兩個喪禮

教堂之內，神父劃上十字聖號，宣報整個喪禮禮成。

我緊緊拖住落淚中既Stephy，心呼吸。

在我週圍的人，都哭了。

*****

一年前左右，我因工作關係，參與籌備一位長輩既喪禮。

長輩生前係個出色既商人，有頭有面。佢既喪禮，大概係CK人生之中，參加過最「盛大」既喪禮。

我置身呢位長輩子女既家庭會議之中，準備聽從佢地既指示去幫佢地張羅。

呢班子女既焦點，都聚焦左響「如何唔好失禮」、「如何辦得有頭有面」等議題之上。一班子女好似仲響度暗地裡較勁，響呢件件事情上，要爭住做話事人。我當時響度諗，佢地老父既喪禮，係一個面對所有生意朋友既機會。呢位長輩離開之後，大家都響度估，往後既日子，呢個有頭有面既「華麗一族」，到底會由邊一個話事呢？我估，大家都希望成為呢個喪禮既話事人，原因之一，就正正係佢既「象徵意義」。

由扶靈名單到靈堂既企位，大家都有過激烈既爭論。我作為一個旁觀者，心裡面不禁抽左一口涼氣。

因為，呢個喪禮，對佢地既子女黎講，某程度上係一場show，一場權力既角力show。

喪禮中，到處都係焦點。唯一唔係焦點既，反而係離開左果位亡者。

喪禮最後辦得好得體，哀傷既音樂聲，掩蓋住各位子女各懷鬼胎既心情。

我坐響靈堂後排既位置，心，好寒。

*****

當神父宣告禮成既時候，我既腦袋，忽然諗起呢個一年前既畫面。

今日既喪禮，規模細得多啦。教堂之內，冇舖天蓋地既裝潢，亦都冇政商名人前黎致祭。出席既，亦只係最親近既親友，儀式亦簡潔得多。

大家都哭了。

我響度諗，伯伯離去固然係不幸，不過，大家都能夠真心地哭出來，我覺得，其實係福氣。

真心流出既眼淚，證明左大家當中有「愛」既存在。

一年前果一次既喪禮，雖然富麗堂皇，不過，我一點都感受唔到果份愛。當日果種心寒既感覺，至今仍記憶猶新。

今日，雖然大家都唔開心，不過心，很暖。