手下留情

阿嬌單野，忍唔住都要講多兩句。

先旨聲明，我唔係Twins既Fans，對阿嬌呢個artist亦冇咩特別好感。只不過，我咁諗，即使面對d自己唔鍾意既人，又甚至已經被標纖為壞榜樣既人，都冇乜必要太過黑心。仆，人地仆左啦，係咪咎由自取呢樣見仁見置啦。不過旁觀既，係咪有必要去嫌人仆得唔夠難睇，再期望人去仆得再傷d，死得再慘d，又或者再仆多三五七次俾你睇呢？

我鍾意呢一篇。

又講時講，新聞話，有家長因為呢單新聞話阿嬌教壞細路。一怒之下丟晒所有Twins相關既product同唱片，要同佢地劃清界線咁話。

我記得細細個果陣，我阿媽同老豆就教我，每個人都有優點同缺點，有好同唔好既一面。要學習，就只要學人好果一面囉。至於人地唔好既缺點，自己要識得分，唔好學。

香港地既道德教育，我總覺得太過片面，亦唔注重思考。對好多道德上既問題，往往都係非黑即白，見山是山。好人永遠係好，衰人又永遠係衰。現實社會根本就唔係咁簡單，每個人，每件事既背後都有好多原因同背景。但係一直以黎，教育都唔會提倡小朋友、年青人凡事要去諗多一步，去諗下每件事點解會發展成咁。

於是呢個一向係「好人」既姐姐，都中左單咁大既「醜聞」既時候，連做家長既，都唔知點同個仔「交代」好。

證明左一樣野，片面同單一化既價值觀、道德觀，經唔起社會現實既真正考驗囉。

多些少角度去諗一件事，對每件事情既理解又會唔同，包容亦都會多d。只不過，響香港硬係唔多興呢樣野，普遍既教育都傾向所謂「政治正確」，總之做左乜乜乜事，就係咩咩咩既人啦。

社會，冇咁簡單啦。

慣性地用咁簡單同片面既角度去解讀呢個複雜社會上既每一件事，又或者自己響現實社會所遇到既每件事情，點掂呀。

阿嬌出事，做家長既淨係發狂咁丟晒d唱片，諗都唔諗一夜之間態度一百八十度轉變。小朋友看在眼裡，佢地查實又會學到d咩？

咪又係一次非黑即白，見山是山既完美演譯囉。

家長先係影響小朋友最多既人。埋怨自己個仔女被明星「教壞」之前，有冇諗過，自己每日既一言一行，其實先至帶俾子女最大既impact？

*****

後加一段，補多兩句想講得清楚些少。

寫呢一篇呢，唔係想去評論到底事件既當事人，到底有冇做錯，又或者做得有幾錯。

只係覺得，做人呢，無乜謂要去期望他人太過折墮啦。同你無仇無怨既，望人折墮固然係黑心，即使面目可憎，神憎鬼厭，得罪過你既都好啦，望佢折墮，都適可而止啦。豬肉佬賣舊豬肉俾你發覺貨不對板，豬肉佬固然有錯，不過你怕且都唔會望個豬肉佬轉頭行出街俾車車死掛？個個都望周圍既人仆街，咁呢個世界，只會越黎越唔可愛架啦。

我突然之間諗，以前中國有好多酷刑，去懲治犯人。點解d刑罰要設計得咁變態呢？係唔係人既本性，就係鍾意睇到一d自己唔喜歡既人，俾人折磨到得返半條人命血肉橫飛從而先得到快感呢？

第二樣，有關做家長。

Hana姐講既野，我認同既。不過我諗緊既又係另一個問題。阿嬌既事，如果小朋友真係因為佢係偶像，而跟足佢做既所有野，即使係壞事都覺得冇問時的話，對家長黎講，呢個當然係惡夢。問題係，做家長教育子女既時候，唔係應該淨係叫個仔去學阿邊個邊個咁簡單囉。好似CK媽細細個教我咁，每個人都有好同壞，要學習，就只學好既，呢樣野，自小阿媽就不停貫輸比我。

我覺得CK媽自小將呢個觀念貫輸俾我既聰明之處係，佢一早就話左俾我聽，呢個世界，唔係咁簡單。去做一個點樣既人，係要你自己用個腦去選擇。比如大部份人會話阿嬌最唔好既地方係「虛偽」。咁，如果你知道，呢樣野係唔好既野，咁你係咪都要去學？點解d細路即使見到偶像唔好既一面，都要照單全收，要走去學？香港最大鑊既問題係，阿媽同個女講呢個人係好人，咁佢永遠就係好人，佢既所有部份都係好既。連做家長都咁樣去睇每一件事，當有unexpected既事件爆左鑊既時候，點會唔擔心仔女既道德觀崩潰？

個問題係，普遍家長，甚至學校貫輸俾小朋友、年青人既道德觀，同現實根本唔接軌。將道德觀變成非黑即白，唔需要用腦去分析同思考既「規章」，當呢d規章受到現實既衝擊時，習慣缺乏左原因背景、上文下理既backup去睇事物，茅盾就自然出現，一直以黎既觀念，亦都崩潰。

或者我講完呢一大段，好多人會勁鬧我都唔定。不過幫子女建立道德觀，培養佢地凡事用個腦去分析對錯，只有家長先有呢個能力同本錢。一個所謂形象健康既偶像，唔會有能力培養到你個仔女識得用自己個腦去分是非黑白。社會既現實本來係咁，你卻不停咁教個仔呢個世界係另一個樣，到佢地一直以為果個世界既模樣，終於同現實既殘酷碰個正著既時候，你叫佢地如何自處？

拿拿臨丟晒d唱片？又有咩用？