你份人工包左乜？

關於同事面對困難時既表現，你或者會覺得我天真，但係我依然比較相信，同事們有咁既表現，主要係為怕，又或者唔習慣面對困難所致。所以我既focus，依然係放響幫佢地一齊諗，嘗試減低佢地面對困難時既恐懼果度囉。

好多朋友話，唉，打份工，無啦啦要做d咁難既野，有乜著數先？冇著數又要做，做完又淨係得個老闆有著數，梗係唔做啦，下話？自己搵自己笨牙？

朋友，計得咁清？

又，如果呢番說話俾你老細聽到，你又覺得你老細應該點做？

如果你老細好似我一樣咁仆街，而佢又認定你呢一番說話係出自真心既話…講真，今時今日呢個時勢，你個位，可能以經唔多穩陣啦。

*****

個問題係，到底你收果份糧，包左d乜？包唔包要幫老細解決下難題先？

呢個問題，每個人都有唔同既解讀。我公司每個同事，大概都有唔同既理解。所以我相信，不論你點答都好，冇所謂絕對既對與錯既。不過打工仔同老闆呢一種合作關係，大家係需要一d共識既。即是話，你份人工，到底包左d乜，你既理解，同出糧俾你既老細，唔應該有太大既出入，否則大家就合作唔到架啦。有d野你要覺得你份糧唔包，但係你老細覺得包喎，大家死撐落去唔會有好結果，到最後，只會係分手收場啦。

*****

每當新請一個同事返黎既時候，特別係年輕畢業唔耐既同事，我都會提醒佢地，你地讀完書，打一份寫字樓工，要記住自己係一個白領。我無意歧視藍領，不過我想我既同事們明白，一個白領同一個藍領，所賣既，係完全唔同性質既工作能力。

坐響辦公室既人，即使職位唔高都好，多多少少點都要賣一點腦汁同思考既能力。不過我遇過好多人，心裡面都唔係咁諗。總覺得，自己可以每日都做一d好routine，冇任何突發事件會發生又或者無需思考既事既「白領」工作。要佢地響辦公室裡面處理一d需要用腦思考既事情，佢地會認為係「過份」。但係現實係咪真係可以咁呢？響一條工廠既assembly line旁邊，做一個啤膠花既女工或者係。但係響一個辦公室裡面，其實幾冇可能。

咁，你究竟係一個白領，還是一個坐響辦公室內既藍領？

*****

我唔鍾意有d老闆埋怨自己既下屬唔肯「做多d」，又或者「行多一步」。事實上，你要求伙計「做多d」，某程度上係要求緊伙計付出多過自己所給予既報酬。美其名，伙計做多d係for their own benefit，又或者係for their personal growth之類，不過出自老闆既口，呢句係廢話。人地既own benefit，唔駛你粗心啦，下話。真正benefit果個，係個老細自己之嘛。講到滿口仁義咁，搵鬼信咩。

不過我更加唔鍾意，有d伙計去見工既時候，講得清清楚楚應承話係屬於工作範圍之內既野，到之後做落發覺難做，就推卸話因為做左「冇自己著數」，所以就理直氣壯話「逗你雞碎咁多，唔應該包咁多野」。

年資淺既同事，遇到困難唔識點面對，可以教，可以慢慢學。當經驗累積之後，果d困難慢慢就唔會再係困難。但要改變推卸責任同不守信用既心魔呢，呢樣冇得教，亦冇得慢慢學，確認係後者既話，我寧願你另謀高就。