肚裡面

當最近望見老婆個肚開始變得越黎越大既時候，我得承認，我係開始想將腳步放慢落黎，返少d工，唔好咁搏命做野，見多d屋企人，然之後等待bb出世。(俾好多朋友講中晒…)

唔少朋友問我準備好做爸爸未，我唔知點先叫做「準備好」，知道老婆大肚初期，感覺一直比較抽離，直至最近一齊去買bb床，感覺先忽然出現：「咦，係喎，真係要做人老豆啦喎。將會響呢張bb床上面訓覺果個，係我個仔黎架喎…」

過去一段時間，有好多人同我講左好多好多意見，由點樣餵人奶去到小學點報學校都有。我心裡面當然多謝朋友們既關心，不過呢一刻入到腦既訊息其實並唔多。反而老婆經已好有系統地將呢d意見分門別類，做好晒準備，而到左呢一刻，我仲依然好似盲頭烏蠅一樣，完全唔知應該點搞。

我老豆同我講：「唔駛緊張，打到黎果陣，你就自動波會識得點搞架啦。」

醫生話bb係個男仔，我自己對男抑或女其實並冇preference。不過當醫生話俾我地知bb既性別之後，老婆就同我講：「拿，bb係個男仔，佢會睇住個老豆黎學習，你要教佢多d啦。」

我笑老婆咁講其實係響度推卸責任，不過我諗，的確又係事實既。即使係我自己，有唔少既價值觀同做人既原則，又真係由ck老豆果一度「承繼」返黎。bb將來變成點，以一套點樣既人生觀去行走江湖，好可能都會受我呢個老豆影響。咁我心諗，查實響bb長大既過程裡面，我會嘗試給予一套點樣既價值觀俾佢？點樣先可以讓佢將來逃離每日「怨天怨地」既魔咒？

醫生響step既肚皮上塗上cold gel，手握住超聲波儀器響肚皮上碌黎碌去。果個黑白螢光幕上面呈現左一個我唔係好睇得明既隱隱約約既「bb圖案」，老婆同我一直屏息靜氣，直至醫生開聲：「ok，好好丫，bb健康丫。」

whew…

每一次做產前檢查，直到聽到醫生開聲confirm母子平安健康，先會懂得鬆一口氣。

thank god。

感謝上天讓我既人生繼續好玩。