人地個B最好玩

朋友兩公婆響外國返黎，約左Stephy同我去飲茶。

朋友今次，仲帶埋佢地兩個既BB女返黎。BB女快滿一歲，好鬼過癮。

BB呢，永遠係人地果個好玩既。

咁通常，每逢呢d情況呢，朋友就會問：「CK，幾時到你做老豆呀？」

以前我都幾抗拒既，不過近呢一年呢，個感覺，好似都OK左d喎。尤其是，見到人地個BB咁鬼得意過癮，我諗下，如果有朝一日，自己有個仔有個女，又真係幾開心既。

BB女唔知做乜，同我好似都幾夾喎。我抱住呢個BB女，玩呀玩，BB女笑到「Ka Ka」聲，時不時又「Buuuuuuuuuuuuuu」一聲，噴到我一面都係口水。我有時諗，呢個世界其實有咁多好演員，做戲咁叻，不過幾叻幾好戲都好，佢地都係冇能力，可以扮得出小朋友同BB仔果種未經社會污染既神態出黎。

咁正當我同個BB玩得好開心之際呢，朋友就開始同Stephy「分享」佢當日生仔既過程啦。

繪形繪聲呀大佬。

總之係好痛，勁痛，同超級痛咁啦。仲未計果d血淋淋既場面。

朋友同Stephy好似講笑咁，我抱住呢個BB女，坐響佢地兩個女人既隔離，聽住佢地描述呢個生仔既過程呢…

拿，呢個過程神性還神性，但係我真係開始覺得冇咩胃口。

我一邊咬住舊蝦餃，一邊想像下，假如我地兩公婆決定要生BB，咁自己既老婆遲d都要咁樣痛法呢，唉，即刻心都寒埋。

仲有，我查實有d怕血。

各位媽媽既老公，我諗，你地真係應該對你地既老婆好d啦。

咁鬼痛…

祝大家有個愉快既週末。

(即是咁，下次再講生仔過程呢個topic既時候，唔該，唔好響食飯時間丫。)