荒唐過後

講明先，今日呢一篇，成篇都係斷估同亂吹，一d根據都冇既。

呢期其中一樣聽得政府出黎講得最多既野，就係青少年濫藥問題。我過左呢個所謂既「青少年」期n年啦，感受唔到到底情況有幾惡劣，不過，每次當睇到呢d禁毒訊息既時候，心裡面都有些少疑問。

好多年前響外國讀書既時候，有唔少鬼仔同學，都會走去食大麻。講真，幾common既。當然，我唔係話啪丸呀，食大麻呢d行為好普通冇問題，但係我以前既印像係，呢班鬼仔同學，過左幾年荒唐既生活之後，好多都會自動自覺變返生性。外國既社會同傳媒唔見得有太多有關叫人唔好吸毒同濫藥既宣傳，呢班鬼仔亦冇俾類似正生書院之類既學校同機構刻意改造，總之幾年既荒唐過後，唔知點解佢地就會變返個生性既人，好好地讀埋個大學，好好地出黎社會做事。早前睇過d報導，連好幾任既美國總統都有「年輕食大麻」既紀錄，到頭黎，佢地又可以重拾正軌，最後仲出人頭地添。

反觀香港地呢，反而就唔多覺有呢個情況喎。即是年輕既時候過住荒唐既生活，年紀漸漸大既時候，大部份好似唔係好覺，會好似班鬼仔咁，識得自動自覺變番生性。細個so call變壞左既，大部份都係一路壞落去。即使荒唐過後重新做人果批，要振作之後出人頭地，例子似乎少之又少。更唔好講話，食完大麻都仲可以做總統，直頭係天荒夜談。

我唔係d乜社會學既學者，唔知箇中原因係d乜。不過呢，我覺得香港地有個文化，就係一個人既成敗，好多人都覺得，響細細個就經已決定左。你條命生得正唔正，出身好唔好係其中之一，小學入唔入到間名校，又係另一個決定「人生」既轉捩點。我有時覺得，唔係下話，成世人既成就，居然響入小學果一刻就決定左？或者係我錯覺，但俾我既感覺係，你既人生響細細個果陣就決定左啦。咁你細細個選擇左去「荒唐」，咁人生從呢一刻開始就完左啦。人會受呢d意識影響，慢慢咁self-fulfilling，於是就變成翻唔到身。

當然，我又係估下既遮。

有個鬼仔舊同學同我講，以前細個，食大麻主要係貪玩貪有型。年紀大左慢慢發覺咁樣做唔係好型，於是就放低，乖乖地咁努力做人囉。香港地班後生仔濫藥，我諗除左貪玩貪型之外，當中仲有好多怨氣響當中，想逃避好多社會既壓力。貪玩呢，通常都有玩到厭唔玩既一日，不過怨氣呢樣野，通常只會越積越多，越積得多就越要逃避。鬼仔玩厭之後就努力做人，翻到身既原因，我覺得分別響大家體內「怨氣」既含量果度。

我唔鍾意果種，細細個就俾人定型，十幾歲既後生仔就俾人「睇死」又或者「睇好」既風氣。心智成熟既人，「俾人睇死」反而會激發鬥志發憤圖強，但係十幾歲既年青人，心智發展未熟得晒，回應「俾人睇死」既反應分分鐘係變本加厲，實行真係衰俾你睇。香港地好多人就硬係鍾意晨咁早就「判定」你掂定唔掂，到頭黎害死唔知幾多人。

亂七八糟既一篇爛文，多謝大家容忍。

祝大家有個愉快既週末。