大家有咩好處。

我選擇做一個同事們眼中既「昏君」。

小豬講得岩，問題其實響我果度。至於我呢個「昏君」點做，同埋點解要做，容我響下一個post先再講。

今日無啦啦發燒，精力有限，寫住咁多先。 (待續)

*****

放段廣告先。

大鐵鎚發起左個交叉扑既遊戲(唉，呢個名改得真係…)，有意內洽。

如果你係我

今日出個scenario俾大家一齊諗下丫。

Doris係一個同所有同事都唔係好夾既伙計。

你可能會話，一個人同所有同事都唔夾，一定係佢有問題。Doris係我請返黎既，佢既性格多少有dd孤僻，呢個孤僻既性格，令佢同大部份人，都有d距離。

Doris響工作上，一般啦。唔係特別好，亦唔係特別差。同其他同事一樣，一日由朝做到晚，偶然總有d大意既錯誤。不過同一般同事唔同，其他人做錯野，同事間會互相幫忙，你幫一幫我，我又幫你托一托，互相補足之下，好多事情都可以輕輕帶過，問題亦響無需鬧大既情況之下，可以得到解決。對於同事間無心而偶然既錯誤，我一般都從輕發落，好多時我會利用Kelly幫我隔一隔，即使同事犯左d小錯，我會安排Kelly去為我處理，而我，會盡量扮睇唔到，免得同事們做野既時候，因為驚老細睇住，而顯得縛手縛腳。

Doris犯錯，情況就多少有d唔同。同事總喜歡有意無意要去驚動我，盡量要make sure我知道Doris「賴」左鑊。

同事都想我將Doris炒魷。我亦感受到，「群眾」想嘗試俾我一d壓力。

我對Doris既評語係，佢響工作上係有唔少缺點，所犯過既錯亦證據確。只不過，響我眼裡面，佢既問題同所犯既過錯，我唔認為到達要被我解僱既程度。

假如你係CK，你會點做？炒，抑或唔炒？

(有口痕友同我講：炒啦！年尾慳返份Bonus喎…)

(唔係下話…呢個，唔應該係考慮既factor黎個喎。)

你當班女仔傻架咩！

又黎小動作

唔知係咪我敏感。公司每年總有d時間，同事們係零舍多小動作。一個係Appraisal之前既幾個禮拜，另一個係年尾臨近出Bonus既一個月左右。沉靜左成半年既「宮庭內鬥」，最近我覺得又似乎開始有捲土從來既跡象。我之前準備好既改組方案，睇黎又會多左d野要consider。

咁響呢個moment，呢d耐不時就發生既內鬥事件，都仲係停留響私底下出招既階段，我既態度傾向消極，好多野，我知道就算啦，問題未發展到白熱化既階段，我都唔打算出面幫佢地做d乜去解決，免得過俾左錯誤既message同事們，以為老細有興趣參與其中，到時盞令佢地更加覺得，呢d辦公室內既小動作有市場。

呢段時間，唯有靠Kelly幫我控制住先。

有時真係覺得，女仔，靚爆鏡既都係咁話啦，當麻煩搞起事上黎，都一樣可以好唔可愛既。

*****

溝女定位

識得一個朋友，既唔靚仔，亦唔有錢，總之，條件點秤都唔係最attractive果隻男仔。不過勁就勁在，每次同佢拍親拖既女朋友，都係靚到Dum一聲既靚女，次次見佢都好似拖住件名模出街咁款。

一大班男仔坐響Pub度，大家飲到有幾分醉意既時候，有朋友終於忍唔住問：「都唔知d靚女貪你d咩？究竟你出左d咩招數，咁多咁高質既女仔為你死心塌地呀？」

咁呢個朋友就話啦：「冇喎，做返自己遮。你地成日以為d靚女好難追，查實唔係架喎！個個以為佢地大把人追唔敢埋身，個個都係咁諗果陣，終於咪冇人埋身囉！我大膽敢埋去，執隻死雞遮！」

另一個飲大左既朋友就即刻搭嗲勒：「妖！執死雞都要靚仔d下話…拿，我地呢度個個都靚仔過你丫，又唔見我地執到死雞？」

朋友大啖大啖咁飲左杯紅酒，然之後哈哈大笑：「拿，就係你地成日諗埋晒d無謂野囉。一日掛住靚唔靚仔呀，有冇錢呀呢d野，妖！我好清楚自己定位架喎，我又唔靚仔又窮，咁我咪做返唔靚仔同冇錢既人做既野囉。你地可能靚仔我少少，錢多我少少，但係去到溝女果陣，又死要整個萬人迷眼神出黎，又扮闊佬，唔好玩啦，你估班女傻既咩，睇得穿你地班傻佬響度死充，你地仲冇面呀。」

我又飲左啖紅酒，覺得，都幾有道理丫。

有時我諗，做人都係咁丫，好多人成人try to將自己present成一個好charm，又或者好掂既人咁，之不過，真實中既自己就唔係咁既料丫嘛。你越夾硬充，就越唔自然。你明明個人正正常常冇問題，夾硬充有型有格，咪扣晒分囉。於是人地唔死充果個，咪輕輕鬆鬆執隻死雞囉。

「死充，呃果班從未見過世面既小妹妹都仲得…」朋友又話：「稍為見過下世面果班，你真係當佢傻既咩。」

係丫，我贊成。

*****

咁好似唔係幾好喎，下話…

中大畢業禮，學生示威呢單野呢…

坦白講，中大頒個學位俾阿董生，岩唔岩我就唔敢講，之但係，果個場，除左阿董生同阿校長之外，仲有好多人響度架喎。畢業，對好多人黎講係件大事，分分鐘係一世人一次，雖然你話你示威既目標唔係其他畢業生，不過對於呢班參與其中既畢業生，仲有佢地既家人，其實我覺得咁做，多少ruin左一班無辜既人，人生裡面既一d magical moment囉。

即是舉個例咁講丫，我響間天主教堂度行婚禮，無啦啦有人衝入黎示威，話不滿幫我主持儀式既神父喎…咁，你又會唔會覺得，對結緊婚既我同我老婆，好唔尊重？我知，你示威個對像唔係我丫嘛，不過我一世人一次既magical moment，響記憶裡面就從此要加一段我唔想要既插曲響入面囉。又講時講，假如咁樣既事真係發生響我婚禮上面，我諗我真係同你死過都似。

唉，讀得書多既人，應該識得尊重，同埋響爭取自己想要既野既同時，盡量避免「傷及無辜」。如果唔係，咁多年讀左咁多書，就浪費晒架啦。

祝大家有個愉快既週末。

改組前夕

花左兩日時間，終於同Kelly草擬好改組既藍圖同時間表。

部份同事既工作安排會有變，有人會多左野做，有人又會得閒左。有新既工作會加入，咁我都expect遲下應該會有新既同事會請。除左internal structure既改動之外，公司既方向我都會有d改變。在我既立場去睇，改，係希望可以set好個foundation，去突破樽頸。

不過講突破之前，第一步，係同同事們「推銷」新既改組方案。

講真，公司每次有咩structure上既改動，大既好小既好，都總會有同事唔開心。人既本質係傾向唔想有太多太大既改變，呢樣野我明白。所以當佢地日常既生活被逼要改變既時候，不論個改變對佢地係有利抑或有害，響未搞清楚之前，佢地都會傾向抗拒既。咁假如佢地一開始就傾向抗拒既時候，呢個改組工程就好難做落去囉。有d朋友以為老闆係土皇帝，有無上權威可以想點都得。我反而覺得，公司形同一個小政治舞台，好多野，冇下屬既支持，就算你個plan勁到會飛都好，都唔會成功。

不過伙計睇事，同老闆睇盤生意，往往差別好大。舉個例丫，我有時覺得，同事們認為公司每年為佢地加薪既動力，並唔係來自盈利既增長，而係老闆自己幾有良心。因為咁，你同佢地講，為左大家出年可以加多d人工，所以要改組，令公司賺到更多呢個concept，其實好多同事都未必會Buy。

同事們睇公司既「危機」，亦同我會好唔同。當我覺得生意停滯，要突破先可以繼續生存既時候，好多同事又會覺得，家陣公司冇問題丫，生意好好丫，仲乜要搞咁多野？老細係咪得閒得滯冇野做，搵班細既黎娛樂自己？咁以前市道差既時候，又試過有伙計問我公司係咪唔掂，擔心公司要摺埋影響佢既飯碗，不過當伙計開始真係意識到危機既時候，其實，最壞既時間都已經過左lu。

呢類與同事間睇問題既分歧呢，當然要盡辦法去解決。分歧過大既話，終有一日會爆鑊。我唔期望佢地睇生意既角度會同我一樣，有d生意佬成日埋怨點解伙計咁唔識諗，唔明自己個老闆諗緊乜。咁要伙計百份百理解自己既諗法，空中樓閣黎既，邊有咁易丫。大家立場都唔同，睇既角度自然有差別啦。不過至低限度，當做老闆既有野想搞果陣，同事們唔好睇得太負面，或者覺得你玩緊佢，咁樣，我就已經滿足啦。

諗通諗唔通諗通諗唔通

我越黎越覺得，一件事諗得通同諗唔通，真係只有一線之差。

舉個例，好似我以前仲未做生意既時候，其實覺得自己份工冇咩將來，想做生意好耐架啦。不過呢，一直我都諗唔通唔敢做。

唔敢做既原因，不外乎你都講得出果d啦，風險大、回報冇保障，仲要放棄份工連本來份穩定既收入(雖然微薄)都冇埋，然之後仲會起碼浪費一年半載青春，到萬一生意失敗要返轉頭打工果陣，失落左既光陰會令我既打工事業變得更加暗淡。咁簡單d講，就係我覺得風險大，唔敢搏。

咁後來，我諗通左喎，豁左出去搏一搏，一搏就搏到衣家啦。咁我諗返轉頭，咩叫做諗通左呢？我諗通，決定出去搏果一刻，查實我對風險既擔心依然係同之前一d分別都冇，現實中考慮既因素，亦同未諗通之前冇分別。我冇突然之間覺得，風險細左所以值搏率高左，現實中一切都冇改變，只係我心態上唔同左。

諗唔通既原因，係我怕失去所擁有既野。呢個諗法其實都幾理智丫，不過撫心自問，呢d所謂「擁有緊」既野，查實不斷咁令自己覺得自己好唔妥，好唔掂，咁一樣令自己經常覺得好唔妥既資產，係咪真係應該咁怕去失去佢呢？豁出去既機會成本，往往冇想像中咁高，況且，即使衰左返轉頭，又係咪好似自己諗得咁差，真係咁難去搵得返d同衣家差唔多既野？

諗唔通既位，好多人覺得響現實果度，唔敢冒險。人喜歡不停諗呀諗，希望諗到一d可以減低風險既做法，令自己可以豁出去做。不過現實就係現實，現實唔會因為你諗得多，現實既風險就會細左。於是因為諗唔到方法去減低現實既風險，人就傾向按兵不動，日子一日一日咁過，對自己既人生同前景就越黎越急，可以俾你改變人生既時間變得越黎越少，困擾就變得越黎越大。

由諗唔通到豁出去搏既經驗，由CK決定做生意果一刻開始，不斷重複又重複，因為呢個心態，贏過又輸過，不過睇返轉頭，好彩耐不時就會有豁出去既衝動，因為即使唔係次次豁出去都贏得到，相比一直諗唔通而永遠原地踏步，我好清楚，我既人生都依然係向前行得多左好多。

大改組

對上一個週末唔響香港，回程既班機上面，我個腦不停咁諗呀諗，為一直以黎困擾我既樽頸問題，諗解決既方法。

我決定為公司做一次大改組。

其實過去幾年，公司都試過多次既起起落落。曾經有好幾次，我都以為死啦，呢一舖真係捱唔過，要摺埋啦。不過CK一直以黎都運氣唔錯，符符碌碌咁捱過一關又一關。以前遇到呢d幾乎要收皮既情形，感覺其實仲冇衣家咁大壓力，反而困擾左我近一年既樽頸問題，響公司有穩定盈利既時候，我既壓力居然仲大。

以前間公司細到蚊型一樣，冇形像冇包袱，唯一既concern，就係唔好死。於是乎，為左唔死，可以做到好盡，好唔顧image。反正捱過左眼前果關先算啦。就係咁樣，中小企既老闆就可以發揮無限創意，鍾意點玩都得。亦都係因為呢d創意，為公司捱過一次又一次既生死關頭。果種將生意「起死回生」既感覺，帶俾我無限滿足感，亦帶俾我好多自信心。

不過反而公司長大左，開始有d規模既時候，為左顧及形像，你既創意就反而冇辦法去得咁盡，好多以前敢做既衣家野都唔敢做，怕破壞多年辛辛苦苦所establish返黎既聲譽同image。衰就衰在，中小企既底，始終都係中小企，你又冇足夠既資源去好似d大corp咁去做brand building同好多唔同既campign，但係又唔敢好似以前公司細細咁打游擊，唔生唔死咁，最大鑊。

呢次既樽頸，最令我唔舒服既，係果一種作為公司領袖既無力感。以前做得到既野，衣家冇辦法再帶領下屬，做多一次。

我響飛機度，望住縛住我肚腩既安全帶，忽然響度諗：我應該係俾太多過往既經驗，縛住左自己既思維啦。

公司，要黎一次大改組。唔改，應付唔到將來，突破唔到樽頸。

我一直都誤以為個樽頸響金錢上，其實唔係。樽頸，響我既心態上。我到底幾時份人變得咁死蠢架？煩左自己成年都居然諗唔通？

我要幫我間寶貝公司黎個大改組，徹底果隻。風險同難度都唔細，不過，始終要做，而且仲係越快越好。雖然覺得擔心，但係一諗到去面對呢個challenge，我又覺得精神奕奕，過癮到極。

請祝我好運。

男人KTV

批評

私人理由，我總係對側田既歌，有多少情意結。

自從上年頒獎禮上面，佢多口講左句「乜又係我牙？」之後，今年佢既成績就好似下滑左唔少啦。我尋日拎起左本壹仔，見到佢既專訪。而訪問既內容提到有關接授批評呢樣野。

咁如果我問你，你係一個願意接受批評既人，抑或唔願意接受批評既人，你會點答我？

我諗大家由細到大，其實接受過既批評都應該唔少丫。家人既、親戚既、長輩既、朋友既，上司既等等等等，其實批評，幾乎日日都有。你硬食完人地既批評之後，好多人(可能包括我自己)都仲好鍾意同自己既批評做個follow up，然之後再去批評一下人地到底係咪一個「願意接受批評」既人。一determine左果位被批評既人係「唔願接受」果隻，仲會加多兩錢肉緊，踩多兩腳添。我有時響度諗，其實接受批評，唔難丫。不過眾多既批評聲當中，夾雜住好多噪音。難度唔係在於接受，而係在於點樣分辨邊d批評係constructive，邊d其實係毫無建設既噪音。個平衡，最難搵。

你地查實有冇試過俾人話，你對某d人既批評唔上心？我查實成日都係咁。咁唔上心既原因係咩？因為我覺得某d批評我唔buy，甚至覺得有部份係別有用心果d，我通常都話Q知佢。咁唔理得多，就越俾人鬧得勁，鬧到你，覺得煩為止。

我又一樣有耐不時就俾人話，對人地既批評太過上心，太過在乎人地點睇啦。咁我在乎某d人既批評既原因，係因為我覺得佢講既野，某程度上係真係反映左事實，亦講出左我響現實中既不足。我唔理，唔上心，唔係好掂。在乎批評又多少會為自己添一d壓力，咁，凡事都有兩面既。

咁到底我自己係唔係一個願意接受批評既人？我都唔知，我淨係覺得，要有把握分辦邊d批評值得聽，邊d唔值得聽，其實一d都唔容易。

我都耐不時會話阿邊個邊個係個唔接受批評既傻仔。有時諗深一層，佢可能唔係唔接受批評，而係唔接受「我」既批評遮，歸根究底，其實可能係我唔夠班。

而個傻仔，查實係我都唔定。



又話時話，你地有冇買佢隻新碟？