那一顆吃不到的葡萄

早幾日睇有線Money Cafe，施老闆講左句咁既說話：「讀好多書既人通常都唔去創業架啦。創業通常都係走投無路先去創…」大概係咁上下啦，字眼上可能有d出入都唔定。

印像中施老闆好似唔係第一次咁講架啦。每次聽到，我都總有些少會心微笑。

講真丫，以前我都好想入果d世界性既大機構打工。除左覺得待遇同收入好之外，最重要係可以透過呢d公司自己既「品牌」，去確認自己既價值。既然呢d名牌機構都睇得起我，願意將我羅致旗下，咁我仲唔係社會精英？

oops，咁事實證明左，我絕對唔係個精英囉。事實上我係連個interview既機會都冇。一來我諗我當時既資歷對呢類大firm黎講可能真係太唔吸引啦，二來呢，我估我當日寫Resume既技考，實在係太過拙劣啦。所以人家HR見到我份不知所謂既履歷，應該轉個頭就掉左去碎紙機裡面。

咁如果今日你問我，衣家仲想唔想去果d名牌大機構道做，我一定會「極堅定地」答你：「唔想」。

原因之一，當然係因為，果粒當日吃不到既葡萄，對我黎講依然係好鬼死酸。更重要既呢，係因為食唔到果粒提子之後，我居然誤打誤撞，幸運響地上面搵到個又大又多汁既生果(至少我自己覺得係…)，而呢個生果，又足夠食得我飽。

出黎社會做事超過十年啦，好多同我同期畢業既朋友，尤其係當日讀書最醒果班精英，好多都去左果d名牌大Firm打工。當然啦，呢d公司，專收叻仔。一直係學校裡面既精英既佢地，自然成為左呢d公司既獵物。十年之後，部份認識既朋友，都已經升得好高啦，亦都應該搵到唔少錢。只不過，我主觀地覺得，佢地硬係好似差左些少唔知乜野。

越響呢類公司做得耐既朋友，就越俾到一個「活在框框」之中既感覺我。當然，不能不承認，我呢個感覺可能係好主觀同好冇根據既。不過佢地既人生哲學同待人既方式，俾我既感覺係，無時無刻都好似受到好多限制。例如說話佢地會變得好小心，好多我覺得好casual既topic佢地變得唔敢隨便講，好似好怕得罪人咁，而佢地個人會經常好似響戒備狀態一樣。而越做得耐，爬得越高既朋友，俾我有呢一個感覺就越嚴重。我唔知係咪佢地既工作環境實在係逼得太緊，而且大機構之中人事鬥爭異常激烈，必須隨時隨地都要將自己放響一個alert mode，先至可以平平安安咁生存落黎。如果係的話，我覺得最得人驚既，並唔係佢地返工時候所承受既壓力，而係當呢種待人處事既態度，慢慢咁侵蝕左你既人生，讓你響日常生活既時候，都習慣左用呢一個mode去生存。

嘩，咁做人，辛苦左d囉，我覺得。

係咪我既偏見呢？可能係啦。不過每當我早上響中環既老星，施施然嘆緊杯Mocha既時候，望住出面一的個又一個西裝畢挺但眉頭緊皺愁眉深瑣既人，急步咁趕返辦公室既時候，我總會慶幸當日我冇能力食到果粒，似乎係有甜又多汁既葡萄。

寫到呢度，我突然諗，我可能應該推翻我早幾日所寫過既邏輯。事實上，我今朝所感受到既幸福，的確係透過一點比較而感覺到既。

祝大家有個愉快既勞動節假期。