零八完結前

08年完結之前，有幾件小事，響我既腦袋裡面留低左d記憶。

*****

stephy有一個遠房表妹，會考之後入左商科學校讀書。今年剛剛畢業。

呢個遠房表妹我見過好幾次，第一次見係響stephy同我既婚禮上面。我對佢既印象幾深，佢唔係特別靚，不過成日都笑，好好禮貌，好乖，好好家教。我同佢傾過下計，佢俾我既感覺呢，好positive，即使響一d好唔好彩既時候，都依然好正面同樂觀。

或者，真正令我對佢留低深刻印象既原因，係因為佢既特徵。佢係一個失聰既妹妹。

表妹畢業之後，響志願團體所辦既機構做事，機構既資源所限，所以可以俾到佢既工資，其實用黎生活應該係相當困難。不過失聰呢一個特徵，局限左佢搵工既能力。

早幾日，響一個飲宴裡面撞返呢個妹妹。聽完佢講佢既工作近況之後，唔知點解總係覺得個心實左一實。

忽然諗起，其實我都係一個僱主。會唔會有野我可以做得到？

我會記住呢個小妹妹既。

*****

清理電子郵箱既時候，俾我見到一封一個未畢業既大學生，響上年寫俾CK既一封舊既電郵。

電郵既內容大概係話，CK既出身好，係個有錢仔，所以我寫乜野有關創業呀、be positive呀，唔好放棄之類既野，根本唔會有任何說服力。因為我既起跑線比佢地前好多，再寫呢d野，只係俾人覺得我響度講風涼話。

我記得呢個電郵。好耐之前曾經一度話「妖，唔再寫啦！」，就係因為佢。

08年既最後一日，公司裡面既同事都響度嘻嘻哈哈，放鬆心情響公司hea住工作。我望住呢一班同事，忽然響度諗，冇錯丫，我既出身，的確比佢地好。我係一個超級幸福既人，細個既時候食飽無憂米，之後又有機會受好好既教育。假如我他朝有一日，真係可以成功既話，其實我既故事，可能都唔會有乜代表性既。我事實上的確係太過幸運。好多野，係理所當然。出身比人好，自然應該俾其他人，做得多一d，努力得多一d。

我既同事們，大部份都冇我咁好彩，出身都冇我咁好。不過我諗，如果我將來真係僥幸成功左，我既故事即使幾唔meaningful都好，我都希望我眼前既呢班同事既故事，對佢地身邊既人會變得meaningful，又或者encouraging一d。佢地當中有出身草根，有讀書唔成，有冇錢出國讀大學，有學壞過但最後回頭是岸既，總之乜野都有。如果佢地既將來，可以俾人覺得佢地能夠出人頭地既話，佢地既故事，應該會比我既故仔，黎得meaningful好多好多。

2009年，我希望我有機會參與造就呢d故事就好，哈哈。

新既一年，祝大家事事順利，輕鬆渡過嚴寒既冬天。

聖誕交叉扑 之 《小心有牙》

嘿嘿，查實，真係估唔估到係邊個寫既呢？

*****

《小心有牙》

平安夜早上，David和Maria在禱告會中，
在眾多教友面前宣佈婚訊；獲得大家至誠的祝福。
這對準夫婦自幼受洗，是虔誠的博教教徒，
他們堅持擁有聖潔的身心，等待婚後才能有性行為。


David和Maria在同一所大學畢業，
他們的男女同學，順理成章成為David和Maria的戥穿石和姊妹團。
大學同學們背後取笑David和Maria堅持婚前處子之身，
對於未經人道的David和Maria，性行為沒有半點實戰經驗。
同學們決定整蠱這對新人。


在婚禮前一夜，姊妹們陪Maria在家中上頭，
伴娘的男朋友正是David的伴郎，伴娘私下對Maria說：「我聽男友講，佢話David嘅陽具好粗壯，直徑有成三吋咁粗！」
Maria驚愕：「吓！我無聽錯呀？直徑有三吋粗？乜都『質爆』喇！」
她產生婚前恐懼症，應該是性行為恐懼症！


另一面廂，David在婚禮前一夜，跟兄弟們在酒巴飲酒，
伴郎的女朋友正是Maria的伴娘，伴郎私下對David說：「我聽女友講，佢話Maria個陰道長有尖牙！」
David驚愕：「吓！我無聽錯呀？下面有牙？乜都俾佢咬斷喇！」
他產生婚前恐懼症，應該是性行為恐懼症！


婚禮尾聲，David和Maria對於今夜要洞房感到害怕，
Maria問伴娘如何是好？伴娘說：「如果佢嘅陽具咁粗，不如妳交合前，用手頂一頂佢陽具，感受一吓佢係咪真係咁粗先喇！」
Maria點頭明白。


David問伴郎今夜洞房如何是好？伴郎說：「如果佢下面有牙，不如你進入之前，用手試探下佢，feel吓佢果度係咪真係有牙喇！傷手好過傷細佬嘛！起碼無咁傷吖！」
David點頭明白。


是夜，熄燈洞房，兩人在黑暗被窩中，
David用手去試探Maria，Maria隻手在門前等候David，
David隻手一接觸尖指甲，嘩！兩人面色大變！
Maria心諗：「嘩！真係無講錯！好粗呀！直徑唔止三吋，四吋都有！」
David心諗：「嘩！真係無講錯！有幾隻尖牙呀，仲好鋒利呀！」
是夜，這對新人係咁咦錫吓愛撫吓，便鳴金收兵。


第二天，夫妻各自打電話給伴郎伴娘，問如何是好？
伴娘答Maria：「哦！唔使驚！陰道口有彈性，妳按部就班，用自慰器自慰，由細size用到大size，假以時日，一定可以容納David的三吋直徑！」
Maria同意照辦。


伴郎跟David說：「哦！唔使驚！或者搞錯，可能係Maria隻手啫！嗱！不如你今晚『裝』吓佢沖涼，睇吓Maria會唔會用牙擦喺下面擦牙啦？」
David同意照辦，並應承今夜偷窺之後，馬上call伴郎報告。


是夜，David從浴室門的百葉透氣隙縫，偷窺浴室內全裸的Maria，
之後馬上call伴郎。


伴郎：「點呀？究竟有無牙呀？」
David：「何止…..何止…..有牙呀！佢仲用下面啲牙…..食緊一條青瓜呀！」

(特別鳴謝渣沽兄幫忙搜片)



文章又hana提供

一年一次

all time favourite..

聖誕快樂。

乳豬全體

踏入左秋冬之後，stephy同我其中一個去得最多既週末「節目」，係去飲。

街坊酒樓又好，五星酒店又好，結婚酒席來來去去都係果幾味菜式，查實幾悶爆。老老實實，呢期實在食得太多，我覺得自己好似有「乳豬恐懼症」咁，一諗起乳豬陣味，即刻乜胃口都冇晒。

兼且我膽固醇偏高，呢類咁既油利野，食得多冇乜益。

不過呢樣都仲係其次，俾人情先係致命傷。由年頭至今，我粗略估計呢個年度stephy同我夾埋俾出左既人情錢，應該至少夠我地兩公婆去澳紐豪玩一轉。如果唔係部份九唔搭八既飲宴，我地借頭借路唔想去推鬼左變成比一半既話，唔好話澳紐，去歐洲都或者掂呀。

呢一大堆既飲宴當中，有部份我既身份係一個兄弟，emmm，即係鄧穿石。當中當然有部份係我好好既老友，不過有更多係唔知點解，忽然有人會當我係好老友而我自己又一直唔知既。呢個情況，自從我早幾年買左架前七開始，就好似發生得越黎越多。有時當有個好耐唔見既「朋友」，失驚無神話下個月結婚要搵我做兄弟果陣，我有時真係想爆一句：「喂，哥仔，你唔係朋友少到咁下話…」

咁過去果三幾年，我諗我大大話話做左十幾廿次人地既兄弟。除左少部份真係老友鬼鬼既好朋友結婚之外，其餘既「做兄弟」經驗，好多時係三幾年都冇見過個friend，跟住婚禮前幾日我先第一次認識佢個老婆。婚禮當日逗左你幾十蚊兄弟利事之後，然之後俾一班從來都未見過既姊妹，九唔搭八咁玩左成朝。除非呢班姊妹裡面真係有一個半個特別標緻可人，促使我會主動抄佢牌保持聯絡既話，其他一眾姊妹，他朝響條街上面碰個正著，我大概都應該唔會認得出佢地既。

至於我同個新郎哥，通常響飲宴過後幫完佢執頭執尾之後，往後幾年都可能未必會call出黎見面。even婚禮當日同新人影過既相，其實有唔少都係冇乜回頭。

我有時都幾懷疑，大哥，三五七年你都唔搵我一次，咁既交情，我都居然夠quali做你兄弟？唔係下話？

衰在我又硬係唔好意思推囉。

*****

Kelly靜雞雞俾左佢張婚禮請柬初稿我睇，都幾靚丫。

kelly係少數我能夠真心戥佢高興既新娘子。老實講，呢幾年去飲就飲得夠多啦，能夠真心戥一對新人高興既，其實寥寥可數。

d完全唔熟既朋友，純粹俾面派對果堆唔計數丫。即使係熟既，我都唔能夠個個都真心祝福佢。

我有時覺得，好多人結婚，好大程度上係因為個生理時鐘行到去「應該結婚」果一格度。我去過既飲宴當中，試過個新娘子響「女朋友」年代已經多次俾個新郎哥出手打傷又有，又試過一對新人男既爛滾非常加上一腳踏幾船，但個女既一直蒙在股裡又有，男既窮到褲穿窿女既卻又繼續日日碌爆卡爭到成身卡數都要買LV又有，總之形形式式。我明白清官難審家庭事，我亦唔排除當佢地結左婚後一切都會變好既可能性，不過好多時遇到呢一類咁既新郎新娘組合，去飲既時候我心裡面總會諗：「唔係下話，未結婚都已經搞成咁，結左婚之後你地點算呀？」

咁既背景，點樣可以「真心」戥佢地高興呀？

於是口裡面響度懶高興咁祝一對新人白頭到老永結同心既同時，心裡面既感覺卻好似準備送佢地上刑場，臨死之前一齊食餐最後晚餐咁。

well，可能我講得太誇張啦。

唔好誤會，我並唔係唔相信婚姻，事實上我相信婚姻係可以令人生變得好美滿好精彩。不過，我又必須講，marriage is not for everyone。有d人係咪真係嫁得過，有d婚係咪真係應該結…

諗清楚至好。

那一個夏天 (4)

留學生涯既最後一年，我同一班最好既老友記，組隊參加左個社區足球聯賽。

今日既對手，係榜首既鬼佬球隊。鬼佬球隊響聯賽裡面實力超班，出戰咁多場從未輸過，而且場場大炒對手。

我地算係聯賽榜既中上游，表面上既積分唔算爭太多，好似有得追咁。不過我地出賽之前，睇過佢地踢左幾場，心裡其實有數。對手既實力，高我地好幾皮，正計，冇乜得鬥。

不過唔知係咪因為後生？打呢場波之前，一眾隊員連同我自己，反而對呢場比賽萬般期待。雖知勝算唔高，但總係想狠狠咁踢一場好波，而且面對強勁既對手，反而覺得興奮莫明。

當日既呢股拼勁，好懷念。

球賽開始，我地隊波一直捱打。開賽冇耐就失左一球。不過輸左一球既我地，居然可以一直咬住呢個比數冇被拋離。咁一日未被拋離，我地一日都搏盡去打。我係球隊裡面打得最前既前鋒，所有響後場斬上黎既波，我都一律出盡力狂追。偶然起到一踢射門，心裡面自己總會同自己講：「嗯，打得好呀基仔，下一次機會要把握得再好d！」

如是者跑呀跑，跑左唔知幾多段。三十幾度之下，開始覺得個人有d愣。

頭好暈，每次發力起跑時總覺得自己就快要跌到咁。我不停咁問自己：「基仔，咁快就認輸？」

「當然唔係！冇咁容易認輸架我！」我響腦袋裡面自問自答。

開波既時間大約係下晝五點，打到近完場既時候，已經係日落時份。我望住眼前既籠門，漫無目的咁起腳狂抽，隱約見到籠門後面，有兩個…咦，唔係喎，好似係四個咸蛋王咁款既太陽。

球證吹長雞完場，我暈眩得好厲害，響聽到雞聲既一刻，忍唔住跪左起草地上，完全冇力將頭抬起，不停咁嘔吐。

之後既事，大概係一班隊員將我送左去醫院，記憶之中醫生既診斷好似話我中左暑。

果場比賽，結果我地最後都係輸左一比零。

鬼佬隊最後響毫無對手威脅之下順利贏出聯賽冠軍。至於果場波，應該係佢地贏得最少既一場比賽。而我響果場比賽之後，休息左成個禮拜先可以稍稍復原。

我有時諗，當日，我其實算係贏抑或輸？還是有太多既事情，根本唔應該用贏同輸去衡量？

*****

最近既生意問題依然令我頭痛非常。

最近同事成日笑我鍾意對住隻窗發吽逗。今日望住窗外既中環街景，唔知點解忽然閃過呢一段足球場上既舊片段。

好雜記

- 十五分鐘之後要開會，未開會前呢十五分鐘，一個人響房裡面行又唔係坐又唔係做野又唔係。時間吊吊fing。頂，邊鬼過約下晝兩點幾開會架？

- 金融海嘯之後，做得最多既野，係今日的我又打倒昨日的我，昨日的我又再打倒前日的我。而明天的我即將又打倒今日的我，但係明天我既idea，搞完一大餐可能同前日的我其實係一樣。五時花六時變，呢段時間，我班伙計應該最受罪。生意既idea數量好多，不過質量欠奉。面對一池死水般既市況，忽然好似乜都冇乜把握，感覺茫無頭緒。

- 星期日晨咁早有人約appointment，唔去唔得。星期日早上仲要晨早起身，對我黎講係晴天霹靂。我呢，真係越黎越懶。

- 下個月朋友結婚行禮，我要負責幫佢響教堂裡面彈琴。彈琴一向在我黎講都唔太難。當日下爬輕輕應承左人，時間逼近先發覺自己呢排完來冇乜時間練琴。忽然覺得呢鋪大檸樂啦。人地既大日子，我真係唔係好想破壞人既美好回憶喎。覺得連彈琴都有壓力既感覺，久違啦。

對上一次，應該係成二十幾年前啦。果陣俾班裡面個miss老屈左幫合唱團伴奏，臨時臨急又係冇乜練琴，驚到丫果次。

- 老婆要消假，被逼呢個月要放幾日假。問我得唔得閒去台灣行一轉。我查實幾鐘意台北，好想飲返杯地道既珍珠奶茶。不過一打開個agenda黎睇，密到插針都插唔入，唉。

去仙跡岩飲算啦，唯有。

- 同事send左同倪震搭上果個城大女生個blog既link俾我。真係幾好身裁喎。

班女仔同事們食飯果陣鬧倪震同呢個小妹妹鬧到咬牙切齒，順口問我點睇喎。

咁我又順口咁話，個女仔都幾靚女丫。順口講句遮，俾班同事插到我丫…

咁係幾靚幾好身裁嘛。雖然，我支持我既少年時偶像周慧敏。

*****

好，去開會。

祝大家有個愉快既週末。

海嘯日記

金融海嘯既威力，踏入十二月之後，響我公司既生意上進一步浮現。

每年既年尾，都必然係生意最淡靜既時候。今年呢個景況，將「淡靜」既生意upgrade到去「死寂」既級別。靜到，幾乎耳鳴。

近幾日終於收到有行家捱唔住，會響月內結業既消息。經濟環境如此，倒閉潮吹到我做緊果行其實指日可待。不過呢個即將結業既行家，今次成為左我地業界既「第一」，同佢咁多年生意手法都一成不變既作風其實不無關係。呢一浪佢做第一，響行家既圈子裡面其實多少有d眾望所歸feel。

其實講就輕鬆，呢d消息傳到我地耳裡面，壓力唔大就假。

*****

經濟寒冬裡面，最難保存既係有兩樣野：現金同士氣。過去幾個月，我逐步剎停左一d比較long term，而又唔能夠即時發生利潤既project，希望盡量減低燒銀紙既速度。不過選擇邊d停，邊d繼續，其實都幾花精神去揀。我查實，都唔知自己有冇揀錯。

同事既士氣係另一個我想努力keep住既野。經濟低迷生意淡靜，前線同事既士氣自不然日趨低落。前線同事士氣低落，引發佢地更加冇心機搵生意(因為覺得煲黎煲去都只會係冇米粥)，一個惡性循環就此啟動。啟動左呢個cycle，只會令公司死得更快。

呢兩三個月我千方百計希望話俾同事聽，衣家唔係世界末日，俾d心機既話，生意係依然可以搵得到。同事們聽唔聽我支笛？一半半啦。我唔係咩魅力型領袖，亦都冇Obama既口才，所以我估我既說話對佢地既士氣提升能力有限。我唯一可以做，就係承諾佢地呢段時間唔會炒人cut cost裁員囉。至於下一年有冇人工加，我都只能夠保守地講，響「許可」既情況下，下年會有「適量」既加薪咁囉。官腔過特首，查實可能講左等於冇講。

反而銷售策略上，變動就比較多。以前一個餅夠十個人分，今日呢個時候，個餅大縮水，只能夠五個人食。假如銷售既策略同以前一樣，大概只能夠分到以前既一半生意額，即係一定唔會食得飽。咁如果要食得飽，方法就只可以去搶埋人地果份黎食。好似好殘忍，不過商業社會嘛，你唔搶人人搶你呀。

最近既銷售焦點，都盡量shift左去針對competitor之上，但求可以盡量從佢地既手上搵多啖飯食下，咁，最近幫襯我既客仔，的確多左一部份既新客，來源自從行家手上搶過黎。咁我諗，家陣用咁大力搶埋隔離啖飯俾自己食，先至勉強夠飽，如果冇將策略調節到去針對性地「搶人飯碗」既話，怕且真係等餓死都似。

經濟不景既時候，最能讓人感到商業社會既殘酷。每次呢d時候，都總會淘汰一大班玩家。捱得過呢個浪留返響度既玩家，大浪過後必定會海闊天空。

但願呢一浪打我唔死就好。