大前題，小困難

行家食飯，個個響度話自己班伙計怕困難，一遇到些少困難就打退堂鼓。

以前行家聚會時，類似既埋怨聽得並唔多，唯獨係近大半年，聽得特別多。無他既，困難，市道好果陣邊有架，係依家咁既市，大家先要面對困難架之嘛。

我有冇遇到同樣既問題？emmm，嚴格黎講我覺得我既伙計唔係「怕」困難，而係唔習慣去面對困難多一d。

今日我同一班同事開會，議題係一個新project應唔應該做。我唔介意同事們話俾我聽，個project利潤太低，代價太高，所以唔值得做。不過會議裡面，同事們不停響道提出，做呢個project有好多難處架：「唉，ck，你唔係前線你好難明架啦，要做呢樣野，真係好難囉，又咁咁咁既問題，又有咁咁咁既難處…」

「咁，係咪即係唔值得做呢？」我問。

「總之好難啦…好難架ck，唉。」如是者，「好難」呢個詞語，一個meeting裡面出現左幾十次。

講左一大堆野之後，同事們既結論大概係，呢個project利潤高，好吸引，做成左甚至可以幫公司向上跳多一級。不過，唉，總之好難啦…

我聽完既結論係，呢個project值得做，但係有難度。

開會途中，聽到同事們既說話，我心裡面不其然有d火光既。一個project，pros同cons你地都陳述晒出黎啦，每一分錢既盈利都有風險同代價。權衡利潤同代價之後，得出既結果，就係值得做，又或者唔值得做囉。我討厭一個人不斷響度強調一件事有幾難有幾難，講完又講，重覆又重覆之後都依然係原地踏步。咁到底係做抑或唔做？人要向前行架，當遇到困難既時候，你既選擇可以揀衝過去，又或者掉轉頭走，不過好多人既選擇係企響個困難前面，不停大嗌：「好難呀，唔知點做呀…」，跟住無止境停響度唔郁，最後不了了之。

「不如將你地求先講果d難題，逐個列出黎，大家諗一諗睇下係咪一d我地能力範圍解決唔到既問題先丫…」我話。

因為我呢句話，會議無啦啦就延長左差唔多兩個鐘。同事應該響度暗中咒罵我。

不過當認真拎晒d問題上檯諗既時候，呢d佢地口中不斷話係「好難」同埋「CK，你唔明架啦」既問題，起碼有一半係即場諗到辦法解決既。而諗辦法既人，並唔係我，而係起初嗌好難解決既佢地。

開完會已經係放工時間，我一條友坐左響寫字樓度諗，其實成世人，有幾多時候錯失左一d機會，係因為好似今日咁既呢？困難係人都會怕既，但響打退堂鼓之前，至低限都認真確認一下，果d困難係真正值得去怕先好掉頭走丫，下話？當遇到呢難題既時候，更多既時候唔係掉頭走，而係郁都唔郁然之後不停嗌難，一生人，可能好多機會就係咁樣俾你嗌下嗌下就嗌走左囉。

有一個問題我成日都諗，考慮一件事值唔值得做既時候，你會選擇將個focus擺響「點樣可以make it happen」，抑或努力去找尋「I can't make it happen」既理由？

祝大家有個愉快既週末。