Share my mind, again.

唔知點解，講開呢個問題，諗下又想講多d，諗下又再想寫多d。

有朋友講話，喂，你同個別同事特別熟，會唔會影響團隊精神呀…

hmmm，呢樣野，我諗要先睇睇公司裡面既編制囉。講真，我覺得朋友講得幾岩架，老細如果選擇性只同某d人熟，對團隊幾大影響既。不過公司裡面既編制，其實就反而俾左一個合理既解釋，點解呢d事會有機會發生。一間商業機構，有好多唔同既function，亦會有按照呢d function，有好多唔同既team。老細in a way，都係呢個編制裡面既一部份，一樣會有自己既team。只不過呢個team，可能主要既function係負責一d overall既管理工作。同自己team裡面既人比較熟絡，因為呢班係同你work得最close同最多既人，我反而覺得其實正常不過。同事亦都理解。

不過問題就出響，到底做老闆果個，會選擇響呢個同事未成為team member之前就同佢熟絡丫，還是等佢成為左自己team member之後先至會變得熟絡呢？我自己就會盡量選擇後者。是關前者呢，我覺得係最容易惹人誤會同不滿既做法，亦為好多擦鞋仔提供左市場。不過當我選中左你入我既管理team裡面，我反而就會同你講個信字囉，亦會覺得，大家一齊做野，好多野一齊去諗，我唔希望大家會有太多隱瞞，更加希望你可以share我既諗法，同我建立多d默契囉。

又有另一個問題，同一個team裡面，如果親疏有別，就幾煩囉。咁如果你問我心入面有冇親疏之分，講真，總會有既。Kelly做得最耐，相處既時間最多，默契相比其他同事，自然比較好一d。不過去到自己果條team既層面，你點都要盡量壓住呢個心底裡既「親疏」之分架啦，at least做得唔好太過張揚，如果唔係大家都唔開心。不過我覺得，呢個小小既management team裡面，關係其實不斷演化既。隨住大家經驗既增長，默契既建立，有d同事既角式會越黎越吃重，亦因為每個同事性格上都有d唔同，即使一個細細既team之中，大家都不自覺咁扮演緊唔同既位置。有d人係leader，有d人係follower，有d人係謀臣，呢d分工響不知不覺咁形成左，我從冇刻意model呢個team structure出黎，但係冇刻意既安排，反而work得越黎越順滑。

仲有另一個問題…

係丫，人人都知我同Kelly熟，咁係咪一個人同我熟，就冇辦法做到所謂我條「針」呢？

得唔得，唔係我能力範圍可以控制架喎。問題係，Kelly自己，點樣同其他同事相處。其實除左Kelly之外，同我work得最close既management team，響成個公司既架構裡面，佢地都扮演住同一個角式：係CK同其他ground level同事之間既橋樑。當然，呢個橋樑既角式，有同事做得比較好，有同事做得冇咁好。咁呢樣野，同經驗、性格都有幾大既關係既。老細需要一條針，去了解同事當中發生緊乜野事，同事們，其實一樣需要一條針，去了解老細諗緊d乜。問題唔係話，呀某某同我熟，就carry out唔到某一d function既。如果大家既思維係覺得，下屬同老細既立場必然係對立的話，咁情況當然係，同得老細熟既人，就係老細果幫人，係自己既敵人啦。事實上呢，事情往往都冇咁簡單既。現實係，有d人，係有能力「左右逢源」既。同老細friend之餘，亦有辦法取得其他同事既信任。呢個，亦正正係佢地既價值。

我唯一需要配合既，係盡量響公司管理既習慣上面，俾一個「老細並無意同伙計搞對抗」既感覺所有同事。有個咁既基礎，Kelly，同埋我幾個management team既team member，就比較容易做野囉。

講真，並唔係想像中咁難，只係老細肯唔肯做架咋。