你變了。

最近有做得較耐既同事同我講：「老細，你真係變左喎。」

變得冇咁有人情味，變得冇咁肯聽同事意見，變得越黎越冇相量餘地，變得越黎越冷…大至係咁上下啦。

其實我係知既。

用我慣用既說話黎講，我係變得越來越仆街囉。

而呢個轉變呢，我係刻意去做。

好多人可能覺得，做得老細耐，權大，冇人響頭上壓住自己，人就慢慢變得腐化，變得目中無人，唯我獨尊。所以做人老細上司做得耐，好人好姐都會變成個仆街，慢慢變得唔得人心，變得越黎越自私。

或者係都唔定，不過我既感覺係，一個商業機構，唔同既成長階段，對管理既模式會有唔同既需求，制度化同人情味之間既平衡，隨住唔同既階段，會有機會shift上shift落既。

我嘗試將轉變做得-盡-量-慢-一-d。期望同事會容易一d接受同適應。但係方向，唔會逆轉。

金融海嘯發生初期，我曾經向同事預警過，今時唔同往日呀，我會變得越黎越乞人憎，會逼得大家越黎越緊。當然，講既一刻大家都唔會feel到d乜，直到忽然有一日，同事響工作上比ck逼到嘔血既時候，先恍然發覺，嘩，乜老細你真係變到咁？

有d老闆喜歡講話，逼你等於train你，其實係為你好。咁既說話，呃鬼咩。做人老細，即使仆街都應該仆得坦白d。逼你，冇錯真係等於train你，不過，唔係為你好，而係為我，同埋一班股東好。管理層always都有責任去令一班同事變得更強更fit，otherwise公司響個market會越黎越唔夠贏。只不過當你變得強左，你既議價能力亦會相對提高。呢個係老細逼你既副產品，但係有幾多個老闆，響逼班伙計做野既時候，係主力瞄準住呢一個「副產品」去做咁無私既呢？

at least，我唔係囉。我只係諗：同事強，公司就強，當競爭力變得更強既時候，公司響金融海嘯之中，就冇咁易死，係咁多。

當然，努力"train up"完之後，假如你頂我唔住辭工他投，我會覺得好蝕同條氣好唔順囉，哈哈。

至於尺度如何，依家只可以憑自己良心啦。（即係廢話…）

或者，從古至今，一個獨裁既暴君，就係響如此環境之中開始萌芽。